ଏକ୍ସପ୍ରେସୱେରେ ଟ୍ରକର ବ୍ରେକ୍ ଫେଲ୍: ୨୦ଟି ଗାଡ଼ିକୁ ଧକ୍କା ଦେଲା, ଜଣେ ମହିଳାଙ୍କ ମୃତ୍ୟୁ
ମୁମ୍ବାଇ: ମୁମ୍ବାଇ-ପୁଣେ ଏକ୍ସପ୍ରେସୱେରେ ଶନିବାର ଅପରାହ୍ନରେ ଏକ ଭୟଙ୍କର ଦୁର୍ଘଟଣା ଘଟିଛି। ରାୟଗଡ଼ ଜିଲ୍ଲାର ଖାଲାପୁର ତାଲୁକା ଅନ୍ତର୍ଗତ ଖୋପୋଲି ପୁଲିସ ଷ୍ଟେସନ ଅଧୀନରେ ଆଦୋଶୀ ଟନେଲ ନିକଟରେ ଏକ କଣ୍ଟେନର ଟ୍ରେଲର ଟ୍ରକ ନିୟନ୍ତ୍ରଣ ହରାଇ ଅତି କମରେ ୨୦ଟି ଗାଡ଼ିକୁ ଧକ୍କା ଦେଇଛି। ଏହି ଦୁର୍ଘଟଣାରେ ଜଣେ ମହିଳାଙ୍କର ମୃତ୍ୟୁ ହୋଇଥିବା ବେଳେ ୧୮ ଜଣ ଗୁରୁତର ଆହତ ହୋଇଛନ୍ତି।
ପୋଲିସ ଅଧିକାରୀଙ୍କ ସୂଚନା ଅନୁଯାୟୀ, ଟ୍ରକର ବ୍ରେକ ଫେଲ ହେବା ଯୋଗୁଁ ଚାଳକ ନିୟନ୍ତ୍ରଣ ହରାଇଥିଲେ। ଫଳରେ ଟ୍ରକଟି ବିଏମଡବ୍ଲୁ ଓ ମର୍ସିଡିଜ ଭଳି ବିଳାସପୂର୍ଣ୍ଣ ଗାଡ଼ି ସହ ଅନ୍ୟ ଗାଡ଼ିଗୁଡ଼ିକୁ ଧକ୍କା ଦେଇଥିଲା। ଏହି ଦୁର୍ଘଟଣାରେ ୧୯ ଜଣ ଗୁରୁତର ଆହତ ହୋଇଥିଲେ ଏବଂ ସେମାନଙ୍କୁ ନବୀ ମୁମ୍ବାଇର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ଆହତଙ୍କ ମଧ୍ୟରୁ ଜଣେ ମହିଳା ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଛନ୍ତି।
ଖୋପୋଲି ପୋଲିସ ଟ୍ରକ ଚାଳକଙ୍କୁ ହେପାଜତକୁ ନେଇଛି। ତେବେ, ଚାଳକଙ୍କ ମେଡିକାଲ ପରୀକ୍ଷଣରୁ ଜଣାପଡ଼ିଛି ଯେ ଘଟଣା ସମୟରେ ସେ ମଦ୍ୟପାନ କରି ନଥିଲେ। ପୋଲିସ ଏହି ଘଟଣାରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି। ଏହି ଦୁର୍ଘଟଣା ଏକ୍ସପ୍ରେସୱେରେ ସୁରକ୍ଷା ନିୟମ ପାଳନ ଏବଂ ଯାନବାହାନର ଯାନ୍ତ୍ରିକ ଅବସ୍ଥା ଯାଞ୍ଚ କରିବାର ଆବଶ୍ୟକତାକୁ ପୁଣି ଥରେ ସାମ୍ନାକୁ ଆଣିଛି।