କଣ୍ଟେଣ୍ଟ କ୍ରିଏଟରମାନେ ସାବଧାନ୍! ଠକେଇ ପାଇଁ ନୂଆ ଟେକନିକ୍ ଆପଣାଉଛନ୍ତି ସାଇବର ଅପରାଧୀ, ୟୁଟ୍ୟୁବ ଦେଲା ଚେତାବନୀ

ଯଦି ଆପଣ ଜଣେ କଣ୍ଟେଣ୍ଟ କ୍ରିଏଟର ଏବଂ ଆପଣଙ୍କ ପାଖକୁ ୟୁଟ୍ୟୁବ ସିଇଓ ନୀଲ ମୋହନଙ୍କ ଏକ ଭିଡିଓ ଆସିଛି, ତେବେ ସାବଧାନ୍ ହୋଇଯାଆନ୍ତୁ । କ୍ରିଏଟରମାନଙ୍କୁ କମ୍ପାନୀ ଆଲର୍ଟ କରିଛି ଏବଂ କହିଛି ଯେ, ସ୍କାମରମାନେ କ୍ରିଏଟରମାନଙ୍କୁ ଫସାଇବା ପାଇଁ ନୀଲ ମୋହନଙ୍କ ଏଆଇ-ଜେନେରେଟେଡ୍ ଭିଡିଓ ବ୍ୟବହାର କରୁଛନ୍ତି । ଏପରି କୌଣସି ଭିଡିଓକୁ ବିଶ୍ୱାସ କରନ୍ତୁ ନାହିଁ ଏବଂ ଏଥିରେ ଦିଆଯାଇଥିବା କୌଣସି ଲିଙ୍କରେ କ୍ଲିକ୍ କରନ୍ତୁ ନାହିଁ ବୋଲି କମ୍ପାନୀ ପରାମର୍ଶ ଦେଇଛି ।

ଭିଡିଓକୁ କ୍ରିଏଟରଙ୍କ ସହ ବ୍ୟକ୍ତିଗତ ଭାବରେ ସେୟାର୍ କରାଯାଉଛି :

ୟୁଟ୍ୟୁବ୍ କହିଛି ଯେ, ଠକମାନେ ଏହି ଭିଡିଓକୁ ବ୍ୟକ୍ତିଗତ ଭାବରେ ସେୟାର କରୁଛନ୍ତି । ଏହି ଭିଡିଓରେ, ମନିଟାଇଜେସନ୍ ପଲିସି ବିଷୟରେ ନକଲି ଦାବି କରାଯାଉଛି ।

ପ୍ରକୃତରେ ସ୍କାମରମାନେ ଏହି ଭିଡିଓ ମାଧ୍ୟମରେ କ୍ରିଏଟରଙ୍କ ବ୍ୟକ୍ତିଗତ ସୂଚନା ଚୋରି କରିବାକୁ ଏବଂ ସେମାନଙ୍କ ଟଙ୍କା ଲୁଟିବାକୁ ଚେଷ୍ଟା କରୁଛନ୍ତି । କମ୍ପାନୀ କହିଛି ଯେ, ଏଆଇ ଦ୍ୱାରା ସୃଷ୍ଟି ହୋଇଥିବା ଏହି ନକଲି ଭିଡିଓରେ ନୀଲ ମୋହନଙ୍କୁ ମନିଟାଇଜେସନ୍ ପଲିସିରେ ପରିବର୍ତ୍ତନ ବିଷୟରେ କଥା ହେଉଥିବା ଦେଖାଯାଇଛି ।

ଏହା ଏକ ଫିସିଂ ସ୍କାମ୍ ଏବଂ ଏଥିରେ କ୍ଲିକ୍ କରିବାରୁ ଦୂରେଇ ରୁହନ୍ତୁ । ଲିଙ୍କ୍ ଉପରେ କ୍ଲିକ୍ କରିବା ଦ୍ୱାରା ଡିଭାଇସରେ ମାଲୱେର୍ ଇନଷ୍ଟଲ୍ ହୋଇପାରେ କିମ୍ବା ସ୍କାମରମାନଙ୍କ ସମ୍ମୁଖରେ କ୍ରିଏଟରଙ୍କ ବ୍ୟକ୍ତିଗତ ସୂଚନା ପ୍ରକାଶ ପାଇପାରେ ।