ସୋନିଆ ଗାନ୍ଧୀଙ୍କ ମା’ ଙ୍କ ବିୟୋଗ; ଶୋକପ୍ରକାଶ କଲେ ପ୍ରଧାନମନ୍ତ୍ରୀ
ନୂଆଦିଲ୍ଲୀ: କଂଗ୍ରେସର ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀଙ୍କ ମା’ଙ୍କ ବିୟୋଗ । ଶନିବାର ୨୭ ଅଗଷ୍ଟରେ ସୋନିଆଙ୍କ ମା’ ପାଓଲା ମାଇନୋଙ୍କ ଇଟାଲୀରେ ନିଧନ ହୋଇଥିଲା । ତାଙ୍କ ଅନ୍ତିମ ସଂସ୍କାର ମଙ୍ଗଳବାର ପୂରା ବିଧି ବିଧାନ ସହ ହୋଇଛି । କଂଗ୍ରେସର ମିଡିଆ ପ୍ରଭାରୀ ଜୟରାମ ରମେଶ ଏହି ବିଷୟରେ ଟ୍ୱିଟ୍ କରି ସୂଚନା ଦେଇଛନ୍ତି ।
ସୋନିଆ ଗାନ୍ଧୀ ଗତ ସପ୍ତାହରେ ସ୍ୱାସ୍ଥ୍ୟ ଯାଞ୍ଚ ପାଇଁ ବିଦେଶ ଯାତ୍ରାରେ ଯାଇଥିଲେ । ଏହି ସମୟରେ ବିଦେଶରେ ହିଁ ଅଛନ୍ତି । ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ମଧ୍ୟ ତାଙ୍କ ସହ ଅଛନ୍ତି । ସୋନିଆଙ୍କ ମା’ ପ୍ରାୟ ୯୦ ବର୍ଷର ଥିଲେ ।
ସେପେଟେ ସୋନିଆ ଗାନ୍ଧୀଙ୍କ ମା’ଙ୍କ ନିଧନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଶୋକ ମନାଇଛନ୍ତି । ସେ ଟ୍ୱିଟ୍ କରି କହିଛନ୍ତି ଯେ ସୋନିଆଙ୍କ ମା’ ପାଓଲା ମାଇନୋଙ୍କ ନିଧନ ରେ ମୋର ଶ୍ରଦ୍ଧାଞ୍ଜଳି, ଇଶ୍ୱର ତାଙ୍କ ଆତ୍ମାକୁ ଶାନ୍ତି ଦିଅନ୍ତୁ । ଦୁଃଖର ଏହି ସମୟରେ ତାଙ୍କ ପୂରା ପରିବାରକୁ ମୋର ସାନ୍ତ୍ୱନା ।
