ମଣିପୁର ମହିଳା ଭିଡିଓ ମାମଲାରେ ଆଉ ୨ ଗିରଫ: ମୁଖ୍ୟ ଅଭିଯୁକ୍ତକୁ ବାନ୍ଧିଲା ପୋଲିସ
ନୂଆଦିଲ୍ଲୀ: ମଣିପୁରରେ ଦୁଇ ଆଦିବାସୀ ମହିଳାଙ୍କୁ ଉଲଗ୍ନ କରି ଭିଡିଓ କରିବା ଘଟଣାରେ ଆଉ ଦୁଇ ଜଣଙ୍କୁ ଗିରଫ କରିଛି ପୋଲିସ । ଏମାନଙ୍କ ଭିତରେ ମାମଲାର ମୁଖ୍ୟ ଅଭିଯୁକ୍ତ ମଧ୍ୟ ସାମିଲ ରହିଥିବା କହିଛନ୍ତି ମୁଖ୍ୟମନ୍ତ୍ରୀ ଏନ୍. ବିରେନ ସିଂହ । ତେବେ ଏହାପରେ ମଧ୍ୟ ମାମଲାରେ ଜଣେ ଅଭିଯୁକ୍ତ ଏବେ ଜେଲ ଭିତରେ ରହିଥିବା ସୂଚନା ମିଳିଛି । ଗତକାଲି ଦୁଇ ଆଦିବାସୀ ମହିଳାଙ୍କୁ ଉଲଗ୍ନ କରି ବୁଲାଉଥିବାର ଏକ ଭିଡିଓ ଭାଇରାଲ ହେବା ପରେ ଏଠାରେ ଉତ୍ତେଜନା ସୃଷ୍ଟି ହୋଇଥିଲା । ତେବେ ଏହି ଦୁଇ ମହିଳା ଉତ୍ତର-ପୂର୍ବ ରାଜ୍ୟର କୁକି ସମ୍ପ୍ରଦାୟର ହୋଇଥିବା ବେଳେ ଘଟଣାର ଭିଡିଓ ଗତ ମେ’ ୪ ତାରିଖରେ ରେକର୍ଡ କରାଯାଇଥିବା କୁହାଯାଇଛି ।
ଅଭିଯୁକ୍ତ ଉଭୟ ମହିଳାଙ୍କୁ ମୁକ୍ତ କରିବା ପୂର୍ବରୁ ସେମାନଙ୍କୁ ଯୌନ ନିର୍ୟାତନା ଦେଇଥିବା ଅଭିଯୋଗ ହୋଇଛି । ତେବେ ଏ ନେଇ ମୁଖ୍ୟମନ୍ତ୍ରୀ ବିରେନ ସିଂହ କହିଛନ୍ତି ଯେ, ଦୁଇ ଜଣ ଅଭିଯୁକ୍ତ ଗିରଫ ହୋଇଥିବା ବେଳେ ବର୍ତ୍ତମାନ ମଧ୍ୟ ତଦନ୍ତ ଜାରି ରହିଛି । ତେବେ ଏଭଳି ଏକ ଘଟଣାକୁ ନେଇ ସେ ଆଶ୍ଚର୍ୟ୍ୟ ହେବା ସହ ଏହାକୁ ‘ମାନବିକତା ବିରୋଧରେ ଏକ ଅପରାଧ ବୋଲି କହିଛନ୍ତି । ତେଣୁ ଦୋଷୀକୁ ମୃତ୍ୟୁଦଣ୍ଡ ଦେବାକୁ ପୂର୍ଣ୍ଣ ଚେଷ୍ଟା କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ମୁଖ୍ୟମନ୍ତ୍ରୀ ।
ଭିଡିଓକୁ ନେଇ ଦେଶବ୍ୟାପୀ ଆକ୍ରୋଶ ପରେ ମଣିପୁର ପୋଲିସ ଅଭିଯୁକ୍ତଙ୍କୁ ଗିରଫ କରିବା ଆରମ୍ଭ କରିଥିଲା । ପ୍ରଥମେ ଘଟଣାର ଜଣେ ମୁଖ୍ୟ ଅଭିଯୁକ୍ତକୁ ଗିରଫ କରିଥିବା ବେଳେ ଆଜି ଆଉ ୨ ଜଣଙ୍କୁ ଗିରଫ କରିଛି । ଭାଇରାଲ ହେଉଥିବା ଏହି ୨୬ ସେକେଣ୍ଡର ଭିଡିଓରେ ହୁରେମ ହେରାଦେଶ ସିଂ ଉତେଜିତ ମୈତେଇ ସମ୍ପ୍ରଦାୟର ଲୋକମାନଙ୍କୁ କିଛି ନିର୍ଦ୍ଦେଶ ଦେଉଥିବା ଦେଖିବାକୁ ମିଳିଥିଲା । ଥୋବାଲ ଜିଲ୍ଲାରୁ ହୁରେମଙ୍କୁ ଗିରଫ କରିବା ପରେ ଅନ୍ୟମାନଙ୍କୁ ଗିରଫ କରିବା ପାଇଁ ପ୍ରୟାସ ଜାରି ରଖିଛି ।
ଭିଡିଓ ଅନୁସାରେ, ଅଭିଯୁକ୍ତମାନଙ୍କ ବିରୋଧରେ ଅପହରଣ, ଗଣ ବଳାତ୍କାର ଏବଂ ଅଜଣା ବ୍ୟକ୍ତିଙ୍କ ବିରୋଧରେ ହତ୍ୟା ମାମଲା ରୁଜୁ କରିଛି ପୋଲିସ । ଏହି ମାମଲାରେ ସମ୍ପୃକ୍ତ ସମସ୍ତ ଅଭିଯୁକ୍ତଙ୍କୁ ଧରିବା ପାଇଁ ବରିଷ୍ଠ ଆଇପିଏସ ଅଧିକାରୀଙ୍କ ନେତୃତ୍ୱରେ ସାରା ରାତି ବିଭିନ୍ନ ସ୍ଥାନରେ ଚଢଉ ଜାରି ରଖିଛି । ଏହାବ୍ୟତୀତ ଅଭିଯୁକ୍ତ ହୁରେମର ପରିବାରକୁ ଅଲଗା କରିଦେବା ସହିତ ତାଙ୍କ ଘରେ ନିଆଁ ଲଗାଇ ଦେଇଛନ୍ତି ଗ୍ରାମବାସୀ ।
ସୂଚନା ଅନୁସାରେ, ଗତ ମେ’ ୩ ତାରିଖରୁ ମଣିପୁରରେ ଜାତିଗତ ହିଂସା ଆରମ୍ଭ ହେବା ଦିନଠାରୁ ପ୍ରାୟ ୧୬୦ ଜଣରୁ ଅଧିକ ଲୋକ ପ୍ରାଣ ହରାଇବା ସହ ଅନେକ ଲୋକ ଆହତ ହୋଇଛନ୍ତି । ମେଇତେଇ ସମ୍ପ୍ରଦାୟର ଅନୁସୂଚିତ ଜନଜାତି (ଏସଟି) ମାନ୍ୟତା ଦାବିରେ ବିରୋଧ କରିବା ପାଇଁ ପାହାଡ ଜିଲ୍ଲାରେ ଏକ ‘ଆଦିବାସୀ ସଲିଡିଟି ମାର୍ଚ୍ଚ’ ଆୟୋଜନ କରାଯିବା ପରେ ଏହି ଅଶାନ୍ତି ଆରମ୍ଭ ହୋଇଥିଲା।
