ରିଆସି ଆତଙ୍କବାଦୀ ଆକ୍ରମଣର ପ୍ରତ୍ୟକ୍ଷଦର୍ଶୀ କହିଲେ ଛାତିଥରା କାହାଣୀ: ‘ବସ୍ ଘାଟିରେ ଖସିପଡ଼ିବା ପରେ ବି ଗୁଳି ଚାଲିଥିଲା, ମରିଗଲା ପରି ପଡ଼ିରହି…’

ନୂଆଦିଲ୍ଲୀ: ଜାମ୍ମୁ କାଶ୍ମୀରର ରିଆସିି ଜିଲ୍ଲା (ଜାମ୍ମୁ କାଶ୍ମୀର ଆତଙ୍କବାଦୀ ଆକ୍ରମଣ ବସ୍) ରେ ଏକ ଯାତ୍ରୀବାହୀ ବସ୍ ଉପରେ ହୋଇଥିବା ଆତଙ୍କବାଦୀ ଆକ୍ରମଣରେ ୧୦ ଜଣ ଭକ୍ତଙ୍କ ମୃତ୍ୟୁ ଘଟିଛି । ୩୩ ଜଣ ଆହତ ହୋଇଛନ୍ତି । ଏହି ଆକ୍ରମଣରେ ସମ୍ପୃକ୍ତ ଆତଙ୍କବାଦୀଙ୍କୁ ଖୋଜିବା ପାଇଁ ଭାରତୀୟ ସେନା ଏହି ଅଞ୍ଚଳରେ ବ୍ୟାପକ ସର୍ଚ୍ଚ ଅପରେସନ ଆରମ୍ଭ କରିଛି ।

ସୁରକ୍ଷା କର୍ମୀମାନେ ପ୍ରତ୍ୟେକ କୋଣ ଅନୁକୋଣକୁ ଯାଞ୍ଚ କରୁଛନ୍ତି । ଜଙ୍ଗଲ ଅଞ୍ଚଳରେ ସନ୍ଧାନ ପାଇଁ ଡ୍ରୋନ୍ ବ୍ୟବହାର କରାଯାଉଛି ।

ରିପୋର୍ଟ ଅନୁଯାୟୀ, ଏହି ଆକ୍ରମଣର ତଦନ୍ତ ପାଇଁ ଏନଆଇଏ ଟିମ୍ ମଧ୍ୟ ଜାମ୍ମୁରୁ ବାହାରିଛିି । ପ୍ରକାଶ ଯେ, ଏନଆଇଏର ଏସପି ସ୍ତରର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ କରିବେ । ଏନଆଇଏର ଫୋରେନସିକ୍ ଟିମ୍ ମଧ୍ୟ ଘଟଣାସ୍ଥଳରେ ଅନୁସନ୍ଧାନ କରିବ ।

ସୂତ୍ରରୁ ପ୍ରକାଶ ଯେ ଆତଙ୍କବାଦୀମାନେ ଘଟଣାସ୍ଥଳରୁ ପଳାୟନ କରିଛନ୍ତି ।

‘ସେମାନେ ୬ ରୁ ୭ ଜଣ ଥିଲେ’ ପ୍ରତ୍ୟକ୍ଷଦର୍ଶୀ :-

ବସ୍ରେ ଥିବା ଜଣେ ଯାତ୍ରୀ ଏହି ଆକ୍ରମଣ ସମ୍ପର୍କରେ ସୂଚନା ଦେଇଛନ୍ତି । ସେ କହିଛନ୍ତି ଯେ, ‘ସେଠାରେ ୬-୭ ଆତଙ୍କବାଦୀ ଥିଲେ ଏବଂ ସେମାନଙ୍କ ମୁହଁରେ ମାସ୍କ ଥିଲା । ପ୍ରଥମେ ସେମାନେ ରାସ୍ତାର ଚାରିପାଖରୁ ବସକୁ ଘେରିଯାଇ ଗୁଳି ଚଳାଇଥିଲେ । ଯେତେବେଳେ ବସଟି ଖାଲରେ ପଡ଼ିଲା, ସେତେବେଳେ ସେମାନେ ବସ୍ ଆଡକୁ ଓହ୍ଲାଇ ସମସ୍ତ ଲୋକଙ୍କୁ ହତ୍ୟା କରିବା ଉଦ୍ଦେଶ୍ୟରେ ଗୁଳି ଚଳାଇଥିଲେ । ଆମେ ସମସ୍ତେ ଚୁପ୍ ରହିଲୁ ଯେପରି ସମସ୍ତେ ମରିଗଲେ ବୋଲି ସେମାନେ ଅନୁଭବ କରିବେ ।

ସେ ପୁଣି କହିଛନ୍ତି କି, ଏହି ଆକ୍ରମଣ ସନ୍ଧ୍ୟାରେ ରିଆସିରୁ ବୈଷ୍ଣୋ ଦେବୀ ପାଇଁ ବସ୍ ନେବାର ୩୦ ମିନିଟ୍ ପରେ ହୋଇଥିଲା । ଆମେ ଭୟଭୀତ ହୋଇଛୁ ଓ ନିଜ ଘରକୁ ଫେରିବାକୁ ଚାହୁଁଛୁ । ବସ୍ରେ ପିଲା ଓ ମହିଳା ମଧ୍ୟ ଥିଲେ । ଆକ୍ରମଣର ୧୦ ରୁ ୧୫ ମିନିଟ୍ ପରେ ପୋଲିସ ଏବଂ ସ୍ଥାନୀୟ ଲୋକ ଘଟଣାସ୍ଥଳରେ ପହଞ୍ଚି ଆମକୁ ଉଦ୍ଧାର କରିଥିଲେ ।

ତେବେ ରିଆସି ଜିଲ୍ଲାରେ ଏକ ତୀର୍ଥଯାତ୍ରୀ ବସ୍‌ ଉପରେ ଅନ୍ଧାଧୂନ ଗୁଳିମାଡ କରିଥିଲେ ଆତଙ୍କବାଦୀ । ଫଳରେ ବସଟି ଦୁର୍ଘଟଣାର ଶିକାର ହୋଇ ଏକ ଖାଇରେ ଖସିପଡିଥିଲା । ଏଥିରେ ୧୦ ଜଣଙ୍କର ମୃତ୍ୟୁ ହେବା ସହ ୩୩ରୁ ଅଧିକ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି ।

ପ୍ରଥମେ ବସଟି ଦୁର୍ଘଟଣାର ଶିକାର ହୋଇଥିବା ସନ୍ଦେହ କରାଯାଉଥିବା ବେଳେ ଘଟଣାସ୍ଥଳରୁ ଏକାଧିକ ରାଉଣ୍ଡର ଗୁଳି ଓ ଖୋକା ଜବତ ହେବା ପରେ ଏହା ଏକ ବଡଧରଣର ଆତଙ୍କୀ ହମଲା ବୋଲି ସ୍ପଷ୍ଟ ହୋଇଛି । ମୃତାହତମାନେ ସମସ୍ତେ ତୀର୍ଥଯାତ୍ରୀ ଥିଲେ । ସେମାନଙ୍କ ପରିଚୟ କ୍ରମଶଃ ସ୍ପଷ୍ଟ ହେବାରେ ଲାଗିଛି ।ସ୍ଥାନୀୟ ଏସଏସପି ମୋହିତା ଶର୍ମାଙ୍କ ପ୍ରତିକ୍ରିୟା ଅନୁସାରେ, ଏହି ୫୩ ସିଟ ବିଶିଷ୍ଟ ବସଟି ତୀର୍ଥଯାତ୍ରୀଙ୍କୁ ନେଇ ଶିବ ଖୋରୀ ମନ୍ଦିରରୁ କାତ୍ରା ଅଭିମୁଖେ ବାହାରିଥିଲା ।