ରାଜଧାନୀରେ ଅଘଟଣ, ପାର୍କିଂରେ ନିଆଁଲାଗି ପୋଡିଗଲା 4 ଗାଡି

ଭୁବନେଶ୍ବର : ରାଜଧାନୀ ଭୁବନେଶ୍ୱର ଉପକଣ୍ଠ ଗୋଠପାଟଣାରେ ଅଭାବନୀୟ ଘଟଣା । ଦେଖୁଦେଖୁ ପାର୍କିଂରେ ଜଳିଗଲା 4 ଗାଡି । ଘରେ ସମସ୍ତେ ଶୋଇଥିବା ବେଳେ 3ଟି ବାଇକ ସହିତ ଗୋଟିଏ ସ୍କୁଟି ସମ୍ପୁର୍ଣ୍ଣ ଜଳିପଡି ପାଉଁଶ ହୋଇଯାଇଛି । ତେବେ କିଏ ଏବଂ କେଉଁ କାରଣରୁ ନିଆଁ ଲଗାଇଲା ତାହା ବର୍ତ୍ତମାନ ସୁଦ୍ଧା ସ୍ପଷ୍ଟ ହୋଇପାରି ନାହିଁ । ଘଟଣା ସ୍ଥଳରେ ଚନ୍ଦକା ଥାନା ପୋଲିସ ପହଞ୍ଚି ଛାନବିନ ଆରମ୍ଭ କରିଛି ।

ତେବେ ହଠାତ୍ ବିଳମ୍ବିତ ରାତିରେ କେଉଁ କାରଣରୁ 4ଟି 2 ଚକିଆ ଗାଡିରେ ନିଆଁ ଲାଗିଯାଇଥିଲା । ବିସ୍ଫୋରଣ ପରେ ଧୂଆଁ ବାହାରିବା କାରଣରୁ ପ୍ରଥମେ ସ୍ଥାନୀୟ ଲୋକେ ଏହାକୁ ଦେଖିଥିଲେ । ନିଆଁ ଲିଭାଇବା ପାଇଁ ଚେଷ୍ଟା କରିବା ସହିତ ଅଗ୍ନିଶମବାହୀନିକୁ ଖବର ଦେଇଥିଲେ । ତେବେ ବିଭାଗୀୟ କର୍ମଚାରୀ ଆସିବା ବେଳେକୁ ଗାଡିଗୁଡିକ ସମ୍ପୁର୍ଣ୍ଣ ପୋଡି ଯାଇଥିଲା । ତେବେ ପେଟ୍ରୋଲ ଢାଳି କେହି ନିଆଁଇ ଦେଇଥିବା ନେଇ ଅନୁମାନ କରାଯାଉଥିବା ବେଳେ ଚନ୍ଦକା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।