ଏବେ ବୟସ ବଢ଼ିବା ହେବ ଧୀମା, କ୍ୟାନ୍ସର ବିରୁଦ୍ଧରେ ଲଢ଼ିବାରେ ମଧ୍ୟ ସଫଳ ହେବ ଏହି ୩ ପ୍ରୋଟିନ!
କ୍ୟାନ୍ସର ଏବଂ ବୟସ ବଢ଼ିବା ସହ ଜଡ଼ିତ ରୋଗର ଚିକିତ୍ସାରେ ବୈଜ୍ଞାନିକମାନେ ଏକ ବଡ଼ ସଫଳତା ହାସଲ କରିଛନ୍ତି। ଅଷ୍ଟ୍ରେଲିଆର ଚିଲଡ୍ରେନ୍ସ ମେଡିକାଲ ରିସର୍ଚ୍ଚ ଇନଷ୍ଟିଟ୍ୟୁଟ (CMRI)ର ବୈଜ୍ଞାନିକମାନେ ଏକ ଗୁରୁତ୍ୱପୂର୍ଣ୍ଣ ଆବିଷ୍କାରରେ ତିନୋଟି ପ୍ରୋଟିନ ଚିହ୍ନଟ କରିଛନ୍ତି, ଯାହା ଶରୀରର କୋଶିକାଗୁଡ଼ିକୁ ଦୀର୍ଘ ସମୟ ପର୍ଯ୍ୟନ୍ତ ସୁସ୍ଥ ରଖିବା ଏବଂ କ୍ୟାନସରକୁ ରୋକିବାରେ ସାହାଯ୍ୟ କରିପାରେ।
ସମାଚାର ଏଜେନ୍ସିର ରିପୋର୍ଟ ଅନୁସାରେ, ଏହି ପ୍ରୋଟିନଗୁଡ଼ିକ ଟେଲୋମେରେଜ୍ ନାମକ ଏକ ଏନଜାଇମକୁ ନିୟନ୍ତ୍ରଣ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରେ। ଟେଲୋମେରେଜ୍ ଡିଏନଏର ସୁରକ୍ଷା କରେ ଏବଂ କୋଶିକା ବିଭାଜନ ସମୟରେ ସେମାନଙ୍କ ବୟସକୁ ସନ୍ତୁଳିତ ରଖେ।
ରିସର୍ଚ୍ଚର ମୁଖ୍ୟ ତଥ୍ୟ:
ବୈଜ୍ଞାନିକମାନେ NONO, SFPQ ଏବଂ PSPC1 ନାମକ ତିନୋଟି ପ୍ରୋଟିନ ଚିହ୍ନଟ କରିଛନ୍ତି।
ଏହି ପ୍ରୋଟିନଗୁଡ଼ିକ ଟେଲୋମେରେଜ୍କୁ ସଠିକ୍ ସ୍ଥାନ, ଅର୍ଥାତ୍ ଗୁଣସୂତ୍ର (କ୍ରୋମୋଜୋମ୍)ର ଶେଷ ପ୍ରାନ୍ତକୁ ପହଞ୍ଚାଇଥାଏ।
ଏହି ପ୍ରୋଟିନଗୁଡ଼ିକୁ ଅଟକାଇଲେ କ୍ୟାନସର କୋଶିକାଗୁଡ଼ିକର ବୃଦ୍ଧି ରୋକାଯାଇପାରେ।
ନେଚର କମ୍ୟୁନିକେସନ୍ସ ଜର୍ନାଲରେ ପ୍ରକାଶିତ ଏହି ଶୋଧରେ କୁହାଯାଇଛି ଯେ ଯଦି ଏହି ପ୍ରୋଟିନଗୁଡ଼ିକୁ ଲକ୍ଷ୍ୟ କରାଯାଏ, ତେବେ ଏହା ସୁସ୍ଥ ବୟସ ବଢ଼ାଇବା (Healthy Aging) କୁ ପ୍ରୋତ୍ସାହନ ଦେଇପାରେ ଏବଂ କ୍ୟାନସର ଚିକିତ୍ସାରେ ମଧ୍ୟ ସାହାଯ୍ୟକାରୀ ହୋଇପାରେ।
ଏହି ଅଧ୍ୟୟନର ମୁଖ୍ୟ ବୈଜ୍ଞାନିକ ଡା. ହିଲ୍ଡା ପିକେଟ୍ କହିଛନ୍ତି, “ଏହି ପ୍ରୋଟିନଗୁଡ଼ିକର ଆବିଷ୍କାର ଟେଲୋମେରେଜ୍ର ଶରୀରରେ କିପରି ନିର୍ଦ୍ଦେଶିତ ହୁଏ ତାହା ବୁଝିବା ସହଜ କରିଛି। ଏହା କ୍ୟାନସର, ବୟସ ବଢ଼ିବା ଏବଂ ଜେନେଟିକ ବ୍ୟାଧି ଭଳି ରୋଗଗୁଡ଼ିକ ପାଇଁ ନୂଆ ଚିକିତ୍ସା ବିକାଶରେ ସାହାଯ୍ୟ କରିପାରେ।”
ଟେଲୋମେରେଜ୍ର କାର୍ଯ୍ୟ ହେଉଛି ଗୁଣସୂତ୍ରର ଶେଷ ପ୍ରାନ୍ତ (ଟେଲୋମୟର)ଗୁଡ଼ିକୁ ସ୍ଥିର ରଖିବା, ଯାହା ଦ୍ୱାରା କୋଶିକାଗୁଡ଼ିକ ସୁସ୍ଥ ରହିଥାଏ। ଏହି ନୂଆ ଆବିଷ୍କାର କେବଳ କ୍ୟାନସର ନିୟନ୍ତ୍ରଣରେ ନୁହେଁ, ବରଂ ଟେଲୋମୟର ଡିସଫଙ୍କସନ ସହ ଜଡ଼ିତ ରୋଗଗୁଡ଼ିକ ଉପରେ ମଧ୍ୟ ନିୟନ୍ତ୍ରଣ ହାସଲ କରିବାର ଆଶା ଜଗାଇଛି।