ଅଚାନକ୍ ୩ ଗୁଣ ବୃଦ୍ଧି ପାଇଲା ପେଟ୍ରୋଲ ଦାମ୍, ଟାଙ୍କି ଭରିବାକୁ ଜାର୍ ଧରି ଦୌଡୁଛନ୍ତି ଲୋକ !

ନୂଆଦିଲ୍ଲୀ: ଆଫ୍ରିକା ମହାଦ୍ୱୀପର ଦେଶ ନାଇଜେରିଆରେ ପେଟ୍ରୋଲ ମୂଲ୍ୟରେ ହଠାତ୍ ତିନି ଗୁଣ ବୃଦ୍ଧି ହେତୁ ଆତଙ୍କ ଖେଳିଯାଇଥିଲା । ଏହି ଖବର ପାଇବା ମାତ୍ରେ ଟାଙ୍କି ଭରିବାକୁ ପେଟ୍ରୋଲ ପମ୍ପ ବାହାରେ ବହୁ ଲୋକ ଏକତ୍ରିତ ହୋଇଥିଲେ । ଏହା ପରେ ରାଜଧାନୀ ସମେତ ଅନେକ ସହରରେ ଜାମ ହେବାର ଖବର ଆସିଥିଲା । ଏହି ସମୟରେ ପେଟ୍ରୋଲ ପମ୍ପ ବାହାରେ ଯାନବାହାନର ଲମ୍ବା ଧାଡି ଦେଖିବାକୁ ମିଳିଥିଲା । ଏହି ଅବସ୍ଥା କୌଣସି ସହରରେ ନୁହେଁ ବରଂ ସମଗ୍ର ଦେଶରେ ଥିଲା କାରଣ ନାଇଜେରିଆର ନୂଆ ରାଷ୍ଟ୍ରପତି ଦେଶର ଅର୍ଥନୀତିକୁ ପରିଚାଳନା କରିବା ପାଇଁ ପେଟ୍ରୋଲ ଉପରେ ସବସିଡି ସମାପ୍ତ କରିଛନ୍ତି । ପେଟ୍ରୋଲରେ ଦିଆଯାଇଥିବା ସବସିଡିର ବ୍ୟବହାର ଶିକ୍ଷା, ସ୍ୱାସ୍ଥ୍ୟସେବା ଏବଂ ରୋଜଗାର ପାଇଁ ସରକାର ବ୍ୟବହାର କରିବେ ।

ସରକାରୀ ବିବୃତ୍ତି :-
‘ସିଏନଏନ୍’ର ରିପୋର୍ଟ ଅନୁଯାୟୀ ଦେଶର ସରକାରୀ କମ୍ପାନୀ ନାଇଜେରିଆ ନ୍ୟାସନାଲ ପେଟ୍ରୋଲିୟମ କର୍ପୋରେସନ (ଏନଏନପିସି) କହିଛନ୍ତି ଯେ, ଖୁଚୁରା ମୂଲ୍ୟରେ ପରିବର୍ତ୍ତନ କରାଯାଇଛି । ଏହି ସମୟରେ ଦେଶର ନୂଆ ରାଷ୍ଟ୍ରପତି ବୋଲା ଟିନୁବୁ ଶାନ୍ତି ବଜାୟ ରଖିବା ସହ ଭୟଭୀତ ନହେବାକୁ ନିବେଦନ କରିଛନ୍ତି ।
ଟିନୁବୁ କହିଛନ୍ତି ଯେ, ପରିସ୍ଥିତିକୁ ନିୟନ୍ତ୍ରଣ କରିବା ଏବଂ ଖନନ ଉପରେ ଭାର କମାଇବା ପାଇଁ ତାଙ୍କ ସରକାର ପେଟ୍ରୋଲ ଉପରେ ସବସିଡି ସମାପ୍ତ କରିଛନ୍ତି । ସେ ଏହା ମଧ୍ୟ କହିଛନ୍ତି ଯେ ଏହା ଏକ କଷ୍ଟକର ସମୟ, ତେଣୁ ଦେଶର ସ୍ୱାର୍ଥରେ ସମସ୍ତେ ସହଯୋଗ କରିବା ଉଚିତ୍ । ଶପଥ ଗ୍ରହଣ କରିବା ପରେ ତାଙ୍କର ପ୍ରଥମ ଭାଷଣରେ ଟିନୁବୁ କହିଥିଲେ ଯେ ପେଟ୍ରୋଲ ଏବଂ ଗ୍ୟାସ ଉପରେ ରିହାତିର ଯୁଗ ଶେଷ ହୋଇଛି । ସରକାର ବିଶ୍ୱାସ କରନ୍ତି ଯେ, ଏହି ନୂଆ ନିଷ୍ପତ୍ତି ସହିତ ଦେଶର କୋଟି କୋଟି ଲୋକଙ୍କ ଜୀବନଧାରଣରେ ଏକ ପରିବର୍ତ୍ତନ ଆସିବ ।