ଲିଡ୍ସରେ ବେନ୍ ଡକେଟ୍ କଲେ ମହାରେକର୍ଡ, ଭାରତ ବିପକ୍ଷରେ କେହି କରିନଥିଲେ ଏତିକି ସ୍କୋର

ନୂଆଦିଲ୍ଲୀ: ଭାରତ ବନାମ ଇଂଲଣ୍ଡ ଲିଡ୍ସ ଟେଷ୍ଟରେ ବେନ୍ ଡକେଟ୍ ଇତିହାସ ସୃଷ୍ଟି କରିଛନ୍ତି । ସେ ଲିଡ୍ସ ଟେଷ୍ଟର ଚତୁର୍ଥ ଇନିଂସରେ ୧୪୯ ରନର ଏକ ଚମତ୍କାର ଇନିଂସ ଖେଳିଥିଲେ । ଏହା ସହିତ, ସେ ଭାରତ ବିପକ୍ଷ ଚତୁର୍ଥ ଇନିଂସରେ ପିଛା କରିବା ସମୟରେ ସର୍ବାଧିକ ବ୍ୟକ୍ତିଗତ ସ୍କୋର କରିଥିବା ଖେଳାଳି ହୋଇଯାଇଛନ୍ତି ।

ଡକେଟ୍ ତାଙ୍କ ୧୪୯ ରନର ଇନିଂସରେ ୨୧ ଚୌକା ଏବଂ ଗୋଟିଏ ଛକା ମାରିଥିଲେ । ସେ ଲିଡ୍ସ ଟେଷ୍ଟର ପ୍ରଥମ ଇନିଂସରେ ମଧ୍ୟ ୬୨ ରନର ଅବଦାନ ରଖିଥିଲେ । ଏହା ଡକେଟଙ୍କ ଟେଷ୍ଟ କ୍ୟାରିୟରର ଷଷ୍ଠ ଶତକ ଥିଲା।

ଚତୁର୍ଥ ଇନିଂସରେ ଭାରତ ବିପକ୍ଷରେ ସର୍ବାଧିକ ବ୍ୟକ୍ତିଗତ ସ୍କୋର– ପୂର୍ବରୁ, ଜୋ ରୁଟ୍ ଟେଷ୍ଟ କ୍ରିକେଟରେ ଭାରତ ବିପକ୍ଷରେ ମ୍ୟାଚର ଚତୁର୍ଥ ଇନିଂସରେ ଟାର୍ଗେଟ ପିଛା କରିବା ସମୟରେ ସର୍ବାଧିକ ବ୍ୟକ୍ତିଗତ ସ୍କୋର କରିଥିବା ଖେଳାଳି ଥିଲେ । 2022 ମସିହାରେ ବର୍ମିଂହାମରେ ଖେଳାଯାଇଥିବା ଟେଷ୍ଟ ମ୍ୟାଚର ଇଂଲଣ୍ଡକୁ 378 ରନର ଟାର୍ଗେଟ ପିଛା କରିବାକୁ ପଡିଥିଲା।

ଏବେ ବେନ୍ ଡକେଟ 149 ରନର ଇନିଂସ ଖେଳି ଟାର୍ଗେଟ ପିଛା କରିବା ସମୟରେ ସର୍ବାଧିକ ବ୍ୟକ୍ତିଗତ ସ୍କୋର କରିଥିବା ବ୍ୟାଟସମ୍ୟାନ୍ ହୋଇଛନ୍ତି ।

ବେନ୍ ଡକେଟ ଲିଡ୍ସ ଟେଷ୍ଟର ପ୍ରଥମ ଇନିଂସରେ 62 ରନ କରିଥିଲେ ଏବଂ ଏବେ ଦ୍ୱିତୀୟ ଇନିଂସରେ 149 ରନ କରିଛନ୍ତି । ସେ ସମଗ୍ର ମ୍ୟାଚ୍ ରେ 211 ରନ କରିବା ସହିତ ଭାରତୀୟ ବୋଲରମାନଙ୍କୁ ପରାସ୍ତ କରିଛନ୍ତି ।

ଟେଷ୍ଟ କ୍ରିକେଟରେ ଭାରତ ବିପକ୍ଷରେ ତାଙ୍କର ପରିସଂଖ୍ୟାନ ବହୁତ ଭଲ ନୁହେଁ । ଲିଡ୍ସ ଟେଷ୍ଟ ପୂର୍ବରୁ, ଲାଲ-ବଲ୍ ଫର୍ମାଟରେ ଭାରତ ବିପକ୍ଷରେ ଡକେଟଙ୍କ ହାରାହାରି ମାତ୍ର 27.8 ଥିଲା। ଏହା ପୂର୍ବରୁ, ସେ ଟିମ୍ ଇଣ୍ଡିଆ ବିପକ୍ଷରେ 13 ଟେଷ୍ଟ ଇନିଂସରେ କେବଳ ଗୋଟିଏ ଶତକ ହାସଲ କରିପାରିଥିଲେ।