RCBରେ କିଏ ହେବ ନୂଆ Captain ? କେଉଁ ଖେଳାଳିଙ୍କୁ ରିଟେନ୍ କରିବ ବେଙ୍ଗଲୁରୁ, ଦେଖନ୍ତୁ ଲିଷ୍ଟ
ଓଡ଼ିଶା ଭାସ୍କର: ଆଇପିଏଲ-୨୦୨୫ ପାଇଁ ପ୍ରସ୍ତୁତି ପର୍ବ ଆରମ୍ଭ ହୋଇସାରିଛି । ଅକ୍ଟୋବର ୩୧ ତାରିଖ ସୁଦ୍ଧା ସମସ୍ତ ଦଳର ରିଟେନ୍ ଲିଷ୍ଟ ଜାରି କରିବାକୁ ନିର୍ଦ୍ଦେଶ ଦିଆଯାଇଛି । ତେବେ ସବୁଠୁ ଚର୍ଚ୍ଚାରେ ରହିଛି ବିରାଟ ବାହିନୀ ରୋୟଲ ଚାଲେଞ୍ଜର୍ସ ବେଙ୍ଗଲୁରୁ । ଦଳର ଷ୍ଟାର ବ୍ୟାଟର ବିରାଟ କୋହଲିଙ୍କୁ ରିଟେନ୍ କରିବା ସୁନିଶ୍ଚିତ ଥିବା ବେଳେ ୱିକେଟ କିପର ଦିନେଶ କାର୍ତ୍ତିକ ଅବସର ନେଇ ସାରିଛନ୍ତି । ସେପଟେ ଅଧିନାୟକ ଫାଫ୍ ଡୁପ୍ଲେସିସଙ୍କୁ ଦଳ ରିଲିଜ କରିବା ପାଇଁ ଯୋଜନା କରୁଥିବା ମଧ୍ୟ ଆଲୋଚନା ହେଉଛି । ତେବେ ବର୍ତ୍ତମାନ ସବୁଠୁ ବଡ଼ ପ୍ରଶ୍ନ ଆସନ୍ତା ସିଜନ ପାଇଁ କେଉଁ ଖେଳାଳିଙ୍କୁ ରିଟେନ୍ କରିବ ଆରସିବି ? କିଏ ହେବେ ଦଳର ନୂଆ ଅଧିନାୟକ?
କାହାକୁ ରିଟେନ୍ କରିବ RCB?
ବିରାଟ କୋହଲି: ଆଇପିଏଲ-୨୦୨୫ ପାଇଁ ବେଙ୍ଗଲୁରୁ ରିଟେନସନ୍ ଲିଷ୍ଟ ପ୍ରସ୍ତୁତ କରି ସାରିଥିବା କୁହାଯାଉଛି । ଏଥିରେ ସବୁଠୁ ବଡ଼ ନାଁ ରହିଛି କିଙ୍ଗ କୋହଲି । ବିରାଟଙ୍କ ଦଳ ଯେକୌଣସି ପରିସ୍ଥିତିରେ ରିଟେନ୍ କରିବ । ଆଇପିଏଲ ଇତିହାସରେ ବିରାଟ ଏକମାତ୍ର ଖେଳାଳି, ଯିଏ କୌଣସି ସିଜନ ପାଇଁ ଦଳ ପରିବର୍ତ୍ତନ କରିନାହାନ୍ତି । ଆରମ୍ଭରୁ ବେଙ୍ଗଲୁରୁ ସହିତ ଯୋଡ଼ି ହୋଇ ରହିଛନ୍ତି ବିରାଟ । ତେଣୁ ଆସନ୍ତା ସଜିନ ପାଇଁ ମଧ୍ୟ କୋହଲିଙ୍କୁ ଦଳ ରିଟେନ୍ କରିବାରେ ସନ୍ଦେହ କରି ହେବ ନାହିଁ । ଆରସିବି ବିରାଟଙ୍କୁ ପ୍ରଥମ ରିଟେନସନ୍ ଭାବରେ ୧୮ କୋଟି ଟଙ୍କାରେ ରିଟେନ୍ କରିବା ଏକ ପ୍ରକାର ସୁନିଶ୍ଚିତ ।
କ୍ୟାମରନ୍ ଗ୍ରୀନ: ଦ୍ୱିତୀୟ ରିଟେନସନ୍ ପାଇଁ ୧୪ କୋଟି ଟଙ୍କା ମୂଲ୍ୟ ସ୍ଥିର କରାଯାଇଛି । ତେବେ ଏହି ସ୍ଥାନରେ ଆରସିବି ଅଷ୍ଟ୍ରେଲିଆର ଷ୍ଟାର ଅଲରାଉଣ୍ଡର କ୍ୟାମରନ୍ ଗ୍ରୀନଙ୍କୁ ରିଟେନ୍ କରିପାରେ । ବେଙ୍ଗଲୁରୁ ମଇଦାନରେ ଗ୍ରୀନ ଜଣେ ମହତ୍ତ୍ୱପୂର୍ଣ୍ଣ ଖେଳାଳି ଭାବରେ ଭୂମିକା ତୁଲାଇପାରନ୍ତି । ଏହାସହିତ ଗ୍ରୀନଙ୍କ ଭବିଷ୍ୟତ ଏହି ଦଳରେ ଖୁବ ସୁନ୍ଦର ରହିପାରେ ବୋଲି କୁହାଯାଉଛି । ସେହିପରି ଗ୍ରୀନ ଅକ୍ସନକୁ ଗଲେ ବଡ଼ ଆମାଉଣ୍ଟରେ ବିକ୍ରି ହୋଇପାରନ୍ତି । ତେଣୁ ଦଳ ଏହି ଭୁଲ କରି ନ ପାରେ । ତେବେ ରିଟେନ୍ କରିବା ପୂର୍ବରୁ ଗ୍ରୀନଙ୍କ ଆହତ ସମସ୍ୟା ଉପରେ ମଧ୍ୟ ଧ୍ୟାନ ଦେବ ଆରସିବି ।
ରଜତ ପାଟିଦାର: ଆରସିବି ପାଇଁ ରଜତ ପାଟିଦାରଙ୍କ ପ୍ରଦର୍ଶନ ଦମଦାର ରହିଛି । ୨୦୨୪ ଆଇପିଏଲରେ ରଜତ ୧୫ଟି ମ୍ୟାଚରୁ ଦଳ ପାଇଁ ଅନେକ ଗୁରୁତ୍ୱପୂର୍ଣ୍ଣ ଇନିଂସ ଖେଳି ୩୫୫ ରନ୍ କରିଥିଲେ । ତେବେ ଭାରତୀୟ ବ୍ୟାଟର ବିକଳ୍ପ ଭାବରେ ରଜତ ପାଟିଦାରଙ୍କୁ ଦଳରେ ରିଟେନ୍ କରିବା ବେଶ୍ ଗୁରୁତ୍ୱପୂର୍ଣ୍ଣ ରହିବ ବୋଲି ଆଶା କରାଯାଉଛି । ଏଥିପାଇଁ ରଜତ ବେଷ୍ଟ ପ୍ଲେୟର ଭାବରେ ୧୧ କୋଟି ଟଙ୍କାରେ ରିଟେନ୍ କରିପାରେ ଆରସିବି ।
ଅନୁଜ ରାୱତ: ୨୦୨୪ ଆଇପିଏଲରେ ଦଳର ୱିକେଟ କିପର ବ୍ୟାଟ୍ସମ୍ୟାନ୍ ଦିନେଶ କାର୍ତ୍ତିକ ଅବସର ଗୋଷଣା କରି ସାରିଛନ୍ତି । ତେଣୁ ଦଳକୁ ଜଣେ ୱିକେଟ କିପରଙ୍କ ଆବଶ୍ୟକତା ରହିବ । ଏଥିପାଇଁ ୪ କୋଟି ବିନିମୟରେ ଆରସିବି ଅନୁଜ ରାୱତଙ୍କୁ ଦଳରେ ସାମିଲ କରିପାରେ ।
ଏହାପରେ ଚତୁର୍ଥ ରିଟେନ୍ ପ୍ଲେୟର ପାଇଁ ଦଳକୁ ୧୮ କୋଟି ଏବଂ ପଞ୍ଚମ ପ୍ଲେୟର ପାଇଁ ୧୪ କୋଟି ଟଙ୍କା ଖର୍ଚ୍ଚ କରିବାକୁ ହେବ । ତେଣୁ ଦଳ ଅନ୍ୟ ଖେଳାଳିଙ୍କୁ ରିଲିଜ କରି ‘ରାଇଟ୍ ଟୁ ମ୍ୟାଚ୍’ ନିୟମ ଅନୁସାରେ ପୁଣିଥରେ ଦଳରେ ସାମିଲ କରିପାରେ । ଫାଫ୍ ଡୁପ୍ଲେସିସ, ଗ୍ଲେନ ମାକ୍ସୱେଲ ଏବଂ ମହମ୍ମଦ ସିରାଜଙ୍କ ଭଳି ଖେଳାଳିଙ୍କୁ ଦଳରୁ ରିଲିଜ କରିବା ଭଳି ବଡ଼ ନିଷ୍ପତ୍ତି ନେଇପାରେ ବେଙ୍ଗଲୁରୁ ।
