କରୋନାରୁ ସୁସ୍ଥ ହୋଇ ଏଭରେଷ୍ଟ ଚଢ଼ିଲେ ୨୫ ବର୍ଷୀୟ ଯୁବକ
ନୂଆଦିଲ୍ଲୀ: କୁହାଯାଏ ଦୃଢ଼ ଇଚ୍ଛାଶକ୍ତି ଥିଲେ ସବୁକିଛି ସମ୍ଭବ । ଆଉ ଏହି କଥାକୁ ପ୍ରମାଣିତ କରିଦେଖାଇଛନ୍ତି ମହାରାଷ୍ଟ୍ର ୱସଇର୨୫ ବର୍ଷୀୟ ହର୍ଷବର୍ଦ୍ଧନ ଯୋଶୀ । ବାସ୍ତବରେ, ହର୍ଷବର୍ଦ୍ଧନ କରୋନାକୁ ପରାସ୍ତ କରି ମାଉଣ୍ଟ ଏଭରେଷ୍ଟ ଆରୋହଣ କରିଛନ୍ତି, ଏବଂ ସମସ୍ତଙ୍କ ପାଇଁ ଏକ ଉଦାହରଣ ସୃଷ୍ଟି କରିଛନ୍ତି । ହର୍ଷବର୍ଦ୍ଧନ ଏକ ସାକ୍ଷାତକାରରେ କହିଛନ୍ତି ଯେ ତାଙ୍କର ଏଭରେଷ୍ଟ ଅଭିଯାନ ବହୁତ କଷ୍ଟସାଧ୍ୟ ଏବଂ ସଂଘର୍ଷମୟ ଥିଲା । ସେ କହିଛନ୍ତି ଗୋଟିଏ ପଟେ ସୁନ୍ଦର ପର୍ବତର ଦୃଶ୍ୟ ଏବଂ ହୃଦୟସ୍ପର୍ଶୀ ବାତାବରଣ ଥିବାବେଳେ ଅନ୍ୟ ପଟେ ଶିବିରରେ କରୋନା ଭୂତାଣୁ ସମସ୍ତଙ୍କୁ ଭୟଭୀତ କରିଥିଲା ।
ସେ କହିଛନ୍ତି ମହାମାରୀ ଯୋଗୁଁ ସମସ୍ତେ ସଚେତନ ଥିଲେ ଏବଂ ଯାତ୍ରା ନିୟନ୍ତ୍ରଣ ସହ ଚାଲିଥିଲା, ମାତ୍ର ସେତେବେଳେ ସେ ଏବଂ ତାଙ୍କ ଦଳର କିଛି ସଦସ୍ୟ କୋଭିଡ ପଜିଟିଭ୍ ଥିବା ଜଣାପଡିଥିଲା। ଆଶ୍ଚର୍ଯ୍ୟର କଥା, କରୋନା ଭାଇରସ କିପରି କ୍ୟାମ୍ପରେ ପ୍ରବେଶ କରିଥିଲା ତାହା ଏପର୍ଯ୍ୟନ୍ତ ଜଣାପଡ଼ିନାହିଁ ।
ସୂଚନାନୁସାରେ, ହର୍ଷବର୍ଦ୍ଧନଙ୍କ କୋଭିଡ ପଜିଟିଭ୍ ଆସିବା ପରେ ଡାକ୍ତରମାନେ ଫେରିଯିବାକୁ ପରାମର୍ଶ ଦେଇଥିଲେ, କିନ୍ତୁ ସେ ଆରୋହଣ ଶେଷ କରିବାକୁ ନିଷ୍ପତ୍ତି ନେଇଥିଲେ। ଯୋଶୀ କହିଛନ୍ତି ଯେ ସେ ଅସାବଧାନତା କିମ୍ବା ଦାୟିତ୍ୱହୀନ ହେବାକୁ ଯାଉନାହାଁନ୍ତି, କିନ୍ତୁ ସେ ତୁରନ୍ତ ଫେରିଯିବାକୁ ଚାହୁଁନାହାଁନ୍ତି ।
ହର୍ଷବର୍ଦ୍ଧନଙ୍କ ଅନୁଯାୟୀ, ଯେତେବେଳେ ସେ ଅନେକ ସଂଘର୍ଷ ପରେ ଏଭରେଷ୍ଟର ଶିଖରରେ ପହଞ୍ଚି ପତାକା ଉତ୍ତୋଳନ କରିଥିଲେ, ସେତେବେଳେ ସେ ନିଜକୁ ଗର୍ବିତ ଅନୁଭବ କରିଥିଲେ। ସେ କହିଥିଲେ ଯେ ‘ମୁଁ ବହୁତ ଖୁସି କିନ୍ତୁ ମୁଁ ଭାବୁଥିଲି ଏହା କେବଳ ୫୦% ଯାତ୍ରା, ଅନେକ ଲୋକ ଭାବନ୍ତି ଯେ ଶିଖର ଉପରକୁ ଚଢ଼ିବା ସବୁକିଛି, କିନ୍ତୁ ତଳକୁ ଚଢ଼ିବା ଅଧିକ ବିପଜ୍ଜନକ ଅଟେ’।
