ଖାନ୍ ସାରଙ୍କ ବଡ଼ ବୟାନ; ‘ଆମେ ତୁମର ଗାଜା ଭଳି ଅବସ୍ଥା କରିଦେବୁ’
ଓଡ଼ିଶା ଭାସ୍କର: ଇସ୍ରାଏଲ-ହମାସ ଯୁଦ୍ଧକୁ ନେଇ ସାରା ବିଶ୍ୱରୁ ଭିନ୍ନ ଭିନ୍ନ ପ୍ରତିକ୍ରିୟା ଆସୁଛି । ଇସ୍ରାଏଲ-ପାଲେଷ୍ଟାଇନକୁ ନେଇ ଖାନ୍ ସାର୍ ତିଆରି କରିଥିବା ଏକ ଭିଡିଓକୁ ନେଇ ଏବେ ଚର୍ଚ୍ଚା ଜୋର ଧରିଛି । ପାଟନାର ଚର୍ଚ୍ଚିତ ଶିକ୍ଷକ ଖାନ୍ ସାର୍ ଯିଏ ଶିକ୍ଷାଗତ ଏବଂ ପ୍ରେରଣାଦାୟକ ଭିଡିଓ ମାଧ୍ୟମରେ ସୋସିଆଲ ମିଡିଆରେ ଛାତ୍ରଛାତ୍ରୀଙ୍କୁ ଶିକ୍ଷା ଦିଅନ୍ତି, ତାଙ୍କୁ ଅନେକ ଛାତ୍ରଛାତ୍ରୀ ଅନୁସରଣ କରନ୍ତି । ବର୍ତ୍ତମାନ ଖାନ୍ ସାରଙ୍କ ଗୋଟେ କଥା ପୁରା ଚର୍ଚ୍ଚାର ବିଷୟ ପାଲଟିଛି । ଖାନ ସାର ତାଙ୍କ ୟୁଟ୍ୟୁବ୍ ଚ୍ୟାନେଲ ମାଧ୍ୟମରେ କହିଛନ୍ତି ଯେ ଆମେ ଆପଣଙ୍କ ସ୍ଥିତିକୁ ଗାଜା ଭଳି କରିବୁ।
ସୋସିଆଲ ମିଡିଆରେ ଏଇ ଗୋଟିଏ କମେଣ୍ଟକୁ ନେଇ ବଡ଼ ଧରଣର ଚର୍ଚ୍ଚା ହେଉଛି । ସତ କଥା ହେଉଛି ଆଗରୁ ଖାନ୍ ସାର୍ ପାଲେଷ୍ଟାଇନ୍ ଓ ଇସ୍ରାଏଲକୁ ନେଇ ଏକ ଭିଡିଓ ପ୍ରସ୍ତୁତ କରିଥିଲେ। ଏହି ଭିଡିଓ ଟି ୟୁଟ୍ୟୁବରେ ଖୁବ ଭାଇରାଲ ହେବାରେ ଲାଗିଛି । ଏହି ଭିଡିଓଉପରେ କମେଣ୍ଟ କରି ଜଣେ ୟୁଜର ଲେଖିଛନ୍ତି ଯେ ଖାନ୍ ସାର୍ ଆମେ ନେପାଳର। ଆମେ ମଧ୍ୟ ଆମର କଳାପାଣି, ଲିପୁଲେଖ ଏବଂ ଲିମ୍ପିଆଧୁରା ଚାହୁଁଛୁ । ନଚେତ୍ ଆମେ ଗାଜା ଭଳି ଆପଣଙ୍କ ବିହାରରେ ମଧ୍ୟ ରକେଟ୍ ମାଡ଼ କରିବୁ। ଜବାବରେ ଖାନ୍ ସାରଙ୍କ ୟୁଟ୍ୟୁବ୍ ଚ୍ୟାନେଲରୁ ଏକ ମନ୍ତବ୍ୟ ଦିଆଯାଇଥିଲା ଯେ ଆମେ ଗାଜା ଭଳି ଆପଣଙ୍କ ଅବସ୍ଥା କରିବୁ।
ତା’ପରେ ଆପଣମାନେ ନେପାଳରେ ବାଜା ବଜେଇବେ। ଏହା ପ୍ରଥମ ଥର ନୁହେଁ ଯେ ଖାନ୍ ସାର୍ଙ୍କ ବୟାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହା ପୂର୍ବରୁ ଖାନ ସାରଙ୍କ ବିବାଦ ସହ ପୁରୁଣା ସମ୍ପର୍କ ରହିଥିଲା। ଏହା ପୂର୍ବରୁ ଖାନ୍ ସାର୍ ପିଲାମାନଙ୍କୁ ହିନ୍ଦୀ ବ୍ୟାକରଣ ଶିଖାଉଥିବା ବେଳେ ସୁରେଶ ଓ ଅବଦୁଲ ନାମକ ଦୁଇଟି କାଳ୍ପନିକ ଚରିତ୍ରକୁ ଆପଣାଇ ବିବାଦଘେରକୁ ଆସିଥିଲେ। ଖାନ ସାର୍ ତାଙ୍କ ଭିଡିଓରେ କହିଥିଲେ ଯେ ସୁରେଶ ଜାହାଜ ଉଡାଇଥିଲେ ଏବଂ ଅବଦୁଲ ଜାହାଜ ଉଡାଇଥିଲେ, ଏହି ଦୁଇଟି ଜିନିଷର ଅର୍ଥ ଅଲଗା ହୋଇପାରେ । ତାଙ୍କ ବୟାନକୁ ନେଇ ବିବାଦ ଏତେ ବଢିଯାଇଥିଲା ଯେ ତାଙ୍କୁ ଗିରଫ କରିବା ପାଇଁ ଦାବି ଉଠିଥିଲା ।
