ହୃଦୟ ବିଦାରକ ଘଟଣା..ସମ୍ପତ୍ତି ପାଇଁ ମହିଳାଙ୍କୁ ଜବରଦସ୍ତି ମଦ ପିଆଇଲେ, ପରେ ଜୀଅନ୍ତା ଜାଳି ନଦୀକୁ ଫିଙ୍ଗିଦେଲେ

ନୂଆଦିଲ୍ଲୀ: ଉତ୍ତର ପ୍ରଦେଶର ଇଟାୱାରେ ସମ୍ପତ୍ତି ବିବାଦକୁ ନେଇ ଜଣେ ମହିଳାଙ୍କ ହତ୍ୟାର ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି । ଏହି ମାମଲାରେ ଜଣେ ପ୍ରପର୍ଟି ଡିଲର ଏବଂ ତାଙ୍କ ବ୍ୟବସାୟିକ ଅଂଶୀଦାରଙ୍କୁ ଗିରଫ କରାଯାଇଛି ।

ଅଭିଯୁକ୍ତ ଶିବେନ୍ଦ୍ର ଯାଦବ (୨୬) ଏବଂ ତାଙ୍କ ସହଯୋଗୀ ଗୌରବ (୧୯) ପ୍ରଥମେ ପୀଡିତା ୨୫ ବର୍ଷୀୟ ଅଞ୍ଜଳିଙ୍କୁ ସମ୍ପତ୍ତି କାଗଜପତ୍ର ଦେବା ପାଇଁ ଡାକିଥିଲେ । ଏହା ପରେ ସେମାନେ ତାଙ୍କୁ ମଦ୍ୟପାନ କରାଇଥିଲେ ଏବଂ ତା’ପରେ ତାଙ୍କୁ ଗଳା କାଟି ହତ୍ୟା କରିଥିଲେ ।

ତେବେ ଏତିକିରେ ମନ ଶାନ୍ତି ହୋଇନଥିଲା ଯେ, ମହିଳାଙ୍କୁ ହତ୍ୟା କରିବା ପରେ ତାଙ୍କ ଶରୀରକୁ ପୋଡ଼ି ଦେଇଥିଲେ ଏବଂ ତା’ପରେ ଅର୍ଦ୍ଧଦଗ୍ଧ ମୃତଦେହକୁ ନଦୀରେ ଫିଙ୍ଗି ଦେଇଥିଲେ। ପାଞ୍ଚ ଦିନ ଧରି ନିଖୋଜ ଥିବା ଅଞ୍ଜଳିଙ୍କ ମୃତଦେହ ଶନିବାର ନଦୀ ନିକଟରେ କ୍ଷତବିକ୍ଷତ ଅବସ୍ଥାରେ ମିଳିଥିଲା।

ପୋଲିସ କହିଛି ଯେ, ଅଭିଯୁକ୍ତ ପୀଡିତାଙ୍କ ମୃତଦେହ ଦେଖାଇବା ପାଇଁ ତାଙ୍କ ବାପା ଏବଂ ସ୍ତ୍ରୀଙ୍କୁ ଏକ ଭିଡିଓ କଲ୍ ମଧ୍ୟ କରିଥିଲା। ଅଞ୍ଜଳିଙ୍କ ପରିବାର ସଦସ୍ୟମାନେ ଏକ ନାଳ ପାଖରେ ତାଙ୍କ ଜଳିଯାଇଥିବା ସ୍କୁଟରଟି ପାଇବା ପରେ ଏବଂ ପ୍ରପର୍ଟି ଡିଲରଙ୍କ ଉପରେ ହତ୍ୟା ଅଭିଯୋଗ ଆଣିବା ପରେ ପୋଲିସ ମାମଲାର ତଦନ୍ତ ଆରମ୍ଭ କରିଥିଲା।

ପୀଡିତାଙ୍କ ଭଉଣୀ କିରଣ କହିଛନ୍ତି ଯେ, ଅଭିଯୁକ୍ତମାନେ ଜମି ପାଇଁ ଅଞ୍ଜଳିଙ୍କଠାରୁ 6 ଲକ୍ଷ ଟଙ୍କା ନେଇଥିଲେ । ସେ ଦାବି କରିଥିଲେ ଯେ ଏହା ପରେ ସେ ତାଙ୍କୁ କାଗଜପତ୍ର ଦେବା ବାହାନାରେ ଡାକି ହତ୍ୟା କରିଥିଲେ । ପୋଲିସ ପଚରାଉଚରା ସମୟରେ ଯାଦବ ଏବଂ ତାଙ୍କ ସାଥୀ ଅପରାଧ ସ୍ୱୀକାର କରିଥିଲେ ।