“ସମସ୍ତେ ମରିବ, ତୁମେ ବଞ୍ଚିବା ପାଇଁ ଯୋଗ୍ୟ ନୁହଁ”, ୧୫୯ ଟି ସ୍କୁଲକୁ ବୋମା ମାଡ଼ ଧମକ

ଉତ୍ତରପ୍ରଦେଶ: ଦେଶର ୧୫୯ଟି ସ୍କୁଲକୁ ବୋମା ମାଡ଼ କରି ଉଡ଼ାଇ ଦେବାର ଧମକ ମିଳିଛି। ଏହି ଧମକ ଇମେଲ ମାଧ୍ୟମରେ ସ୍କୁଲଗୁଡ଼ିକୁ ପଠାଯାଇଛି। ଆଗ୍ରା, କାନପୁର, ମେରଠ ଏବଂ ଅନ୍ୟ ସହରର ସ୍କୁଲଗୁଡ଼ିକୁ ଏହି ଧମକପୂର୍ଣ୍ଣ ଇମେଲ ମିଳିଛି।

ଏହି ଘଟଣା ପରେ ପୁଲିସ ଏବଂ ସୁରକ୍ଷା ଏଜେନ୍ସିଗୁଡ଼ିକ ସକ୍ରିୟ ହୋଇଛନ୍ତି। ସ୍କୁଲଗୁଡ଼ିକର ସୁରକ୍ଷାକୁ ଆହୁରି କଡ଼ାକଡ଼ି କରାଯାଇଛି। ବମ୍ବ ଡିସ୍ପୋଜାଲ ସ୍କ୍ୱାଡ ଏବଂ ଅଗ୍ନିଶମ ବିଭାଗର ଟିମ୍‌ଗୁଡ଼ିକ ମଧ୍ୟ ସତର୍କ ହୋଇ ରହିଛନ୍ତି।

ଏହି ଧମକପୂର୍ଣ୍ଣ ଇମେଲ ମଙ୍ଗଳବାର ମଧ୍ୟାହ୍ନ ୨ଟା ସମୟରେ ମେରଠର ଲୋହିଆ ନଗର ଥାନା ଅଞ୍ଚଳର ସତ୍ୟକାମ ଇଣ୍ଟରନ୍ୟାସନାଲ ସ୍କୁଲ, ମେଡିକାଲ ଥାନା ଅଞ୍ଚଳର ଇଣ୍ଟରନ୍ୟାସନାଲ ସ୍କୁଲ ଏବଂ ମେରଠ ପବ୍ଲିକ ସ୍କୁଲକୁ ମଧ୍ୟ ମିଳିଛି।

ଏହା ବ୍ୟତୀତ ଦେଶର ଅନ୍ୟ ଅନେକ ସ୍କୁଲକୁ ମଧ୍ୟ ଏହିପରି ଇମେଲ ପଠାଯାଇଛି, ଯେଉଁଥିରେ ସେମାନଙ୍କୁ ବୋମା ମାଡ଼ କରି ଉଡ଼ାଇ ଦେବାର ଧମକ ଦିଆଯାଇଛି।

ଇମେଲରେ କ’ଣ ଲେଖାଯାଇଛି? ଇମେଲରେ ଲେଖାଯାଇଛି: “ନମସ୍କାର, ଆମେ ଆପଣଙ୍କୁ ଜଣାଉଛୁ ଯେ ଆମେ ସ୍କୁଲ ଭବନ ଭିତରେ ଏକାଧିକ ବୋମା ରଖିଛୁ। ତୁମେ ସମସ୍ତେ ମରିବ। ତୁମର ପିଲାମାନଙ୍କୁ ମରିବାକୁ ହେବ। ତୁମେ ସୁଖରେ ବଞ୍ଚିବା ପାଇଁ ଯୋଗ୍ୟ ନୁହଁ। ସ୍କୁଲ ରକ୍ତପାତରେ ପରିଣତ ହେବ। ଏହି ସନ୍ଦେଶକୁ ଗମ୍ଭୀରତାର ସହ ଗ୍ରହଣ କର, ନଚେତ ତୁମର ପିଲାମାନେ ସେମାନଙ୍କ ଜୀବନ ହରାଇବେ। ଆମେ ଖୁସିରେ ଖବର ଦେଖିବୁ ଏବଂ ପରିବାରଗୁଡ଼ିକୁ କଷ୍ଟରେ ଦେଖିବୁ। ଏବେ ସମୟ ଆସିଛି ଯେ ଭାରତ ଆମର ଯନ୍ତ୍ରଣା ଅନୁଭବ କରିବ। ଆମେ ଆମ ଜୀବନକୁ ଘୃଣା କରୁଛୁ ଏବଂ ପିଲାମାନଙ୍କୁ ମାରିଦେବୁ। ଏହି ଆତଙ୍କବାଦୀ ଆକ୍ରମଣ ପାଇଁ ‘ରୋଡ଼କିଲ’ ଏବଂ ‘ସାଇଲେନ୍ସ’ ଦାୟୀ।”

ପୋଲିସର ତତ୍ପରତା: ଇମେଲ ମିଳିବା ପରେ ସ୍କୁଲ ପ୍ରଶାସନ ତୁରନ୍ତ ପୁଲିସକୁ ଏହି ବିଷୟରେ ସୂଚନା ଦେଇଥିଲା। ପୁଲିସ କେତେକ ସ୍କୁଲରେ ତଲାସୀ କାର୍ଯ୍ୟ ଆରମ୍ଭ କରିଛି, କିନ୍ତୁ ଏ ପର୍ଯ୍ୟନ୍ତ କୌଣସି ବିସ୍ଫୋରକ କିମ୍ବା ସନ୍ଦେହଜନକ ବସ୍ତୁ ମିଳିନାହିଁ। ପିଲାମାନଙ୍କ ସୁରକ୍ଷାକୁ ପ୍ରାଥମିକତା ଦେଇ ଅନ୍ୟ ସ୍କୁଲ ଭବନଗୁଡ଼ିକରେ ମଧ୍ୟ ତଲାସୀ କରାଯାଉଛି।