ଭାରତୀୟ ସେନାର ‘ସମ୍ଭବ’ ସ୍ମାର୍ଟଫୋନ୍, ସୀମାରେ କାମ କରୁଛି ଏହି ସ୍ୱଦେଶୀ ଅସ୍ତ୍ର

ନୂଆଦିଲ୍ଲୀ: ଅକ୍ଟୋବର 2024 ରେ ଚୀନ୍ ସହିତ ସୀମା ଆଲୋଚନା ସମୟରେ ସୁରକ୍ଷିତ ଯୋଗାଯୋଗ ସୁନିଶ୍ଚିତ କରିବା ପାଇଁ ଭାରତୀୟ ସେନା ସ୍ୱଦେଶୀ ଭାବରେ ବିକଶିତ ‘ସମ୍ଭବ’ (ସୁରକ୍ଷିତ ସେନା ମୋବାଇଲ୍ ଭାରତ ସଂସ୍କରଣ) ସ୍ମାର୍ଟଫୋନ୍ ବ୍ୟବହାର କରିଥିଲା। ଜାତୀୟ ସୁରକ୍ଷାକୁ ଧ୍ୟାନରେ ରଖି, ଅଧିକ ସାମରିକ ଅଧିକାରୀଙ୍କୁ ଏବେ ଆବଶ୍ୟକୀୟ ଫୋନ୍ ଦିଆଯାଉଛି ବୋଲି ସମ୍ବାଦ ସରବରାହ ସଂସ୍ଥା ANI ରିପୋର୍ଟ କରିଛି। ସମ୍ପୂର୍ଣ୍ଣ ଏନକ୍ରିପ୍ଟେଡ୍ ସମ୍ଭବ ସ୍ମାର୍ଟଫୋନ୍ 5G ଟେକନିକ ଉପରେ ଆଧାରିତ।

ଭାରତୀୟ ସେନା ଚୀନ୍ ସହିତ ଅକ୍ଟୋବରରେ ଆଲୋଚନା ସମୟରେ ସୁରକ୍ଷିତ ଯୋଗାଯୋଗ ପାଇଁ ‘ସମ୍ଭବ’ ସ୍ମାର୍ଟଫୋନ୍ ବ୍ୟବହାର କରିଥିଲା । ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ସାମ୍ବାଦିକ ସମ୍ମିଳନୀରେ ଏହା ବିଷୟରେ ସୂଚନା ଦେଇଛନ୍ତି । ସେ କହିଛନ୍ତି, ଅଧିକାରୀମାନଙ୍କୁ ପ୍ରାୟ 30 ହଜାର ସ୍ମାର୍ଟଫୋନ୍ ଦିଆଯାଇଛି । ଏହି ଫୋନ୍‌ଗୁଡ଼ିକରେ ଅଧିକାରୀଙ୍କ ନମ୍ବର ପୂର୍ବରୁ ସେଭ୍ ହୋଇସାରିଛି । ବିଶେଷ କଥା ହେଉଛି ଏଥିରେ ବିଭିନ୍ନ ଆପ୍ସ ରହିଛି । ଏହି ସ୍ମାର୍ଟଫୋନଗୁଡ଼ିକରେ ଫଟୋ, ଭିଡିଓ କିମ୍ବା ଡକ୍ୟୁମେଣ୍ଟ ପଠାଇବା ପାଇଁ ଏକ ସ୍ୱତନ୍ତ୍ର ଆପ୍ ଅଛି ଯାହା ସମ୍ପୂର୍ଣ୍ଣ ସୁରକ୍ଷିତ ଏବଂ ଡାଟା ଲିକ୍ ହେବାର ପ୍ରାୟ କୌଣସି ସମ୍ଭାବନା ନାହିଁ ।

ଏହା ସହିତ, ଏହି ଫୋନଗୁଡ଼ିକ ଏୟାରଟେଲ ଏବଂ ଜିଓ ନେଟୱାର୍କରେ କାମ କରିବ । ଏହା ଦ୍ୱାରା ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ ଲିକ୍ ହେବାର ସମସ୍ୟା ହ୍ରାସ ପାଇବ ବୋଲି ସେନା ଆଶା କରୁଛି । ‘ସମ୍ଭାବ’ ସ୍ମାର୍ଟ ଫୋନ୍ ପ୍ରୋଜେକ୍ଟ ଗତ ବର୍ଷ ହିଁ ଆରମ୍ଭ ହୋଇଥିଲା ।

ଏହି ସ୍ମାର୍ଟଫୋନର ବିଶେଷତ୍ୱ ​​କ’ଣ?

ଆପଣଙ୍କୁ ଜଣାଇ ଦେଉଛୁ ଯେ, ପୂର୍ବରୁ ଅନେକ ସେନା ଅଧିକାରୀ ସୂଚନା ଏବଂ ଡକ୍ୟୁମେଣ୍ଟ ସେୟାର କରିବା ପାଇଁ ହ୍ୱାଟସଆପ୍ ଏବଂ ଅନ୍ୟାନ୍ୟ ଆପ୍ ବ୍ୟବହାର କରୁଥିଲେ । କିନ୍ତୁ ଏହା ଦ୍ବାରା ସୂଚନା ଲିକ୍ ହେଉଥିଲା । ସମସ୍ତ ଗୁରୁତ୍ୱପୂର୍ଣ୍ଣ ଅଧିକାରୀଙ୍କ ନମ୍ବର ‘ସମ୍ଭବ’ ଫୋନରେ ପୂର୍ବରୁ ଅଛି । ତେଣୁ, ଅଲଗା ଭାବେ ନମ୍ବରଟିକୁ ସେଭ୍ କରିବାର କୌଣସି ଆବଶ୍ୟକତା ନାହିଁ।

ଭାରତୀୟ ସେନା ନିଜେ ‘ଏଣ୍ଡ-ଟୁ-ଏଣ୍ଡ ସିକ୍ୟୁର ମୋବାଇଲ୍ ଇକୋସିଷ୍ଟମ୍’ ବିକଶିତ କରିଛି । ଏହା ତୁରନ୍ତ ସଂଯୋଗ ସହିତ ସୁରକ୍ଷିତ ଯୋଗାଯୋଗ ପ୍ରଦାନ କରୁଛି । ଏହି ସ୍ମାର୍ଟଫୋନ୍ 5G ଟେକନୋଲୋଜିରେ କାମ କରେ ଏବଂ ସମ୍ପୂର୍ଣ୍ଣ ଏନକ୍ରିପ୍ଟ ହୋଇଛି । ଏହାର ଅର୍ଥ ହେଉଛି ଏହି ଫୋନରେ ହେଉଥିବା କଥାବାର୍ତ୍ତା ଏବଂ ତଥ୍ୟ ସମ୍ପୂର୍ଣ୍ଣ ସୁରକ୍ଷିତ ରହିବ ।