ତୁମର ଯାତ୍ରା ଚମତ୍କାର ଥିଲା….ରୋହିତ ଶର୍ମାଙ୍କ ପାଇଁ ଭାବୁକ ପୋଷ୍ଟ କଲେ ସଚ୍ଚିନ ତେନ୍ଦୁଲକର

ନୂଆଦିଲ୍ଲୀ: ଟି-୨୦ରୁ ଅବସର ନେବା ପରେ, ଟିମ୍ ଇଣ୍ଡିଆର ବିସ୍ଫୋରକ ବ୍ୟାଟ୍ସମ୍ୟାନ୍ ରୋହିତ ଶର୍ମା ଏବେ ଟେଷ୍ଟ କ୍ରିକେଟକୁ ମଧ୍ୟ ଅଲବିଦା କହିସାରିଛନ୍ତି । ଗତବର୍ଷ ଭାରତକୁ ଟି-୨୦ ବିଶ୍ୱକପ୍ ଟାଇଟଲ ଦେଇଥିବା ଏହି ପ୍ରାରମ୍ଭିକ ବ୍ୟାଟସମ୍ୟାନ୍ ଆଇପିଏଲ ମଝିରେ ଏହି ବଡ଼ ନିଷ୍ପତ୍ତି ନେଇଛନ୍ତି । କିନ୍ତୁ ସେ ODI କ୍ରିକେଟ୍ ଖେଳିବା ଜାରି ରଖିବେ ।

ଟେଷ୍ଟ କ୍ରିକେଟରୁ ଅବସର ନେବା ପରେ, ବିସିସିଆଇ ଏବେ ଇଂଲଣ୍ଡ ଗସ୍ତ ପାଇଁ ଜଣେ ନୂତନ ଅଧିନାୟକ ଖୋଜୁଛି । ଏହି ସମୟରେ, ମହାନ ବ୍ୟାଟସମ୍ୟାନ୍ ସଚିନ ତେନ୍ଦୁଲକର ରୋହିତ ଶର୍ମାଙ୍କ ବିଷୟରେ ଭାବପ୍ରବଣ କଥା କହିଛନ୍ତି । ସେ ରୋହିତ ଶର୍ମାଙ୍କ ସହ ବିତାଇଥିବା ମୁହୂର୍ତ୍ତଗୁଡ଼ିକୁ ମନେ ପକାଇଛନ୍ତି ।

ସଚ୍ଚିନଙ୍କର ଭାବୁକ ପୋଷ୍ଟ- କ୍ରିକେଟର ଭଗବାନ କୁହାଯାଉଥିବା ସଚ୍ଚିନ ତେନ୍ଦୁଲକର ରୋହିତ ଶର୍ମାଙ୍କ ଟେଷ୍ଟ କ୍ରିକେଟରୁ ଅବସର ଉପରେ ଏକ ଭାବପ୍ରବଣ ପୋଷ୍ଟ କରିଛନ୍ତି । ସେ ତାଙ୍କ ଇନଷ୍ଟାଗ୍ରାମ ପୃଷ୍ଠାରେ ଲେଖିଛନ୍ତି, ମୁଁ ୨୦୧୩ରେ ଇଡେନ ଗାର୍ଡେନ୍ସରେ ତୁମକୁ ଟେଷ୍ଟ କ୍ୟାପ୍ ଦେଇଥିବା ମନେ ରଖିଛି । କିଛି ଦିନ ପୂର୍ବେ ମୁଁ ତୁମ ସହିତ ୱାଙ୍ଖଡେ ଷ୍ଟାଡିୟମର ବାଲକୋନିରେ ଠିଆ ହୋଇଥିଲି । ତୁମର ଯାତ୍ରା ଚମତ୍କାର ଥିଲା।

ସଚ୍ଚିନ ଆହୁରି ଲେଖିଛନ୍ତି, ସେବେଠାରୁ ଏପର୍ଯ୍ୟନ୍ତ, ତୁମେ ଜଣେ ଖେଳାଳି ଏବଂ ଅଧିନାୟକ ଭାବରେ ଭାରତୀୟ କ୍ରିକେଟକୁ ତୁମର ସର୍ବୋତ୍ତମ ଦେଇଆସିଛ । ରୋହିତ, ତୁମର ଟେଷ୍ଟ କ୍ୟାରିୟର ପାଇଁ ଅନେକ ଅନେକ ଅଭିନନ୍ଦନ ଏବଂ ଭବିଷ୍ୟତ ପାଇଁ ଶୁଭେଚ୍ଛା।

ସଚିନ ରୋହିତଙ୍କୁ ଟେଷ୍ଟ କ୍ୟାପ୍ ଦେଇଥିଲେ- ୨୦୧୩ରେ, ରୋହିତ ଶର୍ମା ୱେଷ୍ଟଇଣ୍ଡିଜ୍ ବିପକ୍ଷରେ ତାଙ୍କର ଟେଷ୍ଟ ମ୍ୟାଚ୍ ଡେବ୍ୟୁ କରିଥିଲେ । ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର କୋଲକାତାର ଇଡେନ ଗାର୍ଡେନ୍ସ ଗ୍ରାଉଣ୍ଡରେ ରୋହିତ ଶର୍ମାଙ୍କୁ ଟେଷ୍ଟ କ୍ୟାପ୍ ପ୍ରଦାନ କରିଥିଲେ । ୱେଷ୍ଟଇଣ୍ଡିଜ୍ ବିପକ୍ଷରେ ଏହି ଟେଷ୍ଟ ସିରିଜ୍ ସଚିନ ତେନ୍ଦୁଲକରଙ୍କ ବିଦାୟକାଳୀନ ସିରିଜ୍ ଥିଲା। ସଚ୍ଚିନ ତେନ୍ଦୁଲକର ୧୬ ନଭେମ୍ବର ୨୦୧୩ରେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ ।

ରୋହିତ ୨୦୨୨ ମସିହାରେ ଭାରତୀୟ ଟେଷ୍ଟ ଦଳର ଅଧିନାୟକ ହୋଇଥିଲେ- ୨୦୨୨ ମସିହାରେ, ବିରାଟ କୋହଲି ଅଧିନାୟକ ପଦରୁ ଇସ୍ତଫା ଦେବା ପରେ ରୋହିତ ଶର୍ମା ଭାରତୀୟ ଟେଷ୍ଟ ଦଳର ଅଧିନାୟକ ହୋଇଥିଲେ । ସେ ୨୪ଟି ଟେଷ୍ଟରେ ଭାରତୀୟ ଦଳର ନେତୃତ୍ୱ ନେଇଛନ୍ତି, ୧୨ଟି ଜିତିଛନ୍ତି ଏବଂ ୯ଟି ପରାଜିତ ହୋଇଛନ୍ତି । ଟି-୨୦ ବିଶ୍ୱକପ୍ ଜିତିବା ପରେ ରୋହିତ ଟି-୨୦ରୁ ମଧ୍ୟ ଅବସର ନେଇଥିଲେ ।