ଆତଙ୍କବାଦୀଙ୍କ ‘ମିଶନ ୧୫ ଅଗଷ୍ଟ’: ଭାରତରେ ବୋମା ବ୍ଲାଷ୍ଟ କରିବାକୁ ପାକିସ୍ତାନ ରଚୁଛି ଏପରି ଷଡ଼ଯନ୍ତ୍ର
ନୂଆଦିଲ୍ଲୀ: ଦେଶରେ ଆତଙ୍କୀ ଆକ୍ରମଣକୁ ନେଇ ଏଜେନ୍ସିଗୁଡ଼ିକ ଏକ ବଡ଼ ଗୁପ୍ତଚର ଆଲର୍ଟ ପାଇଛନ୍ତି । ଏହି ଗୁପ୍ତଚର ସୂଚନା ଅନୁସାରେ, ଦେଶରେ ସ୍ୱାଧୀନତା ଦିବସ ପୂର୍ବରୁ ଏଥର ପାକିସ୍ତାନୀ ଆତଙ୍କବାଦୀମାନେ ଦେଶରେ ମଲ୍ଟି ଆଟାକ୍ କରିବାକୁ ଯୋଜନା କରୁଛନ୍ତି । ଆତଙ୍କବାଦୀମାନେ ଏଥର ଏକାସାଙ୍ଗରେ ସମ୍ବେଦନଶୀଳ ସ୍ଥାନ ଉପରେ ଆକ୍ରମଣ କରିବାକୁ ରଣନୀତି ପ୍ରସ୍ତୁତ କରିଛନ୍ତି । ଏଜେନ୍ସି ସୂତ୍ର ଅନୁଯାୟୀ ଆତଙ୍କବାଦୀମାନେ ସବୁଥର ପରି ବୋମା ଓ ବନ୍ଧୁକ ମାଧ୍ୟମରେ ଆତଙ୍କ ବିସ୍ତାର କରିବାକୁ ଚାହୁଁଛନ୍ତି । ଖାସ୍ କରି ଆତ୍ମଘାତୀ ଆକ୍ରମଣ କରିବା ପାଇଁ ସେମାନେ କାର ଏବଂ ଟ୍ରକକୁ ଷ୍ଟିକ୍ ବୋମା ମାଧ୍ୟମରେ ଟାର୍ଗେଟ କରିପାରିବେ ।
ସବୁଠାରୁ ବଡ ଇନପୁଟ୍ ଡ୍ରୋନ୍ ଆକ୍ରମଣର ରହିଛି । ଆତଙ୍କବାଦୀମାନେ ଏଥିପାଇଁ ସମ୍ପୂର୍ଣ୍ଣ ପ୍ରସ୍ତୁତି କରୁଛନ୍ତି ଏବଂ ବିଭିନ୍ନ ସ୍ଥାନରେ ମଲ୍ଟି ଆଟାକ୍ କରିପାରନ୍ତି । ଏହି ଇନପୁଟକୁ ଆଧାର କରି ସୁରକ୍ଷା ଏଜେନ୍ସିମାନେ ବହୁତ ସତର୍କତା ଅବଲମ୍ବନ କରୁଛନ୍ତି । ତେବେ ଏଥର ସ୍ୱାଧୀନତା ଦିବସ ତଥା ଅନ୍ୟାନ୍ୟ ଦିନରେ ବିଭିନ୍ନ ପ୍ରକାରର ସମ୍ଭାବ୍ୟ ବିପଦ ଉପରେ ସୁରକ୍ଷା ଏଜେନ୍ସିମାନଙ୍କୁ ସତର୍କ ରହିବାକୁ କୁହାଯାଇଛି । ଏଥିରେ ଟେକ୍ନୋଲୋଜିର ବ୍ୟବହାରଠାରୁ ଆରମ୍ଭ କରି ଲଞ୍ଚିଂ ପ୍ୟାଡ୍ ଓ ଆତଙ୍କବାଦୀଙ୍କ ଅନୁପ୍ରବେଶ ପର୍ଯ୍ୟନ୍ତ ସମସ୍ତ ତଥ୍ୟ ସାମ୍ନାକୁ ଆସିଛି ।
ଆତଙ୍କବାଦୀମାନେ ବିସ୍ଫୋଟକ ଓ ନିଆଁ ଲଗାଉଥିବା ବୋମା ଉଭୟର ଉପଯୋଗ କରିପାରନ୍ତି । ସେମାନେ ଲେଟର ଏବଂ ପାର୍ସଲ ବୋମା ମଧ୍ୟ ବ୍ୟବହାର କରିପାରନ୍ତି । ଆତଙ୍କବାଦୀମାନେ ଏଥର ହତ୍ୟାକାଣ୍ଡ ପାଇଁ ଅତ୍ୟାଧୁନିକ ବନ୍ଧୁକ, ପିସ୍ତଲ, ରିଭଲଭର, ରାଇଫଲ ଏବଂ ସ୍ୱୟଂଚାଳିତ ଅସ୍ତ୍ର ବ୍ୟବହାର କରିପାରନ୍ତି । ଆତଙ୍କବାଦୀମାନେ ମଧ୍ୟ ଆରପିଜି ବ୍ୟବହାର କରିପାରନ୍ତି ବୋଲି ସୂଚନା ମିଳିଛି ।
