ସରିଛି ଆର୍ଥିକ ସଂକଟ, ଚାଲିଛି ମତଦାନ… ପ୍ରାୟ ୭୫% ଜନତାଙ୍କ ଭୋଟିଙ୍ଗ, ମତଗଣନା ଜାରି
କଲମ୍ବୋ: ଶ୍ରୀଲଙ୍କାରେ ସନ୍ଧ୍ୟା ୪ଟାରେ ଶେଷ ହୋଇଛି ରାଷ୍ଟ୍ରପତି ନିର୍ବାଚନ ପ୍ରକ୍ରିୟା । ଦେଶର ପ୍ରାୟ ୧.୭ କୋଟି ଭୋଟରଙ୍କ ମଧ୍ୟରୁ ପ୍ରାୟ ୭୫% ଭୋଟର ନୂଆ ରାଷ୍ଟ୍ରପତିଙ୍କ ପାଇଁ ମତଦାନ କରିଛନ୍ତି । ତେବେ ବର୍ତ୍ତମାନ ମତଗଣନା ଜାରି ରହିଥିବା ବେଳେ ରବିବାର ଏହାର ଫଳାଫଳ ଘୋଷଣା ହୋଇପାରେ ବୋଲି ଆଶା କରାଯାଉଛି । ୨୦୨୨ ମସିହା ଜନ ଆନ୍ଦୋଳନ ପରେ ପ୍ରଥମ ଥର ପାଇଁ ଶ୍ରୀଲଙ୍କାରେ ମତଦାନ କରାଯାଉଛି । ଏହି ନିର୍ବାଚନରେ ରାନିଲ ବିକ୍ରମାସିନେ୍ଧଙ୍କ ସମ୍ମୁଖରେ ଜନତା ବିମୁକ୍ତି ପେରାମୁନାର ଅନୁରା କୁମାରା ଦିଶାନାୟକେ ଏବଂ ସମାଗୀ ଜନ ବାଲୱେଗୟା ପାର୍ଟିର ସଜିତ ପ୍ରେମଦାସା ପ୍ରତିଦ୍ୱନ୍ଦୀ ଭାବରେ ରହିଛନ୍ତି ।
ନିର୍ବାଚୟ ଆୟୋଗର ରିପୋର୍ଟ ଅନୁସାରେ, ମତଦାନ କେନ୍ଦ୍ର ଅପରାହ୍ନ ୪ଟାରେ ବନ୍ଦ ହୋଇଯାଇଛି । ତେବେ ଏହି ଭୋଟିଙ୍ଗରେ ପ୍ରାୟ ୭୦-୭୫% ଜନତା ମତଦାନ କରିଛନ୍ତି । ଶ୍ରୀଲଙ୍କା ପାଇଁ ଏହି ନିର୍ବାଚନ ବେଶ୍ ଗୁରୁତ୍ୱପୂର୍ଣ୍ଣ ରହିଛି । କାରଣ ଅନ୍ତରାଷ୍ଟ୍ରୀୟ ମୁଦ୍ରା କୋଷର ସାହାଯ୍ୟ ପରେ ମଧ୍ୟ ବର୍ତ୍ତମାନ ସୁଦ୍ଧା ଦେଶ ଆର୍ଥିକ ସଂକଟରୁ ବାହାରି ପାରିନାହିଁ । ତେଣୁ ନିର୍ବାଚନ ସମୟରେ ପ୍ରମୁଖ ପ୍ରସଙ୍ଗ ଭାବରେ ଉଭା ହୋଇଛି ଆର୍ଥିକ ସଂକଟ । ଚଳିତବର୍ଷ ନିର୍ବାଚନୀ ପ୍ରଚାରରେ ବ୍ୟକ୍ତିତ୍ୱ ଏବଂ ପାର୍ଟି ବିଚାରଧାରା ଅପେକ୍ଷା ପ୍ରାର୍ଥୀଙ୍କ ପ୍ରସ୍ତାବିତ ନୀତି ବେଶ୍ ଗୁରୁତ୍ୱପୂର୍ଣ୍ଣ ରହିଛି ।
ଗତ ରାଷ୍ଟ୍ରପତି ନିର୍ବାଚନରେ ୨ ଜଣ ପ୍ରାର୍ଥୀଙ୍କ ମଧ୍ୟରେ ଏହି ପ୍ରତିଦ୍ୱନ୍ଦିତା ଖୁବ ସଂଘର୍ଷପୂର୍ଣ୍ଣ ହୋଇଥିଲା । କିନ୍ତୁ ଚଳିତବର୍ଷ ଏହା ଏକ ତ୍ରିକୋଣୀୟ ନିର୍ବାଚନ ରହିଛି । ଏଥିରେ ରାଷ୍ଟ୍ରପତି ବିକ୍ରମାସିନେ୍ଧ ସ୍ୱତନ୍ତ୍ର ପ୍ରାର୍ଥୀ ଭାବରେ ନିର୍ବାଚନ ମଇଦାନକୁ ଓହ୍ଲାଇଛନ୍ତି । ସେହିପରି ବିପକ୍ଷୀ ନେତା ସଜିତ ପ୍ରେମଦାସା ଏବଂ ବାମପନ୍ଥୀ ଲେନିନବାଦୀ ନେତା ଅନୁରା କୁମାରା ଦିଶାନାୟକେଙ୍କ ବ୍ୟତୀତ ୩୫ ଅନ୍ୟ ପ୍ରାର୍ଥୀ ମଧ୍ୟ ନିର୍ବାଚନରେ ସାମିଲ ହୋଇଥିଲେ ।
