ସୁପ୍ରିମକୋର୍ଟଙ୍କ ବଡ଼ ନିର୍ଦ୍ଦେଶ : ଏଣିକି ପୋଲିସ ହ୍ୱାଟସଆପ ମାଧ୍ୟମରେ ପଠାଇ ପାରିବନି ନୋଟିସ୍

ନୂଆଦିଲ୍ଲୀ: ସୁପ୍ରିମକୋର୍ଟ ଏବେ ହ୍ୱାଟସଆପ୍ କିମ୍ବା ଇଲେକ୍ଟ୍ରୋନିକ୍ ମୋଡ୍ ମାଧ୍ୟମରେ ନୋଟିସ୍ ପଠାଇବାକୁ ନିଷିଦ୍ଧ କରିଛନ୍ତି । ସୁପ୍ରିମକୋର୍ଟ ପୋଲିସ ବିଭାଗଗୁଡ଼ିକୁ ନିର୍ଦ୍ଦେଶ ଦେଇଛନ୍ତି ଯେ ସିଆରପିସି ଧାରା ୪୧ଏ କିମ୍ବା ବିଏନଏସଏସର ଧାରା ୩୫ ଅନୁଯାୟୀ ଅଭିଯୁକ୍ତଙ୍କୁ ନୋଟିସ୍ ଦେବା ପାଇଁ ହ୍ୱାଟ୍ସଆପ୍ କିମ୍ବା ଅନ୍ୟ କୌଣସି ଇଲେକ୍ଟ୍ରୋନିକ୍ ମୋଡ୍ ବ୍ୟବହାର ନ କରନ୍ତୁ । କୋର୍ଟ ସ୍ପଷ୍ଟ କରିଛନ୍ତି ଯେ ଏପରି ନୋଟିସ୍ କେବଳ ସେବା ପାଇଁ ନିର୍ଦ୍ଧାରିତ ପାରମ୍ପରିକ ପଦ୍ଧତିରେ ଜାରି କରାଯିବା ଉଚିତ ।

ଧାରା ୪୧ଏ ସିଆରପିସି ଏବଂ ଧାରା ୩୫ ବିଏନଏସଏସ ଅନୁଯାୟୀ, ଯେଉଁ ଅଭିଯୁକ୍ତଙ୍କୁ ତୁରନ୍ତ ଗିରଫଦାରୀ ଆବଶ୍ୟକ ନୁହେଁ, ତାଙ୍କୁ ପୋଲିସ ସମ୍ମୁଖରେ କିମ୍ବା କୌଣସି ନିର୍ଦ୍ଦିଷ୍ଟ ସ୍ଥାନରେ ହାଜର ହେବା ପାଇଁ ନୋଟିସ ଜାରି କରାଯାଇପାରିବ । ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ଯେ, ଏହି ନୋଟିସଗୁଡ଼ିକ କେବଳ ଆଇନଗତ ଏବଂ ସ୍ୱୀକୃତିପ୍ରାପ୍ତ ପଦ୍ଧତି ମାଧ୍ୟମରେ ଜାରି କରାଯିବା ଉଚିତ ।

କୌଣସି ହ୍ୱାଟ୍ସଆପ୍ ବିକଳ୍ପ ନାହିଁ:
ଏହି ସମ୍ପର୍କରେ ନିର୍ଦ୍ଦେଶ ଜାରି କରିବା ସମୟରେ ବିଚାରପତି ଏମଏମ ସୁନ୍ଦରେଶ ଏବଂ ବିଚାରପତି ରାଜେଶ ବିନ୍ଦଲଙ୍କ ଖଣ୍ଡପୀଠ ନିର୍ଦ୍ଦେଶ ଜାରି କରି କହିଛନ୍ତି ଯେ, ସମସ୍ତ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ସେମାନଙ୍କର ପୋଲିସ ବିଭାଗ ପାଇଁ ସ୍ଥାୟୀ ଆଦେଶ କରିବା ଉଚିତ । ଏହି ଆଦେଶଗୁଡ଼ିକରେ ନିର୍ଦ୍ଦେଶ ଦିଆଯାଇଛି କି, କେବଳ ନିର୍ଦ୍ଧାରିତ ପଦ୍ଧତି ଅନୁଯାୟୀ ନୋଟିସ୍ ପ୍ରଦାନ କରାଯିବ । ହ୍ୱାଟସଆପ୍ କିମ୍ବା ଅନ୍ୟାନ୍ୟ ଇଲେକ୍ଟ୍ରୋନିକ୍ ଉପାୟ ବ୍ୟବହାର କରିବା ଏକ ବିକଳ୍ପ ପଦ୍ଧତି ହୋଇପାରିବ ନାହିଁ ।

ସୁପ୍ରିମକୋର୍ଟ ସତୀନ୍ଦର କୁମାର ଅନ୍ତିଲ ମାମଲାରେ ଏହି ନିର୍ଦ୍ଦେଶ ଦେଇଛନ୍ତି, ଯେଉଁଥିରେ ପୂର୍ବରୁ ମଧ୍ୟ କୋର୍ଟ ଅନାବଶ୍ୟକ ଗିରଫଦାରୀକୁ ରୋକିବା ପାଇଁ ଐତିହାସିକ ନିର୍ଦ୍ଦେଶ ଦେଇଥିଲେ । କୋର୍ଟ ଏହି ମାମଲାରେ ତାଙ୍କର ପୂର୍ବ ନିର୍ଦ୍ଦେଶଗୁଡ଼ିକର କାର୍ଯ୍ୟକାରିତା ଉପରେ ନଜର ରଖିଛି । କୋର୍ଟ କହିଛନ୍ତି ଯେ ନୋଟିସ ପ୍ରଦାନ କରିବାର ପଦ୍ଧତି ସ୍ୱଚ୍ଛ ଏବଂ ଆଇନଗତ ହେବା ଉଚିତ ଯାହା ଦ୍ୱାରା ନ୍ୟାୟିକ ପ୍ରକ୍ରିୟା ପ୍ରଭାବିତ ନହୁଏ ।