ରାଜଧାନୀର ସ୍କୁଲଗୁଡ଼ିକରେ ଖୁବଶୀଘ୍ର ନିଯୁକ୍ତ ହେବେ ୨୬ ହଜାର ଶିକ୍ଷକ: ସରକାରଙ୍କୁ ହାଇକୋର୍ଟଙ୍କ ନିର୍ଦ୍ଦେଶ
ନୂଆଦିଲ୍ଲୀ: ଖୁବଶୀଘ୍ର ଦିଲ୍ଲୀରେ ୨୬ ହଜାରରୁ ଅଧିକ ଶିକ୍ଷକ ନିଯୁକ୍ତି ପାଇବେ । ଦିଲ୍ଲୀ ହାଇକୋର୍ଟ ଦିଲ୍ଲୀ ସରକାର ଏବଂ ମ୍ୟୁନିସିପାଲିଟି କର୍ପୋରେସନ୍ ଅଫ୍ ଦିଲ୍ଲୀ (ଏମସିଡି) କୁ ସେମାନଙ୍କ ବିଦ୍ୟାଳୟରେ ଖାଲିଥିବା ପଦବୀ ପୂରଣ ପାଇଁ ଶୀଘ୍ର ନିଯୁକ୍ତି ପ୍ରକ୍ରିୟା ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି ।
ଜଷ୍ଟିସ ମନମିତ ପ୍ରୀତମ ସିଂ ଆରୋରା ହାଇକୋର୍ଟଙ୍କ ନିର୍ଦ୍ଦେଶକୁ ପାଳନ ନକରିବାରୁ ପ୍ରତିବର୍ଷ ଖାଲିଥିବା ପଦବୀ ସଂଖ୍ୟାକୁ ଶୂନକୁ ହ୍ରାସ କରିବା ପାଇଁ ଦାଖଲ କରାଯାଇଥିବା ଅବମାନନା ଆବେଦନ ଉପରେ ଏହି ନିର୍ଦ୍ଦେଶ ଦେଇଛନ୍ତି । ଏନଜିଓ ସୋସିଆଲ ଜୁରିଷ୍ଟଙ୍କ ପକ୍ଷରୁ ଓକିଲ ଅଶୋକ ଅଗ୍ରୱାଲଙ୍କ ଦ୍ୱାରା ଏହି ପିଟିସନ ଦାଖଲ କରାଯାଇଥିଲା ।
ଦିଲ୍ଲୀ ସରକାରଙ୍କ ପରାମର୍ଶଦାତା, ମ୍ୟୁନିସିପାଲିଟି କର୍ପୋରେସନ କହିଛନ୍ତି ଯେ, ଖୁବ ଶୀଘ୍ର ନିଯୁକ୍ତି ପ୍ରକ୍ରିୟା ଆରମ୍ଭ ହେବ । ସରକାରୀ ଓକିଲ ଅବନିଶ ଅହଲୱାଟ କୋର୍ଟଙ୍କୁ କହିଛନ୍ତି ଯେ, ସରକାରୀ ଚାଳିତ ବିଦ୍ୟାଳୟରେ ୨୦ ହଜାର ୫୫୭ ଶିକ୍ଷକ ପଦ ଖାଲି ଅଛି । ଏଗୁଡିକ ପୂରଣ କରିବା ପାଇଁ ଦିଲ୍ଲୀ ସବୋର୍ଡେଟେଟ୍ ସର୍ଭିସେସ୍ ସିଲେକସନ ବୋର୍ଡକୁ ଅନୁରୋଧ ପତ୍ର ପଠାଇବାର ପ୍ରକ୍ରିୟା ଚାଲିଛି । ମ୍ୟୁନିସିପାଲିଟି କର୍ପୋରେସନର ଓକିଲ କହିଛନ୍ତି ଯେ, ଏହାର ବିଦ୍ୟାଳୟରେ ୫୭୫୦ ପଦ ଖାଲି ଅଛି ।
ମିଳିତ ପରୀକ୍ଷା ଏକାସାଙ୍ଗରେ ଆୟୋଜିତ କରାଯିବ :-
ଦିଲ୍ଲୀ ସରକାର, ମ୍ୟୁନିସିପାଲିଟି କର୍ପୋରେସନ୍ ଏବଂ ଏନଡିଏମସି ଦ୍ୱାରା ପରିଚାଳିତ ବିଦ୍ୟାଳୟରେ ଶିକ୍ଷକମାନଙ୍କ ଖାଲି ପଦବୀ ପୂରଣ ପାଇଁ ଏକକାଳୀନ ପରୀକ୍ଷା କରାଯିବ ବୋଲି ଡିଏସଏସଏସବି ପରାମର୍ଶଦାତା କୋର୍ଟଙ୍କୁ କହିଛନ୍ତି । ବିଭିନ୍ନ ବର୍ଗର ଶିକ୍ଷକଙ୍କ ଆଧାରରେ ନିଯୁକ୍ତି ପରୀକ୍ଷା କରାଯିବ ।
