୨୦୨୫ କ୍ୟାଲେଣ୍ଡର ବର୍ଷ ପାଇଁ ସ୍କୁଲ ଛୁଟି ଘୋଷଣା: ୮୨ ଦିନ ବନ୍ଦ ରହିବ ସ୍କୁଲ, ତାଲିକା ଜାରି କଲେ ରାଜ୍ୟ ସରକାର
ଭୁବନେଶ୍ୱର(ଓଡ଼ିଶା ଭାସ୍କର): ୨୦୨୫ କ୍ୟାଲେଣ୍ଡର ବର୍ଷ ପାଇଁ ମାଧ୍ୟମିକ ସ୍କୁଲ ଛୁଟି ତାଲିକା ଘୋଷଣା କରିଛନ୍ତି ରାଜ୍ୟ ସରକାର । ୨୦୨୫ରେ ମୋଟ ୮୨ ଦିନ ସ୍କୁଲ ଛୁଟି ରହିବ । ସେଥିମଧ୍ୟରୁ ୯ ଦିନ ସ୍କୁଲରେ ଉତ୍ସବ ପାଳନ କରାଯିବ । ନେତାଜୀ ଜୟନ୍ତୀ, ସାଧାରଣତନ୍ତ୍ର ଦିବସ, ଶିଶୁ ଦିବସ, ଗାନ୍ଧୀ ଜୟନ୍ତୀ, ସ୍ୱାଧିନତା ଦିବସ ଓ ଗଣେଶ ପୂଜା ଆଦି ସମସ୍ତ ଦିବସ ସ୍କୁଲମାନଙ୍କରେ ପାଳନ କରାଯିବ । ଏହିଦିନମାନଙ୍କରେ ସ୍କୁଲ ଖୋଲା ରହୁଥିବାରୁ ଶିକ୍ଷକ, ଶିକ୍ଷୟିତ୍ରୀ ଓ ଛାତ୍ରଛାତ୍ରୀ ସ୍କୁଲକୁ ଯିବେ ବୋଲି ଗଣଶିକ୍ଷା ବିଭାଗ ତରଫରୁ କୁହାଯାଇଛି ।
ସ୍କୁଲ ଛୁଟି ତାଲିକା ନେଇ ଓଡ଼ିଶା ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ତରଫରୁ ଏକ ବିଜ୍ଞପ୍ତି ଜାରି କରାଯାଇଛି । ୨୦୨୫ରେ ୩୯ ଦିନ ଖରା ଛୁଟି ରହିବ, ଯାହାକି ମେ ୬ରୁ ଆରମ୍ଭ ହୋଇ ଜୁନ୍ ୯ରେ ସମାପ୍ତ ହେବ । ଆସନ୍ତା ବର୍ଷ ୮ ଦିନ ପୂଜା ଛୁଟି ମଧ୍ୟ ରହିବ । ସେପ୍ଟେମ୍ବର ୨୯ରୁ ଅକ୍ଟୋବର ୭ ପର୍ଯ୍ୟନ୍ତ ପୂଜା ଛୁଟି, ଡିସେମ୍ବର ୨୩ରୁ ୩୧ ପର୍ଯ୍ୟନ୍ତ ବଡ଼ଦିନ ଛୁଟି ରହିବ । ଜାନୁଆରୀ ମାସରେ ୪ଟି ଛୁଟି, ଫେବୃଆରୀରେ ୧ଟି, ମାର୍ଚ୍ଚରେ ୪ଟି, ଏପ୍ରିଲରେ ୩ଟି ଛୁଟି ରହିଛି । ଜାନୁଆରୀ ମାସରେ ନୂଆବର୍ଷ, ଶାମ୍ବଦଶମୀ, ସୁବାଷ ଚନ୍ଦ୍ର ବୋଷ / ବୀର ସୁରେନ୍ଦ୍ର ସାଏ ଜୟନ୍ତୀ, ମକର ସଂକ୍ରାନ୍ତି ପାଇଁ ସ୍କୁଲ ଛୁଟି ରହିବ ।
