୨୦୦-୩୦୦ ଟଙ୍କାରେ ମିଳୁଛି ଜ୍ୟାକେଟ-ସ୍ୱେଟର: ଶୀତବସ୍ତ୍ର କିଣିବା ପାଇଁ ସବୁଠୁ ଭଲ ମାର୍କେଟ

ନୂଆଦିଲ୍ଲୀ: ସାରା ଦେଶରେ ଆରମ୍ଭ ହୋଇଯାଇଛି ଶୀତର ଲହରୀ । ବିଭିନ୍ନ ରାଜ୍ୟରେ ଥଣ୍ଡାର ପ୍ରକୋପ ବଢିବାରେ ଲାଗିଛି । ତେଣୁ ଲୋକମାନେ ଶୀତବସ୍ତ୍ର ପିନ୍ଧିବା ମଧ୍ୟ ଆରମ୍ଭ କରିଦେଲେଣି । ଅନେକ ଲୋକ ନିଜ ପାଇଁ ଶୀତବସ୍ତ୍ର ମଧ୍ୟ କିଣିବାକୁ ଯୋଜନା କରୁଛନ୍ତି । ତେବେ ଅଳ୍ପ ଖର୍ଚ୍ଚରେ ଭଲ ଶୀତବସ୍ତ୍ର କିଣିବାକୁ ଚାହୁଁଥିଲେ ଏହି ମାର୍କେଟ ଆପଣଙ୍କ ପାଇଁ ଖୁବ ସହାୟକ ହୋଇପାରିବ । ମାତ୍ର ୨୦୦-୩୦୦ ଟଙ୍କା ଖର୍ଚ୍ଚ କରି ଜ୍ୟାକେଟ, ସ୍ୱେଟର ଏବଂ ଅନ୍ୟାନ୍ୟ ଶୀତବସ୍ତ୍ର କିଣିପାରିବେ ଗ୍ରାହକ । ଏଠାରେ ଡିସେମ୍ବର ଏବଂ ଜାନୁୟାରୀ ମାସରେ କେବଳ ଶୀତବସ୍ତ୍ର ବିକ୍ରି କରି ଖୁବ ରୋଜଗାର କରିପାରନ୍ତି ବ୍ୟବସାୟୀ ।

କମ୍ ଦାମରେ ଜ୍ୟାକେଟ ଏବଂ ସ୍ୱେଟର ଭଳି ଶୀତବସ୍ତ୍ର କିଣିବା ମାମଲାରେ ଗ୍ରାହକଙ୍କ ପାଇଁ ସବୁଠାରୁ ଭଲ ମାର୍କେଟ ହେଉଛି ପଞ୍ଜାବର ଲୁଧିୟାନା ସହର । ଏଠାରେ ବିଭିନ୍ନ ପ୍ରକାରର ଶୀତବସ୍ତ୍ର ଖୁବ କମ୍ ଦାମରେ ବିକ୍ରି ହୋଇଥାଏ । ତେବେ ଏଠାରେ ଛୋଟ ଅର୍ଡରରେ କୌଣସି ମାଲ ବିକ୍ରି ହୁଏନାହିଁ । ଦେଶର ବିଭିନ୍ନ କୋଣରୁ ବ୍ୟବସାୟୀମାନେ ଏଠାକୁ ଆସି ସେମାନଙ୍କ ଦୋକାନ ପାଇଁ ଶୀତବସ୍ତ୍ର କିଣି ନେଇଥାନ୍ତି । ଲୁଧିୟାନାରୁ ଶସ୍ତାରେ ଏସବୁ ଜିନିଷ କିଣି ନେଇ ନିଜ ମାର୍କେଟରେ ବିକ୍ରି କରନ୍ତି ବ୍ୟବସାୟୀ । ପ୍ରତିବର୍ଷ ପ୍ରାୟ ଲକ୍ଷ ଲକ୍ଷ ବ୍ୟବସାୟୀ ଶୀତବସ୍ତ୍ର କିଣିବା ପାଇଁ ଲଧିୟାନାକୁ ଯାଉଛନ୍ତି । ମାତ୍ର ୨୫-୫୦ ହଜାର ଟଙ୍କା ଖର୍ଚ୍ଚ କରି ୨ ମାସ(ଡିସେମ୍ବର-ଜାନୁୟାରୀ) ଭିତରେ ନିବେଶ ପୁଞ୍ଜିର ୫୦-୬୦ ପ୍ରତିଶତ ପର୍ଯ୍ୟନ୍ତ ଲାଭ ହାସଲ କରିପାରିବେ ।

ସୂଚନା ଥାଉ ଯେ, ଲୁଧିୟାନାର ଅକାଳ ଗଢ ମାର୍କେଟ ହେଉଛି ଟେକ୍ସଟାଇଲ ହବ୍ । ଏଠାରେ ସବୁଠାରୁ ଭଲ କ୍ୱାଲିଟି କପଡ଼ା ଏବଂ ହୋଲାସେଲ ଜିନିଷ ପାଇଁ ଏହି ମାର୍କେଟ ଖୁବ ନାଁ କରିଛି । ସେହିପରି ମୋଚପୁରା ବଜାରରେ ପଶମ ସାମଗ୍ରୀ ଉପଲବ୍ଧ । ଗରମ ପୋଷାକ ପାଇଁ ଏହି ବଜାର ସାରା ଦେଶରେ ପ୍ରସିଦ୍ଧ । ଏପରି ପରିସ୍ଥିତିରେ, ଆପଣ ଏଠାରୁ ସ୍ୱେଟର୍ ଏବଂ ଜ୍ୟାକେଟ୍ ସହିତ ଅନେକ ପ୍ରକାରର ଉଷୁମ ପୋଷାକ କିଣି ପାରିବେ । ଏହା ବ୍ୟତୀତ, ଡାଲ୍ ବଜାର ମଧ୍ୟ ଶୀତବସ୍ତ୍ର ପାଇଁ ଏକ ବଡ଼ ବଜାର, ଯେଉଁଠାରୁ ଶସ୍ତାରେ ଜିନିଷ କିଣିପାରିବେ ଗ୍ରାହକ ।