ଶୀତୁଆ ସକାଳକୁ ପଥ ଉତ୍ସବର ମଜା, ଜାଗମରାରେ ଲାଗିଛି ଦର୍ଶକଙ୍କ ଭିଡ଼: ପିଲାଙ୍କ ଚିତ୍ରାଙ୍କନ ମୁଖ୍ୟ ଆକର୍ଷଣ

ଭୁବନେଶ୍ୱର: ଆଜି ଭୁବନେଶ୍ୱରର ଜାଗମରାରେ ଆୟୋଜିତ ହୋଇଛି ପଥ ଉତ୍ସବ । ଶୀତୁଆ ସକାଳର ଥଣ୍ଡାକୁ ଭୁଲି ପଥ ଉତ୍ସବର ମଜା ନେଉଛନ୍ତି ରାଜଧାନୀବାସୀ ।

ନାଚ-ଗୀତ ଖେଳକୁଦର ଆସର ସାଙ୍ଗକୁ ବିଭିନ୍ନ ସାଂସ୍କୃତିକ ବେଶଭୁଷାରେ ସଜେଇ ହୋଇଛି ଜାଗମରା । ବିଶେଷ କରି ପ୍ରବାସୀ ଭାରତୀୟଙ୍କ ପାଇଁ ପୁନଃ ପଥ ଉତ୍ସବ ଆରମ୍ଭ କରିଛି ବିଏମସି ।

ଝୁମାଇବେ ଅସୀମା, ସତ୍ୟଜିତ: ଓଲିଉଡ ସିଙ୍ଗର ଅସୀମା ପଣ୍ଡା ଏବଂ ସତ୍ୟଜିତ ଆଜି ଷ୍ଟାର ସିଙ୍ଗର ଭାବରେ ଏହି ପଥ ଉତ୍ସବରେ ପହଞ୍ଚିଛନ୍ତି । ଉଭୟଙ୍କ ଗୀତରେ ଝୁମି ଉଠିଛି ଜାଗମରାର ପଥ ଉତ୍ସବ ।

ମନ ମୋହୁଛି ଚିତ୍ରାଙ୍କନ: ଜାଗମରା ପଥ ଉତ୍ସବରେ ଝୋଟି-ଚିତା ସାଙ୍ଗକୁ ନାଚ ଗୀତରେ ଝୁମୁଛନ୍ତି ଦର୍ଶକ । କିନ୍ତୁ ଏଠାରେ ‘ୟୁନିକ୍ ଆର୍ଟ ଆଣ୍ଡ କ୍ରାଫ୍ଟ’ ଷ୍ଟଲରେ ଅଧିକ ଜନଗହଳି ଦେଖିବାକୁ ମିଳିଛି । ଛୋଟ ପିଲାଙ୍କୁ ନେଇ ହେଉଥିବା ଚିତ୍ରାଙ୍କନ ସମସ୍ତଙ୍କୁ ଆକୃଷ୍ଟ କରିଛି ।

ଗତ ରବିବାର ମାଷ୍ଟରକ୍ୟାଣ୍ଟିନ-ରାମ ମନ୍ଦିର ରାସ୍ତାରେ ପଥ ଉତ୍ସବ ଆୟୋଜିତ ହୋଇଥିଲା । ଏହିଦିନ ମଧ୍ୟ ରଜଧାନୀର ବିଭିନ୍ନ କୋଣରୁ ଲୋକଙ୍କ ସମାଗମ ଦେଖିବାକୁ ମିଳିଥିଲା ।