ଏଣିକି ଟ୍ରେନ ଯାତ୍ରା ପଡ଼ିବ ମହଙ୍ଗା, ଯାତ୍ରୀ ଗଣିବେ ଷ୍ଟେସନ ବିକାଶ ଫି
ନୂଆଦିଲ୍ଲୀ: ଏଣିକି ଟ୍ରେନରେ ଯାତ୍ରା କରିବା ଯାତ୍ରୀଙ୍କୁ ପଡିବ ମହଙ୍ଗା । ଗଢ଼ି ଉଠିଥିବା ନୂଆ ଷ୍ଟେସନ ଗୁଡ଼ିକରେ ଟ୍ରେନ ଚଢ଼ିଲେ କିମ୍ବା ସେଠାରେ ଓହ୍ଲାଇଲେ ଯାତ୍ରୀଙ୍କୁ ଷ୍ଟେସନ ବିକାଶ ଫି ଗଣିବାକୁ ପଡିବ । ଶୁଳ୍କ ଲାଗୁ ସଂପର୍କରେ ରେଳବାଇ ପକ୍ଷରୁ ଯୋଜନା କରାଯାଉଛି । ପୁନଃବିକଶିତ ଷ୍ଟେସନଗୁଡ଼ିକ କାର୍ଯ୍ୟକ୍ଷମ ହେବାପରେ ସଂପୃକ୍ତ ଷ୍ଟେସନ ପାଇଁ ଉକ୍ତ ଫି ଲାଗୁ ହେବ। ତେବେ ଏହି ଶୁଳ୍କ ବିଭିନ୍ନ ଶ୍ରେଣୀରେ ଯାତ୍ରା କରୁଥିବା ଯାତ୍ରୀଙ୍କ ପାଇଁ ଭିନ୍ନ ଭିନ୍ନ ରହିବ । ୧୦ ଟଙ୍କାରୁ ଆରମ୍ଭ କରି ୫୦ ଟଙ୍କା ପର୍ଯ୍ୟନ୍ତ ଶୁଳ୍କ ଯାତ୍ରୀମାନେ ଦେବେ। ଅଧିକାରୀଙ୍କ କହିବାନୁଯାୟୀ, ଉକ୍ତ ଫି କୁ ଟ୍ରେନ ଟିକଟ ବୁକିଂ ସମୟରେ ଆଦାୟ କରାଯିବା ସମ୍ଭାବନା ରହିଛି ।
ଏହି କ୍ରମରେ ରେଳବାଇର ସୂଚନା ଅନୁଯାୟୀମ, ଏସି ଶ୍ରେଣୀରେ ଯାତ୍ରା କରୁଥିବା ଯାତ୍ରୀଙ୍କ ଠାରୁ ୫୦ ଟଙ୍କା, ସ୍ଲିପର ଶ୍ରେଣୀର ଯାତ୍ରୀଙ୍କ ଠାରୁ ୨୫ ଟଙ୍କା ଏବଂ ଅସଂରକ୍ଷିତ ଶ୍ରେଣୀର ଯାତ୍ରୀଙ୍କ ଠାରୁ ୧୦ ଟଙ୍କା ଆଦାୟ କରାଯିବ । ଏଥିସହିତ ଏସବୁ ଷ୍ଟେସନରେ ପ୍ଲାଟଫର୍ମ ଟିକଟ ୧୦ ଟଙ୍କା ଲେଖାଏଁ ବଢ଼ିଯିବ। ତେବେ ସବଅର୍ବାନ ଟ୍ରେନ ଯାତ୍ରା କ୍ଷେତ୍ରରେ ଏ ବାବଦରେ କୌଣସି ଶୁଳ୍କ ଆଦାୟ କରାଯିବ ନାହିଁ ବୋଲି ରେଳବୋର୍ଡ ପକ୍ଷରୁ ଜାରି ଏକ ସର୍କୁଲାରରେ କୁହାଯାଇଛି । ନୂଆ ରୂପ ନେଇଥିବା ଷ୍ଟେସନଗୁଡ଼ିକରେ ଟ୍ରେନରୁ ଓହ୍ଲାଉଥିବା ଯାତ୍ରୀଙ୍କ ଠାରୁ ୫୦ ପ୍ରତିଶତ ଶୁଳ୍କ ଆଦାୟ ହେବ । ଯଦି ଯାତ୍ରୀ ଉଭୟ ଟ୍ରେନ ଚଢ଼ୁଛନ୍ତି ଓ ଓହ୍ଲାଉଛନ୍ତି ତାହେଲେ ସେମାନଙ୍କୁ ପ୍ରଯୁଜ୍ୟ ଶୁଳ୍କର ଦେଢ଼ ଗୁଣା ଦେବାକୁ ହେବ ବୋଲି ସର୍କୁଲାରରେ କୁହାଯାଇଛି। ତେବେ ସବୁ ବିକଶିତ ଷ୍ଟେସନଗୁଡ଼ିକ ପାଇଁ ଗୋଟିଏ ହାରରେ ଶୁଳ୍କ ଆଦାୟ ହେବ। ଜିଏସ୍ଟି ସହିତ ଏହା ଆଦାୟ କରାଯିବ।
