ମହିଳାଙ୍କ ମାପ ନେଇ ପାରିବେ ନାହିଁ ପୁରୁଷ… Womens’ Safety ଦିଗରେ ସରକାରଙ୍କ ବଡ଼ ପଦକ୍ଷେପ, ଆସିବ ପରିବର୍ତ୍ତନ!
ନୂଆଦିଲ୍ଲୀ: ମହିଳାଙ୍କ ପ୍ରତି ବୃଦ୍ଧି ପାଉଥିବା ଅପରାଧକୁ ରୋକିବା ପାଇଁ ଏକ ବଡ଼ ପଦକ୍ଷେପ ନିଆଯାଇଛି । କପଡ଼ା ସିଲେଇ କରିବା ସମୟରେ ପୁରୁଷ ଦରଜୀଙ୍କୁ ମହିଳାଙ୍କ ମାପ ନେବା ଉପରେ ରୋକ ଲଗାଯାଇଛି । ମହିଳାଙ୍କ ସୁରକ୍ଷାକୁ ଦୃଷ୍ଟିରେ ରଖି ରାଜ୍ୟର ମହିଳା ଆୟୋଗ ଏଭଳି ଏକ ବଡ଼ ନିଷ୍ପତ୍ତି ନେଇଛନ୍ତି । ମହିଳାଙ୍କ ମାପ ନେବା ପାଇଁ ଦୋକାନରେ ମହିଳା କର୍ମଚାରୀ ରଖିବା ବାଧ୍ୟତାମୂଳକ । ସେହିପରି ବିଭିନ୍ନ ସ୍ଥାନରେ ମହିଳାଙ୍କ ଶରୀରରୁ ପୁରୁଷଙ୍କୁ ଦୂରେଇ ରଖିବାକୁ ଚେଷ୍ଟା କରାଯାଇଛି । ଅନେକ ସ୍ଥାନରେ ମହିଳାଙ୍କ ପ୍ରତି ବିଭିନ୍ନ ବାହାନା କରି ସ୍ପର୍ଶ କରୁଥିବା ପୁରୁଷଙ୍କ କାର୍ଯ୍ୟକଳାପ ଉପରେ ରୋକ ଲାଗିପାରିବ ।
ମହିଳାଙ୍କ ସୁରକ୍ଷା କ୍ଷେତ୍ରରେ ସୁଧାର ଆଣିବା ପାଇଁ ଅନେକ ପ୍ରସ୍ତାବ ଆଣିଛନ୍ତି ଉତ୍ତରପ୍ରଦେଶ ରାଜ୍ୟ ମହିଳା ଆୟୋଗ । ସ୍କୁଲ ବସରେ ମହିଳା ସୁରକ୍ଷା କର୍ମୀ ନିୟୋଜିତ କରିବା ସହ ମହିଳାଙ୍କ ବସ୍ତ୍ର ଦୋକାନରେ ମହିଳା କର୍ମଚାରୀଙ୍କୁ ନିଯୁକ୍ତ କରିବାକୁ ପ୍ରସ୍ତାବ ଦିଆଯାଇଛି । ଏହାବ୍ୟତୀତ ପୁରୁଷ ଦରଜୀ ପୋଷାକ ସିଲେଇ ପାଇଁ ମହିଳାଙ୍କ ମାପ ନେବା ଉପରେ ରୋକ ଲଗାଇବାକୁ ପ୍ରସ୍ତାବ ଦିଆଯାଇଛି । ସେହିପରି ଜିମ ତଥା ଯୋଗର ପ୍ରଶିକ୍ଷଣ ପାଇଁ ପୁରୁଷ ଟ୍ରେନରଙ୍କୁ ମନା କରାଯିବ ବୋଲି ପ୍ରସ୍ତାବରେ ଉଲ୍ଲେଖ କରାଯାଇଛି ।
ମହିଳାଙ୍କ ସୁରକ୍ଷାକୁ ନେଇ ଆୟୋଗର ପ୍ରସ୍ତାବ:
- ସ୍କୁଲ ବସ୍ରେ ମହିଳା ସୁରକ୍ଷା କର୍ମୀଙ୍କୁ ନିୟୋଜିତ କରିବା: ପିଲାମାନଙ୍କର ସୁରକ୍ଷା ତଥା ମହିଳାଙ୍କ ପ୍ରତି ସମ୍ମାନ ରକ୍ଷା କରିବା ପାଇଁ ସ୍କୁଲ ବସ୍ରେ ମହିଳା ସୁରକ୍ଷା କର୍ମୀ କିମ୍ବା ଶିକ୍ଷକ ନିୟୋଜିତ କରିବାକୁ ପରାମର୍ଶ ଦିଆଯାଇଛି।
- ମହିଳା କର୍ମଚାରୀଙ୍କ ନିଯୁକ୍ତି: ମହିଳାମାନଙ୍କ ସୁବିଧା ପାଇଁ ମହିଳା ପୋଷାକ ଦୋକାନରେ ମହିଳା କର୍ମଚାରୀ ନିଯୁକ୍ତ କରିବାକୁ କୁହାଯାଇଛି। ଏହା ଦୋକାନରେ ମହିଳାମାନଙ୍କୁ ଅଧିକ ସୁବିଧା ଯୋଗାଇବ ।
- ପୁରୁଷ ଟେଲରଙ୍କ ଉପରେ ପ୍ରତିବନ୍ଧକ: ମହିଳାଙ୍କ ମାପ ନେବାରେ ପୁରୁଷ ଟେଲରଙ୍କ ଅଂଶଗ୍ରହଣ ଉପରେ ପ୍ରତିବନ୍ଧକ ଲଗାଇବାକୁ ପରାମର୍ଶ ଦିଆଯାଇଛି, ଯାହା ଦ୍ୱାରା ମହିଳାମାନେ ଅଧିକ ନିରାପଦ ଅନୁଭବ କରିପାରିବେ।
- ମହିଳା ପ୍ରଶିକ୍ଷକଙ୍କ ବାଧ୍ୟତାମୂଳକ ଉପଲବ୍ଧତା: କେବଳ ମହିଳା ଜିମ୍, ଯୋଗ କେନ୍ଦ୍ର ଏବଂ ନୃତ୍ୟ ପ୍ରତିଷ୍ଠାନରେ ମହିଳା ପ୍ରଶିକ୍ଷକ ନିଯୁକ୍ତ କରିବାକୁ ପରାମର୍ଶ ଦିଆଯାଇଛି। ଏହା ମହିଳା ସଦସ୍ୟମାନଙ୍କୁ ଏକ ଅଧିକ ନିରାପଦ ଏବଂ ଆରାମଦାୟକ ପରିବେଶ ଯୋଗାଇବ ।
- ସିସିଟିଭି କ୍ୟାମେରା ମନିଟରିଂ: ମହିଳାଙ୍କ ସୁରକ୍ଷା ନିଶ୍ଚିତ କରିବାକୁ ସର୍ବସାଧାରଣ ସ୍ଥାନ, ଦୋକାନ ଏବଂ କୋଚିଂ ସେଣ୍ଟରରେ ସିସିଟିଭି କ୍ୟାମେରା ମନିଟରିଂ ବାଧ୍ୟତାମୂଳକ କରାଯିବ।
