ନିର୍ବାଚନ ପରେ ମହଙ୍ଗା ମାଡ଼ ! ଟିଭି ଚ୍ୟାନେଲ ସବସ୍କ୍ରିପସ ପାଇଁ ଦେବାକୁ ପଡିବ ଅଧିକ ଦାମ୍, ଜାଣନ୍ତୁ କେତେ ?
ନୂଆଦିଲ୍ଲୀ: ଦେଶରେ ନିର୍ବାଚନ ଶେଷ ହେବା ମାତ୍ରେ ଗ୍ରାହକଙ୍କୁ ଲାଗିଛି ମହଙ୍ଗା ମାଡ଼। ଏବେ ଏହି ମହଙ୍ଗା ମାଡ଼ ଟିଭି ଦର୍ଶକଙ୍କୁ ଲାଗିବାକୁ ଯାଉଛି। କାରଣ ଖୁବ୍ ଶୀଘ୍ର ଟିଭି ଦେଖିବା ପାଇଁ ଆପଣଙ୍କୁ ଅଧିକ ସବସ୍କ୍ରିପସନ୍ (ଟିଭି ଚ୍ୟାନେଲ ସବସ୍କ୍ରିପସନ୍) ବାବଦ ଅର୍ଥ ଖର୍ଚ୍ଚ କରିବାକୁ ପଡିବ। ଯାହା ଫଳରେ ଟିଭି ଦେଖିବା ମହଙ୍ଗା ହେବ।
ଅନେକ ଓଟିଟି ପ୍ଲାଟଫର୍ମ ସେମାନଙ୍କର ହାର ବୃଦ୍ଧି କରିବାକୁ ଯାଉଛନ୍ତି। ଏହାଛଡା ଡିଜ୍ନୀ ଷ୍ଟାର, ଭାୟାକମ୍ ୧୮, ଜି ଏଣ୍ଟରଟେନମେଣ୍ଟ ଏବଂ ସୋନୀ ପିକ୍ଚର୍ସ ନେଟୱାର୍କ ସବସ୍କ୍ରିପସନ୍ ମୂଲ୍ୟ ବଢାଇବାକୁ ଯାଉଛନ୍ତି। ଟିଭି ସବ୍ସ୍କ୍ରିପ୍ସନ୍ ମୂଲ୍ୟ ବଢ଼ିବା ପରେ ଗ୍ରାହକଙ୍କୁ ଚ୍ୟାନେଲ୍ ରିଚାର୍ଜ କରିବା ପାଇଁ ଅଧିକ ଅର୍ଥ ବ୍ୟୟ କରିବାକୁ ପଡିବ।
ରିପୋର୍ଟ ଅନୁଯାୟୀ ଟିଭି ସବ୍ସ୍କ୍ରିପ୍ସନ୍ ମୂଲ୍ୟ ୫ରୁ ୮ ପ୍ରତିଶତ ମହଙ୍ଗା ହେବ। ଯଦି ଆପଣ ବର୍ତ୍ତମାନ ଟିଭି ଦେଖିବା ପାଇଁ ମାସିକ ସବସ୍କ୍ରିପସନ୍ ପାଇଁ ୫୦୦ ଟଙ୍କା ଦେଉଥାନ୍ତି, ତେବେ ଏହି ମୂଲ୍ୟ ଏବେ ପ୍ରାୟ ୪୦ ଟଙ୍କା ବୃଦ୍ଧି ହୋଇପାରେ। ଯଦି ଆପଣ ମାସକୁ ୧୦୦୦ ଟଙ୍କା ରିଚାର୍ଜ କରୁଛନ୍ତି, ତେବେ ଆପଣଙ୍କୁ ଅତିରିକ୍ତ ୮୦ ଟଙ୍କା ଦେବାକୁ ପଡିବ। ଟିଭି ରିଚାର୍ଜ ମୂଲ୍ୟ ବଢାଇବାକୁ ନେଇ ଭାରତୀୟ ଟେଲିକମ୍ ନିୟାମକ କର୍ତ୍ତୃପକ୍ଷ (ଟ୍ରାଇ) ଲୋକସଭା ନିର୍ବାଚନ ପର୍ଯ୍ୟନ୍ତ ଅପେକ୍ଷା କରିବାକୁ କମ୍ପାନୀଗୁଡିକୁ କହିଥିଲା। ବର୍ତ୍ତମାନ ଲୋକସଭା ନିର୍ବାଚନ ଶେଷ ହୋଇଥିବାରୁ ଟିଭି ଚ୍ୟାନେଲ ଦର ବଢ଼ିବା ସୁନିଶ୍ଚିତ ହୋଇଛି। ସମସ୍ତ ପ୍ରସାରଣକାରୀ କମ୍ପାନୀ ନୂଆ ଚୁକ୍ତିନାମା କରିବାକୁ ଡିପିଓକୁ କହିଥିଲେ।
ଏହାପରେ ଟେଲିକମ୍ ରେଗୁଲେଟରୀ ଅଥରିଟି ଅଫ୍ ଇଣ୍ଡିଆ ସମସ୍ତ ପ୍ରସାରଣକାରୀଙ୍କୁ କହିଥିଲେ ଯେ ଲୋକସଭା ନିର୍ବାଚନ ପର୍ଯ୍ୟନ୍ତ ସିଗନାଲ୍ ବନ୍ଦ କରନ୍ତୁ ନାହିଁ। ବର୍ତ୍ତମାନ ଟ୍ରାଇ ଏହାକୁ ଯେକୌଣସି ସମୟରେ ମଞ୍ଜୁରୀ ଦେଇପାରେ। ଚଳିତବର୍ଷ ଜାନୁଆରୀରେ ସମସ୍ତ ଚ୍ୟାନେଲ ଦାମ୍ ୧୦ ପ୍ରତିଶତ ବୃଦ୍ଧି କରିଥିଲେ। ଭାୟାକମ୍ ୧୮ ଦାମ୍ ସର୍ବାଧିକ ୨୫ ପ୍ରତିଶତ ବୃଦ୍ଧି କରିଛି। ମ୍ୟାଚ୍ ପ୍ରସାରଣ ଅଧିକାର ଏବଂ ମନୋରଞ୍ଜନ ଚ୍ୟାନେଲଗୁଡିକର ବଜାର ଅଂଶ ବୃଦ୍ଧି ହେତୁ ଏହି ବୃଦ୍ଧି କରାଯାଇଥିଲା। ଫେବୃଆରୀରୁ ଏହି ନୂଆ ରିଚାର୍ଜ ମୂଲ୍ୟ କାର୍ଯ୍ୟକାରୀ ହୋଇଥିଲା।
