ରୋଚକ ଥିଲା ବ୍ୟାଡମିଣ୍ଟନ ଷ୍ଟାର ସିନ୍ଧୁଙ୍କ ଲମ୍ବା ପ୍ରେମ ଓ ବିବାହ ପଛର କାହାଣୀ

ଓଡ଼ିଶା ଭାସ୍କର: ଭାରତର ଷ୍ଟାର ବ୍ୟାଡମିଣ୍ଟନ ଖେଳାଳି ପିଭି ସିନ୍ଧୁଙ୍କ ପ୍ରେମ ବିବାହର କାହାଣୀ କୌଣସି ବଲିଉଡ ସିନେମା ଠାରୁ କମ୍ ନଥିଲା । ସିନ୍ଧୁ ତାଙ୍କ ବର୍ତ୍ତମାନର ସ୍ୱାମୀ ଭେଙ୍କଟ ସାଇ ଦତ୍ତଙ୍କ ସହ ପ୍ରଥମ ଥର ଅକସ୍ମାତ ଦେଖା ହୋଇଥିଲେ ଏକ ବିମାନ ଯାତ୍ରା ବେଳେ ।

ଆକାଶରେ ପ୍ରଥମ ଦେଖାରୁ ହୋଇଥିଲା ପ୍ରେମ । ସେମାନେ ପ୍ରାୟ ୧୦ ବର୍ଷ ଧରି ପରସ୍ପରକୁ ଚିହ୍ନିବାକୁ ଚେଷ୍ଟା କରିଥିଲେ । ଆଉ ଶେଷରେ ବାନ୍ଧି ହୋଇଥିଲେ ବିବାହ ବନ୍ଧନରେ ।

ପିଭି ସିନ୍ଧୁଙ୍କ ବିବାହ:

ଡିସେମ୍ବର ୨୨ରେ ପିଭି ସିନ୍ଧୁ ବିଶିଷ୍ଟ ବ୍ୟବସାୟୀ ଭେଙ୍କଟ ସାଇ ଦତ୍ତଙ୍କୁ ବିବାହ କରିଥିଲେ । ଉଦୟପୁରରେ ଆୟୋଜିତ ଏହି ବିବାହ ଉତ୍ସବରେ ପରିବାର, ସାଙ୍ଗସାଥିଙ୍କ ସହ କ୍ରୀଡ଼ା, ରାଜନୀତି ଏବଂ ସିନେ ଜଗତର ଅନେକ ବିଶିଷ୍ଟ ବ୍ୟକ୍ତି ସାମିଲ ହୋଇଥିଲେ । ଏହି ବିବାହ ଉତ୍ସବରେ ରାଜସ୍ଥାନର ରାଜକୀୟ ଝଲକ ଦେଖିବାକୁ ମିଳିଥିଲା । ପିଭି ସିନ୍ଧୁ ଗୋଲ୍ଡେନ୍ କ୍ରିମ୍ ରଂଗର ଶାଢ଼ି ରେ ନଜର ଆସିଥିଲେ । ସେହିଭଳି ଭେଙ୍କଟ ମଧ୍ୟ ମ୍ୟାଚିଂ ଶେରୱାନୀରେ ସମସ୍ତଙ୍କ ଧ୍ୟାନ ଆକର୍ଷିତ କରିଥିଲେ ।

୧୦ ବର୍ଷର ପ୍ରେମ:

ଏକ ସାକ୍ଷାତକାରରେ ପିଭି ସିନ୍ଧୁ ତାଙ୍କ ପ୍ରେମ କାହାଣୀ ବିଷୟରେ ଖୁଲାସା କରିଥିଲେ । ସେ କହିଥିଲେ ଦୀର୍ଘ ୧୦ ବର୍ଷରୁ ସେ ଭେଙ୍କଟଙ୍କୁ ଜାଣିଥିଲେ । ଏହାକୁ ଆପଣ ଲଭ୍ କମ୍ ଆରେଞ୍ଜ୍ ମ୍ୟାରେଜ୍ ମଧ୍ୟ କହିପାରିବେ ।
ଭେଙ୍କଟ ଏବଂ ତାଙ୍କ ପରିବାର ମଧ୍ୟରେ ପୁରୁଣା ବନ୍ଧୁତା ରହିଛି । ୨୦୨୨ରେ ସିନ୍ଧୁ ଏବଂ ଭେଙ୍କଟ ଏକ ବିମାନରେ ଯାତ୍ରା କରୁଥିଲେ । ଏହି ଯାତ୍ରା ସମୟରେ ଦୁହିଁଙ୍କ ମଧ୍ୟରେ ଅନେକ କଥାବାର୍ତ୍ତା ହୋଇଥିଲା । ଆଉ ଏହି ଯାତ୍ରା ଆମ ଜୀବନର ମୋଡ଼ ବଦଳାଇଦେଇଥିଲା ବୋଲି କହିଥିଲେ ସିନ୍ଧୁ । ମୁଁ ବଦଳି ଗଲି । ଆମେ ବଦଳି ଗଲୁ । ସମୟକ୍ରମେ ଧୀରେ ଧୀରେ ଅନୁଭବ ହେଲା କି ଆମେ ପରସ୍ପରକୁ ପସନ୍ଦ କରିବାକୁ ଲାଗିଥିଲୁ । ଆଉ ଆଜି ଆମେ ଜୀବନସାଥୀ ।
ନିର୍ବନ୍ଧ ଏବଂ ବିବାହକୁ ବ୍ୟକ୍ତିଗତ ରଖିଥିବା ବିଷୟରେ ପଚାରିବାରୁ ସିନ୍ଧୁ ଉତ୍ତରରେ କହିଥିଲେ, ‘ ଏହା ଏକ ବ୍ୟକ୍ତିଗତ ମାମଲା ଏବଂ ଆମ ପାଇଁ ଭବ୍ୟ ବିବାହ ଠାରୁ ଅଧିକ ଗୁରୁତ୍ୱପୂର୍ଣ୍ଣ ଥିଲା ଏହାକୁ ସ୍ମରଣୀୟ କରିବା । ମୁଁ ରୀତିନୀତିକୁ ଅଧିକ ବିଶ୍ୱାସ କରିଥାଏ ତେଣୁ ବିବାହ ଉତ୍ସବରେ କେବଳ ପରିବାର ସଦସ୍ୟ, ସମ୍ପର୍କୀୟ ଏବଂ ନିଟକତର ବନ୍ଧୁବାନ୍ଧବଙ୍କ ଗହଣରେ ସୀମିତ ରଖାଯାଇଥିଲା ।’

ସିନ୍ଧୁଙ୍କୁ ସହଯୋଗ କିରିଥିଲେ ଭେଙ୍କଟ:

ବିବାହ ଆୟୋଜନକୁ ସାଧାରଣ ଭାବରେ ଏବଂ ବ୍ୟକ୍ତିଗତ ରଖିବାରେ ଭେଙ୍କଟ ଏବଂ ତାଙ୍କ ପରିବାର ସିନ୍ଧୁଙ୍କ ସହଯୋଗ କରିଛନ୍ତି । ଏଥିପାଇଁ ସେ କୃତଜ୍ଞ । ସେହି ମୁହୂର୍ତ୍ତ ଭାବପ୍ରବଣ ଥିଲା ଯାହାକୁ ଦୁହେଁ ସର୍ବଦା ସାଇତି ରଖିବେ ବୋଲି କହିଛନ୍ତି ପିଭି ସିନ୍ଧୁ ।

ବ୍ୟାଡମିଣ୍ଟନ କୋର୍ଟରେ ସିନ୍ଧୁ:

ଅଲିମ୍ପିକ ବିଜେତା ସହ ସେ ବିଶ୍ୱ ଚମ୍ପିଆନସିପ୍ ଜିତିଥିବା ପ୍ରଥମ ଭାରତୀୟ ଶଟଲର । ୨୦୦୯ରେ ସେ କଲମ୍ବୋରେ ସବ୍ ଜୁନିୟର ଏସୀୟ ବ୍ୟାଡମିଣ୍ଟନ ଚମ୍ପିଆନସିପରୁ ଡେବ୍ୟୁ କରିଥିଲେ । ରିଓ ଅଲିମ୍ପିକ୍ସ(୨୦୧୬)ରେ ସେ ରୌପ୍ୟ ପଦକ ଏବଂ ବିଶ୍ୱ ଚମ୍ପିଆନସିପ୍‌(୨୦୧୯)ରେ ସ୍ୱର୍ଣ୍ଣ ପଦକ ଜିତିଥିବା ପ୍ରଥମ ଭାରତୀୟ ଶଟଲର । ଅନ୍ତର୍ଜାତୀୟ ମଞ୍ଚରେ ଭାରତର ପ୍ରତିନିଧିତ୍ୱ କରିବା ପାଇଁ ୨୦୧୩ରେ ତାଙ୍କୁ ଅର୍ଜୁନ ପୁରସ୍କାର, ୨୦୧୬ରେ କ୍ରୀଡ଼ା ରତ୍ନ ପୁରସ୍କାର, ୨୦୨୦ରେ ପଦ୍ମ ଭୂଷଣରେ ସମ୍ମାନିତ କରାଯାଇଥିଲା । ୨୦୧୫ରେ ସିନ୍ଧୁ ସର୍ବ କନିଷ୍ଠ ପଦ୍ମଶ୍ରୀ ସମ୍ମାନର ଅଧିକାରିଣୀ ହୋଇଥିଲେ ।