ଓଡ଼ିଆ ଅଭିନେତ୍ରୀ ମୌସୁମୀ ନାୟକ ଗିରଫ: କୋର୍ଟ ଚାଲାଣ କଲା ଇନଫୋସିଟି ଥାନା ପୋଲିସ

ଭୁବନେଶ୍ୱର: ଅଭିନେତ୍ରୀ ମୌସୁମୀ ନାୟକ ଗିରଫ ହେବା ଖବର ସାମ୍ନାକୁ ଆସିଛି । ତେବେ ଅଭିନେତ୍ରୀ ମୌସୁମୀଙ୍କୁ ଇନଫୋସିଟି ଥାନା ପୋଲିସ ଗିରଫ କରିଛି । ଲେଖିକା ବନସ୍ମିତା ପତିଙ୍କ ଅଭିଯୋଗ ଆଧାରରେ ଗିରଫ କରାଯାଇଛି । ଗିରଫ ପରେ ମୌସୁମୀଙ୍କୁ କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି । ଏହି ବିବାଦ ପଛରେ ୫ ଲକ୍ଷ ୮୦ ହଜାର ଟଙ୍କାର କାରବାର ହୋଇଥିବା କୁହାଯାଉଛି ।

ସୂଚନାଯୋଗ୍ୟ ଯେ, ନିମ୍ନୋକ୍ତ ଅଭିଯୁକ୍ତ ଜଣକ ତାଙ୍କୁ ଏବଂ ତାଙ୍କ ପରିବାରକୁ ସର୍ବସାଧାରଣରେ ଅପମାନିତ କରିବା ଭଳି ଶବ୍ଦ ପ୍ରୟୋଗ କରିବା ସହିତ ତାଙ୍କୁ ହତ୍ୟା କରିବା ତଥା ତାଙ୍କଠାରୁ ଟଙ୍କା ଲୁଟିବା ଉଦ୍ଦେଶ୍ୟରେ ନାନାପ୍ରକାର ଧମକ ଦେଉଥିବା ନେଇ ଅଭିଯୋଗକାରିଣୀ ଜଣକ ଥାନାରେ ଅଭିଯୋଗ କରିଥିଲେ । ଗତ ଛଅ ମାସ ପୂର୍ବରୁ ଅଭିଯୁକ୍ତ ଜଣକ ୫.୦୮ ଲକ୍ଷ ଟଙ୍କା ବିନିଯୋଗ କରିଥିଲେ ଏବଂ ତା’ପରେ ସେ ସମାନ ପରିମାଣର ଟଙ୍କା ମଧ୍ୟ ଫେରସ୍ତ ନେଇଥିଲେ । ଏହା ପରେ ମଧ୍ୟ ଅଭିଯୁକ୍ତ ଜଣକ ତାଙ୍କଠାରୁ ଅଧିକ ଟଙ୍କା ଲୁଟିବାକୁ ଧମକ ଦେବା ଆରମ୍ଭ କରିଥିଲେ ଏବଂ ଯଦି ଟଙ୍କା ନ ଦିଆଯାଏ ତେବେ ସେ ତାଙ୍କୁ ସର୍ବସମୁଖରେ ବଦନାମ କରିବେ ବୋଲି ଧମକ ଦେଇଥିଲେ । ଘଟଣାର ଅଭିଯୋଗ ପରେ ମାମଲାର ତଦନ୍ତ ସମୟରେ ଅଭିଯୁକ୍ତ ଜଣକ ଆଗକୁ ଏପରି କୌଣସି କାର୍ଯ୍ୟ ନକରିବା ଲାଗି ପ୍ରତିଶୃତି ଦେଇଥିଲେ ମଧ୍ୟ ପରବର୍ତ୍ତୀ ସମୟରେ ଚନ୍ଦକା ଥାନା ଯାଇ ଅଭିଯୋଗକାରିଣୀଙ୍କ ବିରୋଧରେ ଏକ ମିଥ୍ୟା ମାମଲା ରୁଜୁ କରିବା ସହିତ ଗଣମାଧ୍ୟମ ଆଗରେ ତାଙ୍କ ବିରୋଧରେ ଓ ତାଙ୍କ ପରିବାର ବିରୋଧରେ ଟିପଣି ଦେଇଥିଲେ ।

ତେବେ ସେହିଦିନ ଠାରୁ ଅଭିଯୁକ୍ତ ଜଣକ ତାଙ୍କୁ ଓ ତାଙ୍କ ପରିବାର ସଦସ୍ୟଙ୍କୁ ଜୀବନରୁ ମାରିଦେବା ଲାଗି ଧମକ ଦେବା ଆରମ୍ଭ କରିଥିଲେ । ତାଙ୍କୁ ଏକ ଗାଡି ନିୟମିତ ଭାବେ ପିଛା କରିବା ସହିତ ଧମକ ପୂର୍ଣ୍ଣ ମେସେଜ ସବୁ ତାଙ୍କ ମୋବାଇଲକୁ ଆସୁଥିବା ନେଇ ଅଭିଯୋଗକାରିଣୀ ଜଣକ ଥାନାରେ ଅଭିଯୋଗ କରିଥିଲେ । ଇନଫୋସିଟି ଥାନା ପୁଲିସ ଏହି ମାମଲାର ତଦନ୍ତ କରିବା ସହିତ ନିମ୍ନୋକ୍ତ ଅଭିଯୁକ୍ତଙ୍କୁ ଗିରଫ କରିଥିଲେ । ପଚରାଉଚରା ବେଳେ ଅଭିଯୁକ୍ତ ଜଣକ ନିଜର ଦୋଷ ସ୍ଵୀକାର କରିଥିଲେ । ବର୍ତ୍ତମାନ ଏହି ମାମଲାର ଅଧିକ ତଦନ୍ତ ଚାଲୁ ରହିଛି ।