ମହିଳାମାନଙ୍କୁ ମିଳିଲା ଗର୍ଭପାତ ପାଇଁ ସାମ୍ବିଧାନିକ ଅଧିକାର, ଇତିହାସରେ ପ୍ରଥମଥର ପାଇଁ ସରକାର ନେଲେ ଏଭଳି ନିଷ୍ପତ୍ତି
ନୂଆଦିଲ୍ଲୀ: ଗର୍ଭପାତ ଏକ ବେଆଇନ କାର୍ଯ୍ୟ ବୋଲି ଆଇନରେ ରହିଆସିଛି । ଯେଉଁମାନେ ଏପରି କାର୍ଯ୍ୟ କରନ୍ତି ପୋଲିସ ଏଥିପାଇଁ କଡା କାର୍ଯ୍ୟାନୁଷ୍ଠାନ ଗ୍ରହଣ କରିଥାଏ । ହେଲେ ବର୍ତ୍ତମାନ ଏହାକୁ ସାମ୍ବିଧାନିକ ଅଧିକାରର ମାନ୍ୟତା ମିଳିଛି । ଆଜ୍ଞା ହଁ ଫ୍ରାନ୍ସ ସରକାର ଏପରି ଐତିହାସିକ ପଦକ୍ଷେପ ଗ୍ରହଣ କରିଛନ୍ତି । ଏଠାରେ ସୋମବାର ଦିନ ସଂସଦର ମିଳିତ ଅଧିବେଶନରେ ଏହି ଅଧିକାରକୁ ମଞ୍ଜୁରୀ ମିଳିଛି । ଏହି ବିଲ ଉପରେ ସପକ୍ଷ ଭୋଟ ୭୮୦ ଖଣ୍ଡ ଭୋଟ ମିଳିଥିବା ବେଳେ, ଏହା ବିରୋଧରେ ମାତ୍ର ୭୨ ଖଣ୍ଡ ଭୋଟ ମିଳିଥିଲା । ଫ୍ରାନ୍ସ ସଂସଦର ଉଭୟ ଗୃହ, ନ୍ୟାସନାଲ ଆସେମ୍ବଲୀ ଏବଂ ସିନେଟ ମହିଳାମାନଙ୍କୁ ଗର୍ଭପାତ କରିବାର ଅଧିକାର ଗ୍ୟାରେଣ୍ଟି ଦେବା ଲାଗି ଫ୍ରାନ୍ସ ସମ୍ବିଧାନର ଧାରା ୩୪ରେ ସଂଶୋଧନ କରିବାକୁ ମଞ୍ଜୁରୀ ଦେଇଛନ୍ତି । ଗର୍ଭପାତକୁ ସାମ୍ବିଧାନିକ ଅଧିକାର ଦେବାରେ ଫ୍ରାନ୍ସ ବିଶ୍ୱର ପ୍ରଥମ ଦେଶ ହୋଇପାରିଛି । ସରକାରଙ୍କ ଏହି ନିଷ୍ପତ୍ତିକୁ ନେଇ ଅନେକ ଲୋକ ଖୁସି ବ୍ୟକ୍ତ କରିବା ସହ ଏହି ପଦକ୍ଷେପକୁ ପ୍ରଶଂସା କରିଛନ୍ତି ।
ରିପୋର୍ଟ ମୁତାବକ ଫ୍ରାନ୍ସର ରାଜଧାନୀ ପ୍ୟାରିସର ଭର୍ସେଲସ ପ୍ୟାଲେସରେ ସାଂସଦଙ୍କ ଏକ ସ୍ୱତନ୍ତ୍ର ସଭାରେ ବିଧାନସଭା ପ୍ରକ୍ରିୟାର ଅନ୍ତିମ ପର୍ଯ୍ୟାୟ ଥିଲା । ଫ୍ରାନ୍ସ ସିନେଟ ଏବଂ ନେସନାଲ ଆସେମ୍ବଲୀ ଚଳିତ ବର୍ଷ ଆରମ୍ଭରେ ସଂଶୋଧନକୁ ବହୁ ମାତ୍ରାରେ ଭୋଟ ଦେଇ ମଞ୍ଜୁରୀ ଦେଇଥିଲେ । ସଂଶୋଧନରେ କୁହାଯାଇଛି ଯେ, ଫ୍ରାନ୍ସରେ ଗର୍ଭପାତର ‘ସୁନିଶ୍ଚିତ ସ୍ୱାଧୀନତା’ ଅଛି । ବହୁ ସାଂସଦ ଏହି ପଦକ୍ଷେପକୁ ପ୍ରଂଶସା କରି ଏହା ଐତିହାସିକ ବୋଲି କହିଛନ୍ତି । ଫ୍ରାନ୍ସର ପ୍ରଧାନମନ୍ତ୍ରୀ ଗାବ୍ରିଏଲ ଅଟଳ ମତଦାନ ପୂର୍ବରୁ କହିଥିଲେ ଯେ, ସେହି ମହିଳାମାନଙ୍କ ପ୍ରତି ଏହା ‘ନୈତିକ ଋଣ’ ଅଟେ, ଯେଉଁମାନଙ୍କୁ ଅତୀତରେ ଅବୈଧ ଗର୍ଭପାତ ସହିବାକୁ ବାଧ୍ୟ କରାଯାଇଥିଲା । ଆମେ ସମସ୍ତ ମହିଳାମାନଙ୍କୁ ଏହି ବାର୍ତ୍ତା ପଠାଉଛୁ ଯେ, ଆପଣଙ୍କ ଶରୀର ଆପଣଙ୍କର ଅଟେ । ଫ୍ରାନ୍ସର ରାଷ୍ଟ୍ରପତି ଇମାନୁଏଲ୍ ମାକ୍ରୋନ୍ କହିଛନ୍ତି ଯେ, ଶୁକ୍ରବାର ଦିନ ଅନ୍ତର୍ଜାତୀୟ ମହିଳା ଅଧିକାର ଦିବସରେ ଏହି ସଂଶୋଧନ ପାସ୍ ହେବା ପାଇଁ ସରକାର ଏକ ଆନୁଷ୍ଠାନିକ କାର୍ଯ୍ୟକ୍ରମ କରିବେ।
