ଉତ୍ତର କୋରିଆରେ ଲକଡାଉନ ଲଗାଇଲେ କିମ୍ ଜୋଙ୍ଗ ଉନ୍, ଜାଣନ୍ତୁ କ’ଣ କାରଣ…

ଦେଶରେ ପ୍ରଥମ କରୋନା ଭାଇରାସ ସଂକ୍ରମଣ ମାମଲା ଦେଖାଯିବା ପରେ ଉତ୍ତର କୋରିଆର ଏକଛତ୍ରବାଦୀ ଶାସକ କିମ ଜୋଙ୍ଗ ଉନ ଦେଶବ୍ୟାପୀ ଲକଡାଉନ ଲଗାଇଛନ୍ତି । କିମ୍ ଏହାକୁ ରାଷ୍ଟ୍ରୀୟ ଇମରଜେନ୍ସୀ କହିଛନ୍ତି । ଉତ୍ତର କୋରିଆର ଏକଛତ୍ରବାଦୀ ଶାସକ କରୋନା ସଂକ୍ରମଣ ବ୍ୟାପିବା ପୂର୍ବରୁ ଏହାକୁ ରୋକିବା ପାଇଁ ଅଧିକାରୀଙ୍କୁ କଠୋର ନିୟମ ଲାଗୁକରିବାକୁ ନିର୍ଦ୍ଦେଶ ଦେଇଛନ୍ତି । କରୋନା ମହାମାରୀର ପ୍ରାରମ୍ଭିକ ଦୁଇ ବର୍ଷ ପରେ ପ୍ୟୋଙ୍ଗୟାଙ୍ଗ ରେ ପ୍ରଥମ କରୋନା ସଂକ୍ରମିତ ଦେଖାଯାଇଛି । ଫଳରେ କରୋନାକୁ ନେଇ କଠୋର ନିୟମ ଘୋଷଣା କରାଯାଇଛି ।

କୋରିଆନ ସେଣ୍ଟ୍ରାଲ ନ୍ୟୁଜ ଏଜେନ୍ସୀ କହିଛି ଯେ ଗୁରୁବାର ରାଜଧାନୀ ପ୍ୟୋଙ୍ଗୟାଙ୍ଗରେ କିଛି ଲୋକଙ୍କର କୋଭିଡ ଟେଷ୍ଟ ହୋଇଥିଲା, ଯେଉଁଥିରେ ଜଣେ କରୋନା ଓମିକ୍ରନ ଭାରିଆଣ୍ଟରେ ସଂକ୍ରମିତ ଚିହ୍ନଟ ହୋଇଥିଲେ । ରୋଗୀଙ୍କୁ ଆଇସୋଲେଟ କରାଯାଇଛି । ଏହା ସହ ସମସ୍ତ ସତର୍କତାମୂଳକ ପଦକ୍ଷେପ ନିଆଯାଉଛି । ଅନିଶ୍ଚିତକାଳ ପର୍ଯ୍ୟନ୍ତ ଲକଡାଉନ ଲଗାଯାଇଛି । ଏଜେନ୍ସୀ କହିଛି ଯେ କରୋନା ମାମଲା ସାମ୍ନାକୁ ଆସିବା ପରେ କିମ ଜୋଙ୍ଗ ଉନ ଏକ ବୈଠକ ଡକାଇଥିଲେ ଏବଂ କରୋନାର ଆଣ୍ଟି ଭାଇରସ ଉପାୟକୁ ବଢ଼ାଇବା ପାଇଁ ନିଷ୍ପତ୍ତି ନେଇଥିଲେ । ଏହି ମିଟିଂ ସମୟରେ କିମ ଜୋଙ୍ଗ ଉନ ଅଧିକାରୀଙ୍କୁ କରୋନା ସଂକ୍ରମଣ ସ୍ଥିର କରିବା ଏବଂ ସଂକ୍ରମଣ ସ୍ରୋତକୁ ଶେଷ କରିବାକୁ ଆଦେଶ ଦେଇଛନ୍ତି ।

ଉଲ୍ଲେଖଯୋଗ୍ୟ, ମହାମାରୀର ଆରମ୍ଭରୁ ଯେତେବେଳେ ସବୁ ଦେଶ କରୋନା ଭାଇରସ ସହ ଜୁଝୁଥିଲେ, ସେତେବେଳେ ଉତ୍ତର କୋରିଆ ନିଜ ଦେଶରେ ଜିରୋ କୋଭିଡ ମାମଲାର ତଥ୍ୟ ଦେଇଥିଲା । କରୋନା ଭାଇରସକୁ ରୋକିବା ପାଇଁ ଊତ୍ତର କୋରିଆ ଅନେକ ପ୍ରତିବନ୍ଧକ ଲଗାଇଥିଲା । ଆଉ ପ୍ରତିବନ୍ଧକ ଯୋଗୁଁ ସେଠାରେ ଖାଦ୍ୟାଭାବ ନେଇ ମଧ୍ୟ ଖବର ଆସିଥିଲା । ଜାନୁଆରୀ ୨୦୨୦ ରେ ଉତ୍ତର କୋରିଆ ଚୀନ ସହ ସଂଲଗ୍ନ ନିଜର ସବୁ ସୀମାକୁ ପ୍ରାୟ ୨ ବର୍ଷ ପର୍ଯ୍ୟନ୍ତ ବନ୍ଦ ରଖିଥିଲା ।