ଉଚ୍ଚଶିକ୍ଷା ବିଭାଗରେ ଖରାପ ପ୍ରଦର୍ଶନ ଲାଗି ବାଦ୍ ପଡିଲେ ମନ୍ତ୍ରୀ ରୋହିତ ପୂଜାରୀ, ଅତିରିକ୍ତ ଦାୟିତ୍ୱ ନେଲେ ଅତନୁ ସବ୍ୟସାଚୀ
ଭୁବନେଶ୍ୱର: ଉଚ୍ଚଶିକ୍ଷା ବିଭାଗରେ ଖରାପ ପ୍ରଦର୍ଶନ ଲାଗି ରାଜ୍ୟ ମନ୍ତ୍ରୀମଣ୍ଡଳରୁ ବାଦ୍ ପଡିଛନ୍ତି ଉଚ୍ଚଶିକ୍ଷା ମନ୍ତ୍ରୀ ରୋହିତ ପୂଜାରୀ । ରୋହିତ ପୂଜାରୀଙ୍କୁ ବାଦ ଦେବାକୁ ମୁଖ୍ୟମନ୍ତ୍ରୀ ସୁପାରିଶ କରିଛନ୍ତି । ଏ ସଂପର୍କରେ ରାଜ୍ୟପାଳଙ୍କୁ ସୁପାରିଶ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତେବେ ଏହା ପଛରେ କଣ କାରଣ ରହିଛି ତାହାକୁ ନେଇ କିଛି ସ୍ୱଷ୍ଟ ହୋଇନାହିଁ ।
ଗତ ବର୍ଷ ଜୁନ୍ ମାସରେ ରୋହିତ ପୂଜାରୀଙ୍କୁ ମନ୍ତ୍ରୀମଣ୍ଡଳରେ ସାମିଲ କରାଯାଇଥିଲା । କିନ୍ତୁ ଦଳ ମଧ୍ୟରେ ତାଙ୍କୁ ଗୁରୁତ୍ୱ ମିଳୁ ନ ଥିଲା । ବିଭାଗ ୱାରୀ ସମୀକ୍ଷା ପରେ ତାଙ୍କ ପରଫର୍ମାାନ୍ସ ଭଲ ନ ଥିଲା ବୋଲି କୁହାଯାଉଛି । ତେବେ ଏହା ଭିତରେ ଅନ୍ୟ କିଛି ରାଜନୈତକ କାରଣ ରହିଛି ବୋଲି ଚର୍ଚ୍ଚା ହେଉଛି । ଗୋଟିଏ ବର୍ଷ ଭିତରେ ପ୍ରଦର୍ଶନ କିଭଳି ଖରାପ ହୋଇଗଲା ବୋଲି ଆଲୋଚନା ହେଉଛି । ନିକଟରେ ଜାତୀୟ ସ୍ତରରେ ରାଜ୍ୟର ବିଶ୍ୱବିଦ୍ୟାଳୟଗୁଡିକର ଖରାପ ପ୍ରଦର୍ଶନ ତାଲିକା ଏହାର ଏକ କାରଣ ହୋଇପାରେ ବୋଲି କୁହାଯାଉଛି । ନାକ୍ ରେ ମଧ୍ୟ ରାଜ୍ୟର ଶିକ୍ଷାନୁଷ୍ଠାନ ଗୁଡିକ ଆଶାଜନକ ସଫଳତା ହାସଲ କରିନାହିଁ ।
ଆଉ ଏକ ପ୍ରମୁଖ କାରଣ ଗତ କିଛି ଦିନ ତଳେ ସେ ବକ୍ତବ୍ୟ ଦେଇଥିଲେ ୬୦ ବର୍ଷରୁ ଉଦ୍ଧ୍ୱ ବ୍ୟକ୍ତି ରାଜନୀତିକୁ ଆସିବା କଥା ନୁହେଁ ଯାହା ଏବେ ତାଙ୍କ ପାଇଁ ଭାରି ପଡିଲା ବୋଲି କୁହାଯାଉଛି । ଏହା ବ୍ୟତିତ ରାଜ୍ୟରେ ବନ୍ଦ ହୋଇଯାଇଥିବା ଅନେକ ସେଲ୍ଫ ଫାଇନାନ୍ସ କୋର୍ସ ସେ ପୁୁନର୍ବାର ଚାଲୁ କରିଥିଲେ ଯାହାକୁ ନେଇ ଅସନ୍ତୋଷ ସୃଷ୍ଟି ହୋଇଥିଲା । ଏଠାରେ ସୂଚାଇ ଦିଆଯାଇପାରେ ଯେ , ରୋହିତ ପୂଜାରୀ ରେଢାଖୋଲରୁ ଦୁଇ ଥର ବିଧାୟକ ନିର୍ବାଚିତ ହୋଇଛନ୍ତି । ରୋହିତ ବାଦ୍ ପଡିବା ପରେ ଏବେ ଅତନୁ ସବ୍ୟସାଚୀଙ୍କୁ ଉଚ୍ଚଶିକ୍ଷା ବିଭାଗର ଅତିରିକ୍ତ ଦାୟିତ୍ୱ ଦିଆଯାଇଛି ।
