ଭାରତ-ଚୀନ୍ ମଧ୍ୟରେ ସୀମା ବିବାଦର ଅନ୍ତ ଘଟିବ; ଦୁଇ ଦେଶ ମଧ୍ୟରେ ପାଟ୍ରୋଲିଂକୁ ନେଇ ଗୁରୁତ୍ୱପୂର୍ଣ୍ଣ ରାଜିନାମା
ନୂଆଦିଲ୍ଲୀ: ଭାରତ ଓ ଚୀନ୍ ମଧ୍ୟରେ ଏଲ୍ଏସିକୁ ନେଇ ଚାଲିଥିବା ବିବାଦ ମାମଲାରେ ଏକ ବଡ଼ ପଦକ୍ଷେପ ନିଆଯାଇଛି। ନିକଟରେ ଦୁଇ ଦେଶର ଅଧିକାରୀଙ୍କ ମଧ୍ୟରେ ହୋଇଥିବା ଆଲୋଚନା ପରେ ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି)ରେ ପାଟ୍ରୋଲିଂ ବ୍ୟବସ୍ଥା ନେଇ ଭାରତ ଓ ଚୀନ୍ ମଧ୍ୟରେ ବୁଝାମଣା ହୋଇଛି ବୋଲି ବୈଦେଶିକ ସଚିବ ବିକ୍ରମ ମିସ୍ରି ଘୋଷଣା କରିଛନ୍ତି।
ଏଲଏସିରେ ପାଟ୍ରୋଲିଂ ନେଇ ହୋଇଥିବା ଚୁକ୍ତି ସମ୍ପର୍କରେ ବୈଦେଶିକ ସଚିବ ବିକ୍ରମ ମିସ୍ରି କହିଛନ୍ତି, ଗତ କିଛି ସପ୍ତାହ ଧରି ହୋଇଥିବା ଆଲୋଚନାର ଫଳସ୍ୱରୂପ ଭାରତ-ଚୀନ୍ ସୀମାନ୍ତ ଅଞ୍ଚଳରେ ପ୍ରକୃତ ନିୟନ୍ତ୍ରଣ ରେଖା ନିକଟରେ ପାଟ୍ରୋଲିଂ ବ୍ୟବସ୍ଥା ଉପରେ ସହମତି ପ୍ରକାଶ ପାଇଛି ଏବଂ ଏହା ୨୦୨୦ରେ ଏହି ଅଞ୍ଚଳରେ ଉପୁଜିଥିବା ସମସ୍ୟାର ସମାଧାନ କରୁଛି। ଆସନ୍ତୁ ପଛକୁ ହଟିବାର ଆଶା ରଖନ୍ତୁ।
ବୈଦେଶିକ ସଚିବ କହିଛନ୍ତି ଯେ ସୀମାରେ ରହିଥିବା ସମସ୍ୟାର ସମାଧାନ ପାଇଁ ଗତ କିଛି ସପ୍ତାହ ଧରି ଭାରତ ଏବଂ ଚୀନ୍ ର ଆଲୋଚନାକାରୀମାନେ ଯୋଗାଯୋଗରେ ଅଛନ୍ତି। ଡେପସାଙ୍ଗ ଓ ଡେମଚୋକ ଅଞ୍ଚଳରେ ପାଟ୍ରୋଲିଂ ବ୍ୟବସ୍ଥାକୁ ନେଇ ଏହି ଚୁକ୍ତି ହୋଇଥିବା ଜଣାପଡ଼ିଛି। ପୂର୍ବ ଲଦାଖ ସୀମାରେ ୨୦୨୦ ରେ ହୋଇଥିବା ସଂଘର୍ଷରେ ୨୦ ଜଣ ଭାରତୀୟ ସୈନିକ ଏବଂ ଚୀନ୍ ର କିଛି ସୈନିକ ସହିଦ ହେବା ପରେ ଦୁଇ ପଡ଼ୋଶୀ ଦେଶ ମଧ୍ୟରେ ସମ୍ପର୍କ ଉତ୍ତେଜନାପୂର୍ଣ୍ଣ ରହିଛି।
ସେପଟେ ବ୍ରିକ୍ସ ଶିଖର ସମ୍ମିଳନୀରେ ଯୋଗ ଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଋଷର କାଜାନ ଯାଉଛନ୍ତି । ଶିଖର ସମ୍ମିଳନୀ ଅବସରରେ ପ୍ରଧାନମନ୍ତ୍ରୀ ମୋଦୀ ଏବଂ ଚୀନ୍ ରାଷ୍ଟ୍ରପତି ସି ଜିନ୍ ପିଙ୍ଗ୍ ଦ୍ୱିପାକ୍ଷିକ ବୈଠକ କରିପାରନ୍ତି ବୋଲି କଳ୍ପନାଜଳ୍ପନା ଚାଲିଥିବା ବେଳେ ତାଙ୍କ ନିର୍ଦ୍ଧାରିତ ଗସ୍ତର ଗୋଟିଏ ଦିନ ପୂର୍ବରୁ ଏହି ପଦକ୍ଷେପ ନିଆଯାଇଛି। ତେବେ ଏ ନେଇ କୌଣସି ଆନୁଷ୍ଠାନିକ ସୂଚନା ମିଳିନାହିଁ।
