ପ୍ରିଜାଇଡିଂ ଅଫିସରଙ୍କ ହୃଦ୍ଘାତରେ ମୃତ୍ୟୁ, ମତଦାନ କାର୍ଯ୍ୟରେ ଯୋଗଦେବାକୁ ବାହାରିଥିବା ବେଳେ ଚାଲିଗଲା ଜୀବନ
ଆଠମଲ୍ଲିକ, (ଭାସ୍କର ନ୍ୟୁଜ୍): ତାଳଚେରରେ ହେବାକୁ ଥିବା ତ୍ରିସ୍ତରୀୟ ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟ ଭୋଟ୍ ଗ୍ରହଣ ପାଇଁ ଯାଉଥିବା ପ୍ରିଜାଇଡିଂ ଅଫିସର ଶୁଭେନ୍ଦୁ ନାୟକଙ୍କ ହୃଦ୍ଘାତରେ ମୃତ୍ୟୁ ହୋଇଛି । ଶୁଭେନ୍ଦୁଙ୍କ ଘର ଅନୁଗଳ ଜିଲ୍ଲା କିଶୋରନଗର ବ୍ଲକ କୁମୁରୁସିଙ୍ଗାରେ । ମୃତ୍ୟୁ ବେଳକୁ ତାଙ୍କୁ ୫୩ ବୟସ ହୋଇଥିଲା ।
ସୂଚନା ମୁତାବିକ, ଶ୍ରୀ ନାୟକ ରଜାମୁଣ୍ଡା ପ୍ରକଳ୍ପ ପ୍ରାଥମିକ ବିଦ୍ୟାଳୟର ପ୍ରଧାନଶିକ୍ଷକ ଭାବେ କାର୍ଯ୍ୟରତ ଥିଲେ । ପ୍ରିଜାଇଡିଂ ଅଫିସର ଭାବେ ମଙ୍ଗଳବାର ବଅଁରପାଳ ବ୍ଲକ୍ରେ ପୂର୍ବାହ୍ନ ୯ଟା ବେଳେ କାର୍ଯ୍ୟରେ ଯୋଗଦେବାର ରହିଥିଲା । ସେଥିପାଇଁ ସେ ରାତି ୪ଟାରୁ ବ୍ୟାଗ୍ ଧରି ଘରୁ ବାହାରିଥିଲେ । ଘରୁ ବାହାରିବା ସମୟରେ ଅଚାନକ ତାଙ୍କ ମୁହଁ ମୋଡ଼ି ହୋଇଯାଇଥିଲା । ପରେ ତାଙ୍କୁ କିଶୋରନଗର ମେଡିକାଲକୁ ଅଣାଯାଇଥିଲା । ତେବେ ସେଠାରେ ତାଙ୍କର ମୃତ୍ୟୁ ହୋଇଥିବା ଡାକ୍ତର ସୂଚନା ଦେଇଥିଲେ । ତାଙ୍କ ମୃତ୍ୟୁରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
