ଷଷ୍ଠରୁ ଦ୍ୱାଦଶ ଶ୍ରେଣୀର ଛାତ୍ରୀମାନଙ୍କୁ ପିନ୍ଧିବାକୁ ହେବ ଓଭରକୋଟ୍, ଏହି ରାଜ୍ୟରେ ଲାଗୁ ହେଲା ନୂଆ ନିୟମ

ନୂଆଦିଲ୍ଲୀ: ଏଣିକି ସରକାରୀ ସ୍କୁଲରେ ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଛାତ୍ରୀମାନଙ୍କୁ ଓଭରକୋଟ୍ ପିନ୍ଧିବାକୁ ପଡିବ । ପୁଡୁଚେରୀ ସରକାର ସ୍କୁଲରେ ‘ଓଭରକୋଟ୍’ ପିନ୍ଧିବା ପାଇଁ ଛାତ୍ରୀମାନଙ୍କୁ ନିର୍ଦ୍ଦେଶ ଜାରି କରିଛନ୍ତି । ପ୍ରାଥମିକ ଶିକ୍ଷା ଉପ ନିର୍ଦ୍ଦେଶକ ସି. ଗାଭାରି ଏକ ସର୍କୁଲାରରେ କହିଛନ୍ତି ଯେ ସରକାରୀ ସ୍କୁଲରେ ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଛାତ୍ରୀମାନଙ୍କ ପାଇଁ ଓଭରକୋଟ୍ ପିନ୍ଧିବା ପ୍ରସ୍ତାବକୁ ସ୍କୁଲ ଶିକ୍ଷା ନିର୍ଦ୍ଦେଶକ ଅନୁମୋଦନ କରିଛନ୍ତି ।

କଣ ଦିଆଯାଇଛି ନିର୍ଦ୍ଦେଶ- ଉପନିର୍ଦ୍ଦେଶକ ସି ଗାଭାରି ସର୍କୁଲାରରେ କହିଛନ୍ତି ଯେ ସମସ୍ତ ସ୍କୁଲ ଯାଞ୍ଚ ଅଧିକାରୀମାନଙ୍କୁ ସେମାନଙ୍କ ଅଧୀନରେ ଥିବା ଶିକ୍ଷାନୁଷ୍ଠାନର ମୁଖ୍ୟଙ୍କ ନିକଟକୁ ଛାତ୍ରୀମାନଙ୍କ ପାଇଁ ଓଭରକୋଟ୍ ଡିଜାଇନ୍ ପଠାଇବାକୁ ଏବଂ ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପଢ଼ୁଥିବା ଛାତ୍ରୀମାନଙ୍କୁ ଡିଜାଇନ୍ ଅନୁଯାୟୀ ଓଭରକୋଟ୍ ପିନ୍ଧିବାକୁ ନିର୍ଦ୍ଦେଶ ଦେବାକୁ କୁହାଯାଇଛି।

ଛାତ୍ରୀମାନଙ୍କ ସୁରକ୍ଷା ପାଇଁ ନିଷ୍ପତ୍ତି- ଏକ ସରକାରୀ ସୂତ୍ର କହିଛି ଯେ ଛାତ୍ରୀମାନଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ଓଭରକୋଟ୍ ପିନ୍ଧିବାକୁ ନିର୍ଦ୍ଦେଶ ଦେବାର ନିଷ୍ପତ୍ତି ନିଆଯାଇଛି । ତଥାପି, ଘରୋଇ ବିଦ୍ୟାଳୟର ଛାତ୍ରୀମାନଙ୍କ ସମ୍ପର୍କରେ ସରକାରଙ୍କ ପକ୍ଷରୁ ଏପର୍ଯ୍ୟନ୍ତ ଏପରି କୌଣସି ନିର୍ଦ୍ଦେଶ ଜାରି କରାଯାଇ ନାହିଁ ।

ଓଭରକୋଟ୍ କ’ଣ- ଓଭରକୋଟ୍ ହେଉଛି ଏକ ଲମ୍ବା ବାହ୍ୟ ପୋଷାକ, ସାଧାରଣତଃ ଆଣ୍ଠୁ ପର୍ଯ୍ୟନ୍ତ କିମ୍ବା ତା’ଠାରୁ ଅଧିକ । ଏହା ଜ୍ୟାକେଟ୍ ଅପେକ୍ଷା ଲମ୍ବା ଏବଂ ଭାରୀ। ଏହା ଥଣ୍ଡା, ବର୍ଷା ଏବଂ ପବନରୁ ରକ୍ଷା କରିବା ପାଇଁ ଡିଜାଇନ୍ କରାଯାଇଛି। ଓଭରକୋଟ୍ ବିଭିନ୍ନ ସାମଗ୍ରୀ ଯେପରିକି ପଶମ, କପା, ପଲିଷ୍ଟର, ନାଇଲନ୍ କିମ୍ବା ଜଳପ୍ରତିରୋଧୀ କପଡ଼ାରୁ ତିଆରି କରାଯାଏ।