ମୋଦି ସରକାରଙ୍କ ଅନ୍ତରୀଣ ବଜେଟ ଉପରେ କ’ଣ କହୁଛନ୍ତି ଅର୍ଥନୈତିକ ବ୍ୟାପାର ବିଶେଷଜ୍ଞ

ନୂଆଦିଲ୍ଲୀ: କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ମୋଦି ସରକାରଙ୍କ ଚଳିତ କାର୍ଯ୍ୟକାଳର ଶେଷ ବଜେଟ୍ ଉପସ୍ଥାପନ କରି କହିଛନ୍ତି ଯେ ସରକାର ୨୦୨୪-୨୫ରେ ବିତ୍ତୀୟ ନିଅଣ୍ଟକୁ ଜିଡିପିର ୫.୧% କୁ ହ୍ରାସ କରିବେ। ବର୍ତ୍ତମାନ ବିତ୍ତୀୟ ନିଅଣ୍ଟ ୫.୮% ରହିଛି। ଚଳିତ ବଜେଟରେ ଟିକସଦାତାଙ୍କୁ କୌଣସି ନୂଆ ରିହାତି ଦିଆଯାଇନାହିଁ। ଅର୍ଥାତ୍ ଆୟକର ସ୍ଲାବରେ କୌଣସି ପରିବର୍ତ୍ତନ କରାଯାଇନାହିଁ। ତେବେ ଷ୍ଟାର୍ଟଅପ୍ ପାଇଁ ଟିକସ ଛାଡ଼କୁ ଏକ ବର୍ଷ ପାଇଁ ବୃଦ୍ଧି କରାଯାଇଛି। ବ୍ୟାଙ୍କ୍ ବଜାର୍ ଡଟ୍ କମ୍ ର ସିଇଓ ଅଧିଲ ସେଟ୍ଟୀଙ୍କ କହିବାନୁଯାୟୀ, ଗତବର୍ଷର ବଜେଟ୍ ଘୋଷଣାରେ ଯଥାସମ୍ଭବ କର୍ମଜୀବୀ ଜନସଂଖ୍ୟାକୁ ସାମିଲ କରିବାକୁ ଚେଷ୍ଟା କରାଯାଇଥିଲା।

କିନ୍ତୁ ରିପୋର୍ଟ ଅନୁଯାୟୀ, ଲୋକମାନେ ଏବେ ବି ପୁରୁଣା ଟିକସ ବ୍ୟବସ୍ଥାଉପରେ ବିଶ୍ୱାସ କରୁଛନ୍ତି ଏବଂ ଏଥିରେ ଗୃହ ଋଣ ସୁଧ ଛାଡ଼, ଟିକସ ସଞ୍ଚୟ ପାଇଁ ନିବେଶ, ପାରିବାରିକ ସ୍ୱାସ୍ଥ୍ୟ ବୀମା ଏବଂ ଅବସର ପାଇଁ ସଞ୍ଚୟ ଭଳି ଗୁରୁତ୍ୱପୂର୍ଣ୍ଣ ଜିନିଷ ଅନ୍ତର୍ଭୁକ୍ତ । ଯଦି ଆମେ ଟିକସ ସ୍ଲାବ୍ ବିଷୟରେ କହିବା ତେବେ ଗତ ୧୧ ବର୍ଷ ଧରି ଏଥିରେ କୌଣସି ପରିବର୍ତ୍ତନ ହୋଇନାହିଁ ଏବଂ ଅନ୍ତରୀଣ ବଜେଟରେ ଏହା ବଦଳିବ ବୋଲି ଆଶା କରାଯାଉନଥିଲା। ମୁମ୍ବାଇସ୍ଥିତ ପ୍ରଭୁଦାସ ଲିଲାଧରର ଗବେଷଣା ବିଶ୍ଳେଷକ ଅମିତ ଅନୱାନୀ କହିଛନ୍ତି, ନିର୍ବାଚନ ପରେ କ୍ଷମତାକୁ ଫେରିବା ଆଶାରେ ସରକାର ଆଗାମୀ ପୂର୍ଣ୍ଣାଙ୍ଗ ବଜେଟ୍ ପାଇଁ ସୁଯୋଗ ସଞ୍ଚୟ କରିବାକୁ ଚାହୁଁଛନ୍ତି। କିନ୍ତୁ ବିତ୍ତୀୟ ନିଅଣ୍ଟକୁ ନେଇ ଅର୍ଥନୈତିକ ବିଶେଷଜ୍ଞଙ୍କ ଚିନ୍ତା ଏବେ ବି ରହିଛି।

ମୁଡିଜ୍ ର ବରିଷ୍ଠ ସଭାପତି ଖ୍ରୀଷ୍ଟିଆନ୍ ଡି ଗୁଜମାନ୍ କହିଛନ୍ତି, କେନ୍ଦ୍ର ବଜେଟ୍ର ଏକ ବଡ଼ ଅଂଶ ସୁଧ ଦେବାକୁ ଯାଉଛି। ଏବଂ ଋଣ ସୁଲଭତାରେ ବିଶେଷ ଉନ୍ନତି ହୋଇନାହିଁ। ଏଚଡିଏଫସି ବ୍ୟାଙ୍କର ପ୍ରଧାନ ଅର୍ଥନୀତିଜ୍ଞ ସାକ୍ଷୀ ଗୁପ୍ତା କହନ୍ତି, “ବିତ୍ତୀୟ ନିଅଣ୍ଟ ହ୍ରାସ କରିବା ପାଇଁ ସରକାରଙ୍କ ଦୃଷ୍ଟିକୋଣ ସ୍ୱାଗତଯୋଗ୍ୟ ଏବଂ ୨୦୨୪-୨୫ ପାଇଁ ଆଶାଠାରୁ କମ୍ ବଜାର ଋଣ ବଣ୍ଡ୍ ବଜାର ପାଇଁ ଏକ ଭଲ ପଦକ୍ଷେପ। ମୁମ୍ବାଇର ନେକ୍ସଡିମର ପରୋକ୍ଷ ଟିକସ ନିର୍ଦ୍ଦେଶକ ସଞ୍ଜୟ ଛାବ୍ରିଆ କହିଛନ୍ତି, ୨୦୨୪ ଜୁଲାଇରେ ବିତ୍ତୀୟ ନିଅଣ୍ଟର ସମ୍ପୂର୍ଣ୍ଣ ଚିତ୍ର ସ୍ପଷ୍ଟ ହେବ। ବର୍ତ୍ତମାନ ସରକାର ଏହାକୁ ସନ୍ତୁଳନ କରିବାକୁ ଚେଷ୍ଟା କରୁଛନ୍ତି। ଅନ୍ତରୀଣ ବଜେଟରେ ଶିଳ୍ପ ସଂସ୍ଥା ଆଶାନୁରୂପ କୌଣସି ପରୋକ୍ଷ ଟିକସ ସଂସ୍କାର କରିନାହିଁ। ଏବେ ଇଣ୍ଡଷ୍ଟ୍ରି ପରବର୍ତ୍ତୀ ବଜେଟକୁ ଅପେକ୍ଷା କରିବ।

ମୁମ୍ବାଇସ୍ଥିତ ଏଲାରା କ୍ୟାପିଟାଲର ଇନଷ୍ଟିଚ୍ୟୁସନାଲ ଇକ୍ୱିଟିଜ୍ ର ଅର୍ଥନୀତିଜ୍ଞ ଗରିମା କପୁର କହିଛନ୍ତି, ଏହି ବଜେଟ୍ ନିର୍ବାଚନୀ ବାଧ୍ୟତାମୂଳକତାକୁ ସନ୍ତୁଳିତ କରିବା ସହିତ ସମସ୍ତ ଗୁରୁତ୍ୱପୂର୍ଣ୍ଣ କ୍ଷେତ୍ରକୁ ସମନ୍ୱିତ କରିବ। ସାଟର୍ଣ୍ଣ କନସଲଟିଂ ଗ୍ରୁପର ମ୍ୟାନେଜିଂ ପାର୍ଟନର ନିଶାନ୍ତ ଖେମଣି କହିଛନ୍ତି ଯେ ଆଶା ଅନୁଯାୟୀ ଅର୍ଥମନ୍ତ୍ରୀ ଟିକସ ପରିବର୍ତ୍ତନ ଉପରେ ସ୍ଥିତାବସ୍ଥା ବଜାୟ ରଖିଛନ୍ତି। ମେ ୨୦୨୪ରେ ସାଧାରଣ ନିର୍ବାଚନ ପରେ ଜୁଲାଇରେ ଉପସ୍ଥାପିତ ହେବାକୁ ଥିବା ପୂର୍ଣ୍ଣାଙ୍ଗ କେନ୍ଦ୍ର ବଜେଟରେ ଟିକସ ଆଇନରେ ବଡ଼ ଧରଣର ପରିବର୍ତ୍ତନ ହେବ ବୋଲି ଆମେ ଆଶା କରିପାରିବା।