ଟ୍ରେନ୍ରେ ଚା-କଫି ଉପରେ କମିପାରେ ସର୍ଭିସ୍ ଚାର୍ଜ, ଜାଣନ୍ତୁ କ’ଣ ରହିଛି ପୁରା ଖବର
ନୁଆଦିଲ୍ଲୀ: ଟ୍ରେନ୍ରେ ଯାତ୍ରା କରୁଥିବା ଯାତ୍ରୀମାନଙ୍କର ସର୍ବଦା ଗୋଟିଏ ଅଭିଯୋଗ ଥାଏ ଯେ, ଟ୍ରେନ୍ ଷ୍ଟେସନ କିମ୍ବା ଟ୍ରେନ୍ରେ ଚା ଏବଂ କଫିର ଦାମ ବହୁତ୍ ଅଧିକ ରହିଥାଏ। ରାଜଧାନୀ-ଶତାଦ୍ଧୀ ଟ୍ରେନ୍ ଏସି-୨ ଏବଂ ଏସି-୩ କୋଚ୍ରେ ୨୦ ଟଙ୍କିଆ ‘ଚା’ର ମୂଲ୍ୟ ହୋଇଥିବାବେଳେ ବେଳେ ଏହା ଉପରେ ସର୍ଭିସ୍ ଚାର୍ଜ ୫୦ ଟଙ୍କାକୁ ନେଇ ସୋସିଆଲ ମିଡିଆରେ ଚର୍ଚ୍ଚା ହେବା ପରେ ରେଲୱେ ବୋର୍ଡ ଏଥିରେ ସୁଧାର କରିବାକୁ ଯାଉଛି।
ରେଲୱେ ବୋର୍ଡର ଜଣେ ଅଧିକାରୀ କହିଛନ୍ତି ଯେ ପ୍ରିମିୟମ୍ ଟ୍ରେନ୍ ରାଜଧାନୀ-ଶତାଦ୍ଧି, ଦୁରନ୍ତ, ଗତିମାନ, ବନ୍ଦେ ଭାରତ ଆଦିରେ ଟିକେଟ୍ ବୁକିଂ ସମୟରେ କ୍ୟାଟରିଂ ସର୍ଭିସ୍ ବିକଳ୍ପ ରହିବ । କିନ୍ତୁ ଯଦି ଯାତ୍ରା ମଝିରେ ଆପଣ ବ୍ରେକ୍ଫାଷ୍ଟ ଏବଂ ଲଞ୍ଚ ଅର୍ଡର କରୁଛନ୍ତି ତେବେ ଆପଣଙ୍କୁ ୫୦ ଟଙ୍କା ସର୍ଭିସ୍ ଚାର୍ଜ ଦେବାକୁ ପଡିବ। ଯାହା ଖାଇବା ମୂଲ୍ୟଠାରୁ ଅଲଗା ହେବ।
୨୦୧୭ ରେ, ରେଳ ବୋର୍ଡ ଏକ ନିର୍ଦ୍ଦେଶ ଜାରି କରିଥିଲା,ଯେ ଯେଉଁ ଯାତ୍ରୀମାନେ ଟିକେଟ୍ ବୁକ୍ କରିବା ସମୟରେ କ୍ୟାଟରିଂ ସୁବିଧା ନେଇ ନଥିବେ, ଯାତ୍ରା ସମୟରେ କେବଳ ଚା କିମ୍ବା କଫି ଅର୍ଡର ହୋଇଥିଲେ ମଧ୍ୟ ଯାତ୍ରୀଙ୍କ ଠାରୁ ୫୦ ଟଙ୍କା ସେବା ନିଆଯିବ। ୨୦୧୮ ରେ, ଆଇଆରସିଟିସି ପୁନର୍ବାର ସର୍ଭିସ୍ ଚାର୍ଜ ଉପରେ ରେଳ ବୋର୍ଡର ମତାମତ ଲୋଡିଥିଲେ । ସେ ସମୟରେ ସର୍ଭିସ୍ ଚାର୍ଜକୁ ଅପରିବର୍ତ୍ତିତ ରଖିବାକୁ ବୋର୍ଡ ନିର୍ଦ୍ଦେଶ ଦେଇଥିଲା।
ଏହି ବିଷୟରେ ରେଳବାଇର ଯୁକ୍ତି କରେ ଯେ ଟିକେଟ୍ ବୁକିଂ ପୂର୍ବରୁ କ୍ୟାଟରିଂ କଣ୍ଟ୍ରାକ୍ଟର ଜାଣନ୍ତି ଯେ ଯାତ୍ରା ସମୟରେ କେତେ ଯାତ୍ରୀଙ୍କୁ ଚା, ସ୍ନାକ୍ସ, ଖାଦ୍ୟ ଦେବାକୁ ପଡିବ। କିନ୍ତୁ ଯେତେବେଳେ ଯାତ୍ରା ମଝିରେ ଅର୍ଡର ଗ୍ରହଣ କରାଯାଏ, ରେଳବାଇକୁ ପରବର୍ତ୍ତୀ ଷ୍ଟେସନରେ ହୋଟେଲରୁ ଖାଦ୍ୟ ଅର୍ଡର କରିବାକୁ ପଡେ। ଟ୍ରେନରେ ଅଗ୍ରୀମ ବୁକିଂ ବ୍ୟତୀତ କଣ୍ଟ୍ରାକ୍ଟର ଖାଦ୍ୟ ବହନ ନକରିବା କାରଣରୁ କ୍ଷତି ସହିଥାନ୍ତି। ତେଣୁ ସେଠାରେ ସର୍ଭିସ୍ ଚାର୍ଜର ବ୍ୟବସ୍ଥା ରହିଛି।
ନିକଟରେ ୫୦ ଟଙ୍କା ସେବା ଚାର୍ଜ ସୋସିଆଲ ମିଡିଆରେ ଭାଇରାଲ ହୋଇଥିଲା। ଜଣେ ଯାତ୍ରୀ ବିଲ୍ର ଫଟୋ ସେୟାର କରିଥିଲେ। ଯାତ୍ରୀ ଏକ କପ୍ ଚା ପାଇଁ ୭୦ ଟଙ୍କା ଦେଇଥିଲେ। ଯାତ୍ରୀ ୨୦ ଟଙ୍କା ମୂଲ୍ୟର ଚା ପାଇଁ ୫୦ ଟଙ୍କା ସର୍ଭିସ୍ ଚାର୍ଜ ପ୍ରଦାନ କରିଥିଲେ। ସେ ଜୁନ୍ ୨୮ ରେ ଶତାଦ୍ଧି ଏକ୍ସପ୍ରେସ ଟ୍ରେନରେ ଦିଲ୍ଲୀରୁ ଭୋପାଳ ଯାତ୍ରା କରିଥିଲେ।
