Nisar Mission Launch: ଶ୍ରୀହରିକୋଟାରୁ ଲଞ୍ଚ ହେଲା NISAR, ଏବେ ଭୂକମ୍ପ ଏବଂ ସୁନାମିର ପୂର୍ବରୁ ମିଳିବ ସୂଚନା

ନୂଆଦିଲ୍ଲୀ: ଜୁଲାଇ 30 ଭାରତ ଏବଂ ସମଗ୍ର ବିଶ୍ୱ ପାଇଁ ଏକ ଐତିହାସିକ ଦିନ ହୋଇଗଲା।  ନାସା ଏବଂ ISRO ର ମିଳିତ ପ୍ରକଳ୍ପ, NISAR (ନାସା-ISRO ସିନ୍ଥେଟିକ୍ ଆପର୍ଚର ରାଡାର) ସାଟେଲାଇଟର ସଫଳ ଉତକ୍ଷେପଣ ହୋଇଛି । GSLV-F16 ଜରିଆରେ ମହାକାଶ ପଠାଗଲା NISAR ।

ଏହି ଉତକ୍ଷେପଣ ସନ୍ଧ୍ୟା 5:40 ରେ ଆନ୍ଧ୍ରପ୍ରଦେଶର ଶ୍ରୀହରିକୋଟାର ସତୀଶ ଧାୱନ ମହାକାଶ କେନ୍ଦ୍ରରୁ କରାଯାଇଥିଲା । ଯାହାକୁ ଭାରତର ମହାକାଶ ବିଜ୍ଞାନରେ ଏକ ବଡ଼ ସଫଳତା ଭାବରେ ଦେଖାଯାଉଛି ।

ISRO ଏବଂ NASA ମଧ୍ୟରେ ସହଭାଗୀତାରେ ନିର୍ମିତ NISAR ସାଟେଲାଇଟ୍‌- NISAR ଅର୍ଥାତ୍ NASA-ISRO ସିନ୍ଥେଟିକ୍ ଆପର୍ଚର ରାଡାର ହେଉଛି ଏକ ସ୍ୱତନ୍ତ୍ର ଉପଗ୍ରହ, ଯାହାକୁ ଭାରତର ISRO ଏବଂ ଆମେରିକାର NASA ମିଳିତ ଭାବରେ ବିକଶିତ କରିଛନ୍ତି । ଏହାର ଉଦ୍ଦେଶ୍ୟ ହେଉଛି ପୃଥିବୀ ପୃଷ୍ଠକୁ ଅତି ନିକଟରୁ ପର୍ଯ୍ୟବେକ୍ଷଣ କରିବା ଯାହା ଦ୍ଵାରା ଆମ ପୃଥିବୀରେ ଘଟୁଥିବା ଜଟିଳ ପ୍ରକ୍ରିୟାଗୁଡ଼ିକୁ ବୁଝିହେବ । ଏହି ଉପଗ୍ରହ ଜଙ୍ଗଲରେ ପରିବର୍ତ୍ତନ, ବରଫ ଚାଦର ଭାଙ୍ଗିବା, ସମୁଦ୍ର ସ୍ତର ବୃଦ୍ଧି, ଭୂତଳ ଜଳ ହ୍ରାସ ଏବଂ ପ୍ରାକୃତିକ ବିପର୍ଯ୍ୟୟ ଭଳି ପରିସ୍ଥିତି ଉପରେ ନଜର ରଖିବ ।

ପୃଥିବୀ ପୃଷ୍ଠରେ 1 ସେଣ୍ଟିମିଟର ପରିବର୍ତ୍ତନକୁ ମଧ୍ୟ କରିବ ଚିହ୍ନଟ- NISAR ର ରାଡାର ହେଉଛି ପ୍ରଯୁକ୍ତିବିଦ୍ୟା ଦୃଷ୍ଟିରୁ ମହାକାଶରେ ଏହି ପ୍ରକାରର ପ୍ରଥମ ଉପକରଣ, ଯାହା ଅତ୍ୟନ୍ତ ସଠିକତାର ସହିତ କାମ କରିବ। ଏହା ସମଗ୍ର ପୃଥିବୀ ପୃଷ୍ଠକୁ ଏକ ବ୍ୟବସ୍ଥିତ ଉପାୟରେ ସ୍କାନ କରିବ ଏବଂ କେବଳ 1 ସେଣ୍ଟିମିଟର ସମାନ ପରିବର୍ତ୍ତନକୁ ମଧ୍ୟ ମାପିବ । ଏହାର ଅର୍ଥ ହେଉଛି ଏହି ଉପଗ୍ରହ ଆମକୁ ପ୍ରାକୃତିକ ବିପର୍ଯ୍ୟୟର ପୂର୍ବରୁ ସଙ୍କେତ ଦେଇପାରିବ ଏବଂ ସମୟରେ ଚେତାବନୀ ଦେଇପାରିବ ।