‘ନାଗୁଣୀ ନେଉଛି ପ୍ରତିଶୋଧ, ଖୋଜି ଖୋଜି ଲୋକଙ୍କୁ ମାରୁଛି ଚୋଟ’: ମେରଟର ସାପ ଧରାଳିଙ୍କର ବୁହାଇ ସାରିଲାଣି ଝାଳ
ନୂଆଦିଲ୍ଲୀ: ଗତ ପାଞ୍ଚ ଦିନ ଧରି ଉତ୍ତରପ୍ରଦେଶର ହାପୁଡ ଜନପଦରେ ଏକ ନାଗୁଣୀର ଆତଙ୍କ ଦେଖିବାକୁ ମିଳୁଛି । ନାଗୁଣୀ ନିଜର ପ୍ରତିଶୋଧ ନେଉଛି ବୋଲି ଗ୍ରାମବାସୀଙ୍କ ମଧ୍ୟରେ ଆଲୋଚନା ହେଉଛି । ବର୍ତ୍ତମାନ ସାପ କାମୁଡ଼ିବା କାରଣରୁ ଗୋଟିଏ ପରିବାରର ତିନି ଜଣଙ୍କର ମୃତ୍ୟୁ ହୋଇଛି ।
ଏହା ବ୍ୟତୀତ ଅନ୍ୟ କିଛି ଲୋକ ମଧ୍ୟ ସାପ ଚୋଟ ମାରିସାରିଛି । ଗତ ୫ ଦିନ ଧରି ଗ୍ରାମବାସୀ ଶାନ୍ତିରେ ଶୋଇପାରୁ ନାହାଁନ୍ତି । ଏଠାରେ ବନ ବିଭାଗ ଏବଂ ପୋଲିସର ବହୁ ଚେଷ୍ଟା ପରେ ମଧ୍ୟ ନାଗୁଣୀକୁ କେହି ଧରିପାରୁନାହାଁନ୍ତି । ମେରଟରୁ ଏକ୍ସପର୍ଟ ସାପ ଧରାଳିମାନଙ୍କୁ ଡକାଯାଇଥିଲା, କିନ୍ତୁ ସେମାନଙ୍କୁ ମଧ୍ୟ ଖାଲି ହାତରେ ଫେରିବାକୁ ପଡିଲା ।
ବନ ବିଭାଗର ଅଧିକାରୀ କହିଛନ୍ତି ଯେ ଗୁରୁବାର ଦିନ ସର୍ପ ଖୋଜିବା ଆରମ୍ଭ ହେବ । ଆଶା କରାଯାଉଛି ଶୀଘ୍ର ସର୍ପ ଧରାଯିବ ଏବଂ ଗ୍ରାମବାସୀ ଭୟରୁ ମୁକ୍ତି ପାଇବେ । ଏହି ପ୍ରସଙ୍ଗରେ ଆଖପାଖ ଗାଁରେ ବିଭିନ୍ନ ପ୍ରକାରର ଆଲୋଚନା ଚାଲିଛି ।
ଏବେ ଆସନ୍ତୁ ଜାଣିବା ପୁରା ଘଟଣା କ’ଣ?
ବାସ୍ତବରେ ଏହି ଘଟଣା ହାପୁଡ ଜନପଦ ବାହାଦୂରଗଡ ଅଞ୍ଚଳର ସୁନ୍ଦରପୁର ଗାଁର ଘଟିଛି । ନିକଟରେ ଜଣେ ଗାଁର ମହିଳା ଏବଂ ତାଙ୍କ ଦୁଇ ପିଲାଙ୍କୁ ସାପ ଚୋଟ ମାରିଦେଇଥିଲା । ସାପ କାମୁଡ଼ିବା କାରଣରୁ ତିନିଜଣଙ୍କର ମୃତ୍ୟୁ ହୋଇଥିଲା ।
ମୃତ୍ୟୁ ପରେ ଗାଁର ଲୋକମାନେ ବହୁତ ରାଗି ଯାଇଥିଲେ । ଏହି ସମୟରେ ସାପ ଅନ୍ୟ ଦୁଇ ଜଣଙ୍କୁ ମଧ୍ୟ ଚୋଟ ମାରିଥିଲା । ଅନେକ ଲୋକଙ୍କୁ ଲଗାତାର ଟାର୍ଗେଟ କରାଯିବା ପରେ ଗ୍ରାମବାସୀଙ୍କ ମଧ୍ୟରେ ଆତଙ୍କ ଖେଳିଯାଇଥିଲା । ଗାଁର ଲୋକମାନେ କହିଛନ୍ତି ଯେ ନାଜ-ନାଗୁଣୀ ଦମ୍ପତିଙ୍କ ସହ କିଛି ଭୁଲ ହୋଇଛି ।
ଏହି କାରଣରୁ ନାଗୁଣୀ ବର୍ତ୍ତମାନ ପ୍ରତିଶୋଧ ନେଉଛି ଏବଂ ଲୋକଙ୍କୁ ଖୋଜି ଖୋଜି ଚୋଟ ମାରୁଛି । ନାଗୁଣୀର ଭୟ ଗ୍ରାମବାସୀଙ୍କ ମଧ୍ୟରେ ଏତେ ବ୍ୟାପିଗଲା ଯେ ପୋଲିସକୁ ଡାକିବାକୁ ପଡ଼ିଲା । ପୋଲିସ ବହୁ ଖୋଜାଖୋଜି କରିଥିଲା କିନ୍ତୁ ନାଗୁଣୀ ମିଳି ନଥିଲା । ଏହା ପରେ ମେରଟରୁ ଏକ ସାପ ଧରାଳିକୁ ଡକାଯାଇଥିଲା ।
ପୋଲିସ ଏବଂ ଗ୍ରାମବାସୀଙ୍କ ଉପସ୍ଥିତିରେ ମେରଟର ଏକ୍ସପର୍ଟ ସାପ ଧରାଳି ବଂଶୀ ବଜାଇ ନାଗୁଣୀକୁ ଧରିବାକୁ ଚେଷ୍ଟା କରିଥିଲେ । ଦୀର୍ଘ ସମୟ ଧରି ସେ ତନ୍ତ୍ର ମନ୍ତ୍ର ବ୍ୟବହାର କରି ନାଗୁଣୀକୁ ଧରିବାକୁ ଚେଷ୍ଟା କରିଥିଲେ କିନ୍ତୁ ସେ ମଧ୍ୟ ସଫଳ ହୋଇନଥିଲେ । ଏହାର ଭିଡିଓ ସୋସିଆଲ ମିଡିଆରେ ମଧ୍ୟ ଭାଇରାଲ ହୋଇଛି ।
ସର୍ପମାନଙ୍କର ଲଗାତାର ଆକ୍ରମଣ ଯୋଗୁଁ ଗ୍ରାମବାସୀଙ୍କ ମଧ୍ୟରେ ଭୟର ବାତାବରଣ ଦେଖାଯାଉଛି । ଗାଁର ଅନେକ ଲୋକ ନିଜ ପିଲାମାନଙ୍କୁ ନିଜ ସମ୍ପର୍କୀୟଙ୍କ ନିକଟକୁ ପଠାଇଥିବାବେଳେ ଗାଁରେ ରହୁଥିବା ସମସ୍ତ ଲୋକ ନିଜ ପିଲାମାନଙ୍କ ସହିତ ଗୋଟିଏ ରୁମରେ ଶୋଉଛନ୍ତି । ବନ ବିଭାଗ ଟିମ୍ ଗୁରୁବାର ନାଗୁଣୀକୁ ଧରିବାରେ ସକ୍ଷମ ହେବ କି ନା, ତାହା ଦେଖିବାକୁ ବାକି ରହିଲା ।
