ଚମକିଲେ ରାହୁଲ: ଦମଦାର ବିଜୟ ସହ ସିଜିନ ଶେଷ କଲା ପଞ୍ଜାବ

ନୂଆଦିଲ୍ଲୀ: ଅଧିନାୟକ କେ ଏଲ୍ ରାହୁଲଙ୍କ ଧୂଆଁଧାର ୯୮ ରନ ବଳରେ ଚେନ୍ନାଇ ସୁପର କିଙ୍ଗସ ବିପକ୍ଷରେ ଦମଦାର ବିଜୟ ହାସଲ କରିଛି ପଞ୍ଜାବ କିଙ୍ଗସ୍ । ଏହି ବିଜୟ ସହିତ ପଞ୍ଜାବର ପ୍ଲେଅଫ୍ ଆଶା ମଧ୍ୟ ଉଜ୍ଜୀବିତ ରହିଛି । ପଞ୍ଜାବ ୧୨ ପଏଣ୍ଟ ହାସଲ କରିଥିବା ବେଳେ ରାଜସ୍ଥାନ ଓ ହାଇଦ୍ରାବାଦ ବିଜୟ ଉପରେ ଦଳର ପ୍ଲେ ଅଫ ଯୋଗ୍ୟତା ନିର୍ଭର କରୁଛି । ମାତ୍ର ୧୩୫ ରନର ପିଛା କରୁଥିବା ପଞ୍ଜାବ ୧୩ ଓଭରରେ ୪ ୱିକେଟ ହରାଇ୧୩୯ ରନ ସଂଗ୍ରହ କରିଥିଲା । କେ ଏଲ ରାହୁଲ ମାତ୍ର ୪୨ ବଲ ଖେଳି ୯୮ ରନ୍ ସଂଗ୍ରହ କରିଥିବା ବେଳେ ଏଡେନ ମାର୍କରାମ(୧୩) ଓ ମୟଙ୍କ ଅଗ୍ରୱାଲ(୧୨) ରନ ସଂଗ୍ରହ କରିଥିଲେ । ରାହୁଲଙ୍କ ଇନିଂସରେ ୭ଟି ଚୌକା ଓ ୮ଟି ବିଶାଳ ଛକା ସାମିଲ ରହିଥିଲା । ଚେନ୍ନାଇ ପକ୍ଷରୁ ଶାର୍ଦ୍ଦୁଲ ଠାକୁର ୨୮ ରନ ବ୍ୟୟରେ ୩ଟି ୱିକେଟ ଅକ୍ତିଆର କରିଥିବା ବେଳେ ଦୀପକ ଚହର ଗୋଟିଏ ୱିକେଟ ନେଇଥିଲେ ।
ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଚେନ୍ନାଇ ପକ୍ଷରୁ ଦୁଇ ଓପ୍ନର ଦ୍ରୁତ ଗତିରେ ରନ ସଂଗ୍ରହରେ ବିଫଳ ହୋଇଥିଲେ । ଦଳୀୟ ସ୍କୋର ୧୮ରେ ଋତୁରାଜ ଗାଏକ୍ୱାଡ ଆଉଟ ହୋଇଥିଲେ । ମୋଇନ ଅଲୀ(୦), ରବିନ ଉତ୍ଥାପା(୨) ଓ ଅମ୍ବାତି ରାୟୁଡୁ(୪) ବିଫଳ ହୋଇଥିଲେ । ମହେନ୍ଦ୍ର ସିଂ ଧୋନୀ(୧୨) ଓ ରବୀନ୍ଦ୍ର ଜାଡେଜା(୧୫) ଙ୍କ ବ୍ୟାଟ ମଧ୍ୟ ନୀରବ ରହିଥିଲା । ଗୋଟିଏ ପଟୁ ପ୍ରାଚୀର ଭଳି ଖେଳି ଡୁପ୍ଲେସିସ ୭୬ ରନ ସଂଗ୍ରହ କରିବା ସହିତ ଦଳକୁ ଏକ ସମ୍ମାନଜନକ ସ୍କୋର ପ୍ରଦାନ କରିଥିଲେ । କ୍ରିସ ଜୋର୍ଡାନ ଓ ଅର୍ଶଦୀପ ସିଂ ଦୁଇଟି ଲେଖାଏଁ ୱିକେଟ ଅକ୍ତିଆର କରିଥିବା ବେଳେ ମହମ୍ମଦ ଶାମି ଓ ରବି ବିଷ୍ଣୋଇ ଗୋଟିଏ ଲେଖାଏଁ ୱିକେଟ ନେଇଥିଲେ ।