ଛାତିଥରା ଦୁର୍ଘଟଣା..ବସକୁ ଧକ୍କା ଦେଲା ମିନି ଭ୍ୟାନ୍, ଚୁନା ହୋଇଗଲା ଗାଡି-ଲିଭିଗଲା 9ଜଣଙ୍କ ଜୀବନ ଦୀପ

ନୂଆଦିଲ୍ଲୀ: ପୁଣେରେ ଭୟଙ୍କର ସଡକ ଦୁର୍ଘଟଣା । ଏକ ଛିଡା ହୋଇଥିବା ବସକୁ ଧକ୍କା ଦେଇଥିଲା ମିନିଭ୍ୟାନ୍ । ଆଜି ସକାଳୁ ପୁନେ-ନାସିକ ହାଇଓ୍ବେରେ ଏହି ଦୁର୍ଘଟଣା ଘଟିଥିବା ବେଳେ ଏଥିରେ 9ଜଣ ପ୍ରାଣ ହରାଇଛନ୍ତି । ଏନେଇ ପୋଲିସ ପକ୍ଷରୁ ସୂଚନା ଦିଆଯାଇଛି ।

କିଭଳି ହେଲା ଦୁର୍ଘଟଣା- ମିଳିଥିବା ସୂଚନା ଅନୁସାରେ, ଆଜି ସକାଳ 10ଟା ସମୟରେ ନାରାୟଣଗାଓଁ ନିକଟରେ ଏହି ଦୁର୍ଘଟଣା ହୋଇଛି । ମିନିଭ୍ୟାନଟି ନାରାୟଣଗାଓଁ ଅଭିମୁଖେ ଯାଉଥିବା ବେଳେ ପଛରୁ ଏକ ଟେମ୍ପୋ ଧକ୍କା ଦେଇଥିଲା ।

ଫଳରେ ଭ୍ୟାନଟି ଭାରସାମ୍ୟ ହରାଇ ରାସ୍ତାକଡ଼ରେ ଛିଡା ହୋଇଥିବା ବସକୁ ଧକ୍କା ଦେଇଥିଲା । ଫଳରେ ମିନିଭ୍ୟାନରେ ରହିଥିବା ସମସ୍ତ 9ଜଣଙ୍କର ମୃତ୍ୟୁ ହୋଇଛି ।

ଚୁନା ହୋଇଯାଇଛି ଭ୍ୟାନ:  ତେବେ ଦୁର୍ଘଟଣା ଏତେ ଭୟଙ୍କର ରହିଥିଲା ଯେ, ମିନିଭ୍ୟାନ ସମ୍ପୁର୍ଣ୍ଣ ଗୁଣ୍ଡ ହୋଇଯାଇଛି । ଦୁର୍ଘଟଣା ସମୟରେ କାରର ବେଗ ଅଧିକ ରହିଥିବା କାରଣରୁ ଦୁର୍ଘଟଣା ଭୟଙ୍କର ହୋଇଥିବା ଆଶଙ୍କା କରାଯାଇଛି ।

କିନ୍ତୁ କେଉଁ ପରିସ୍ଥିତିରେ ଏଭଳି ଦୁର୍ଘଟଣା ଘଟିଲା ସେନେଇ ପୋଲିସ ପକ୍ଷରୁ କୌଣସି ଘୋଷଣା କରାଯାଇ ନାହିଁ । ପୋଲିସ ଘଟଣାସ୍ଥଳରେ ପହଞ୍ଚି ସମସ୍ତ ଦିଗକୁ ନଜରକୁ ନେଇ ତଦନ୍ତ ଆରମ୍ଭ କରିଛି ।