ଜବତ ହୋଇଥିବା ହାତୀ କଙ୍କାଳର ହେବ ଡିଏନଏ ଟେଷ୍ଟ, ଆମେରିକାରୁ ଆସିଲା କିଟ୍
ଭୁବନେଶ୍ୱର(ଓଡ଼ିଶା ଭାସ୍କର): ରାଜ୍ୟରେ ଅନେକ ସମୟରେ ହାତୀ ମୃତ୍ୟୁକୁ ଅନେକ ବିବାଦ ଦେଖାଦେଇଛି । ଗୋଟିଏ ପଟେ ହାତୀକୁ ଗୁଳିକରି ଶିକାର କରାଯାଉଥିବାବେଳେ, ଅନ୍ୟପଟେ ହାତୀ କଙ୍କାଳ ମଧ୍ୟ ଉଦ୍ଧାର ହୋଇଛି । ଯାହାକୁ ନେଇ ରାଜନୀତି ମଧ୍ୟ ଜୋର୍ ଧରିଛି । ତେବେ ଏହାରି ମଧ୍ୟରେ ମିଳିଥିବା ହାତୀ କଙ୍କାଳ ଗୁଡ଼ିକର ଯାଞ୍ଚ ପାଇଁ ଆମେରିକାରୁ ସ୍ୱତନ୍ତ୍ର କିଟ୍ ପହଞ୍ଚିଛି ।
ଏହି କିଟ୍ ସାହାଯ୍ୟରେ ହାତୀ କଙ୍କାଳରୁ ଡିଏନଏ ସାମ୍ପୁଲ ନିଆଯାଇପାରିବ । ଯାହାଦ୍ୱାରା ଜଣାପଡ଼ିବ ଜବତ ହୋଇଥିବା କଙ୍କାଳ ମାଈ ହାତୀର କିମ୍ବା ଦନ୍ତା ହାତୀର । ଏହା ସହ ହାତୀ ମୃତ୍ୟୁର କାରଣ ଏବଂ ହାତୀର ବୟସ ମଧ୍ୟ ଜଣାପଡ଼ିବ ।
ନିକଟରେ ଆଠଗଡ଼, ସାତକୋଶିଆ, ସମ୍ବଲପୁର ଫରେଷ୍ଟ ଡିଭିଜନରୁ ହାତୀ କଙ୍କାଳ ଜବତ ହୋଇଥିଲା । ତେବେ ବର୍ତ୍ତମାନ କିଟ୍ ପହଞ୍ଚିବା ପରେ ଭୁବନେଶ୍ୱର ଓୟୁଏଟି ଠାରେ ନଷ୍ଟ କଙ୍କାଳରୁ ଲିଙ୍ଗ ନିରୂପଣ ପ୍ରକ୍ରିୟା ଆରମ୍ଭ ହୋଇଛି । ଓୟୁଏଟି ବନ୍ୟପ୍ରାଣୀ ସ୍ୱାସ୍ଥ୍ୟ କେନ୍ଦ୍ରର ସଂଯୋଜକଙ୍କ ସୂଚନା ।
