ପରୀକ୍ଷାରେ ପ୍ରଥମ ଥର ସାମିଲ ହେବ ଆଧାର କାର୍ଡ: ଜାଲିଆତି ରୋକିବାକୁ ହେବ ପରୀକ୍ଷାର୍ଥୀଙ୍କ ପରିଚୟ
ନୂଆଦିଲ୍ଲୀ: ଟ୍ରେନି ଆଇଏଏସ ପୂଜା ଖେଡ଼କରଙ୍କୁ ନେଇ ମୁଣ୍ଡ ଟେକିଥିବା ବିବାଦ ଏବେ ସବୁଠି ଚର୍ଚ୍ଚା । ତେଣୁ ଏଭଳି ଜାଲିଆତିକୁ ରୋକିବା ପାଇଁ ଏକ ବଡ଼ ପଦକ୍ଷେପ ନେଉଛନ୍ତି ସରକାର । ପ୍ରଥମ ଥର ପାଇଁ ସରକାର ୟୁପିଏସସି ପରୀକ୍ଷାରେ ଆଧାର କାର୍ଡ ସାହାଯ୍ୟ ନେବାକୁ ନିଷ୍ପତ୍ତି ନେଇଛନ୍ତି । ୟୁପିଏସସି ରେଜିଷ୍ଟ୍ରେସନ୍ ଏବଂ ଭର୍ତ୍ତି ପରୀକ୍ଷା ପାଇଁ ଭିନ୍ନ ଭିନ୍ନ ଫେଜରେ ଆଧାର କାର୍ଡ ଦ୍ୱାରା ପରୀକ୍ଷାର୍ଥୀଙ୍କ ପରିଚୟ ଯାଞ୍ଚ କରିବାକୁ ଅନୁମତି ମିଳିଛି । ତେବେ ଏହା ସ୍ୱଇଚ୍ଛା ରହିବ । ପରିଚୟ ପତ୍ର ଯାଞ୍ଚ କରିବା ଦ୍ୱାରା ଜାଲିଆତିକୁ ରୋକିବା ସହଜ ହୋଇପାରିବ ବୋଲି ଆଶା କରାଯାଉଛି ।
ସରକାରଙ୍କ ତରଫରୁ ଆଧାର-ବେସ୍ଡ ଅଥେଣ୍ଟିକେସନ୍ ପାଇଁ ଅନୁମତି ମିଳିବା ପରେ କର୍ମଚାରୀ ଏବଂ ତାଲିମ ମନ୍ତ୍ରଣାଳୟ ମଧ୍ୟ ଏ ସମ୍ପର୍କରେ ବିଜ୍ଞପ୍ତି ଜାରି କରିଛି । ମନ୍ତ୍ରଣାଳୟ କହିଛି ଯେ, ୱାନ ଟାଇମ୍ ରେଜିଷ୍ଟ୍ରେସନ୍ ପୋର୍ଟାଲରେ ପଞ୍ଜୀକରଣ ସମୟରେ ଏବଂ ପରୀକ୍ଷା / ନିଯୁକ୍ତି ପରୀକ୍ଷାର ବିଭିନ୍ନ ପର୍ୟ୍ୟାୟରେ ପ୍ରାର୍ଥୀଙ୍କ ପରିଚୟ ଯାଞ୍ଚ କରିବାକୁ ନିଷ୍ପତ୍ତି ନିଆଯାଇଛି । ତେବେ ସ୍ବେଚ୍ଛାକୃତ ଭିତ୍ତିରେ ପରୀକ୍ଷାର୍ଥୀଙ୍କ ପରିଚୟ ପ୍ରମାଣ କରିବାକୁ UPSC ଅନୁମତି ଦିଆଯାଇଛି।
ଏହି ନୋଟିଫିକେସନରେ କୁହାଯାଇଛି ଯେ, ଆୟୋଗ ଆଇନ ୨୦୧୬ ର ସମସ୍ତ ବ୍ୟବସ୍ଥା, ସେଥିରେ ପ୍ରସ୍ତୁତ ନିୟମାବଳୀ ଏବଂ ଭାରତର ୟୁନିକ ଆଇଡେଣ୍ଟିଫିକେସନ୍ ଅଥରିଟି ଦ୍ୱାରା ଜାରି କରାଯାଇଥିବା ନିର୍ଦ୍ଦେଶାବଳୀକୁ ପାଳନ କରିବାକୁ ପଡିବ। ଗତ ମାସରେ, ୟୁପିଏସସି ପ୍ରୋବେସନାରୀ ଆଇଏଏସ୍ ପୂଜା ଖେଡକରଙ୍କ ପ୍ରାର୍ଥୀତ୍ୱକୁ ବାତିଲ କରି ଦେଇଥିଲା। ସିଭିଲ ସର୍ଭିସ ପରୀକ୍ଷାରେ ଜାଲିଆତି କରିବାକୁ ଚେଷ୍ଟା କରିଥିବାରୁ ତାଙ୍କୁ ଭବିଷ୍ୟତର ସମସ୍ତ ପରୀକ୍ଷା ପାଇଁ ବାରଣ କରାଯାଇଛି। ପୂଜା ଖେଡକରଙ୍କ ବିରୋଧରେ ନକଲି ଅକ୍ଷମତା ପ୍ରମାଣପତ୍ର ଏବଂ ଓବିସି ନନ୍ କ୍ରିମିଲେୟର ସ୍ତରର ପ୍ରମାଣପତ୍ର ତିଆରି କରିବା ସମେତ ଅନେକ ଅଭିଯୋଗ ରହିଛି।