ତନ୍ତ୍ର-ମନ୍ତ୍ର ପାଇଁ ୯ ବର୍ଷର ପୁଅକୁ ବଳି ଦେଲେ ପୋଲିସ ବାବୁ, ଭୂତ-ପ୍ରେତ କଥା କହି ନଦୀରେ ଫୋପାଡ଼ିଦେଲେ ଶବ

ଉତ୍ତରପ୍ରଦେଶ: ତନ୍ତ୍ର-ମନ୍ତ୍ର ପାଇଁ ୯ ବର୍ଷର ପୁଅକୁ ବଳି ଦେଇଦେଲା କାକା! ଉତ୍ତରପ୍ରଦେଶର ଦେଓରିଆ ଜିଲ୍ଲାରେ ଦେଖିବାକୁ ମିଳିଛି ଏଭଳି ଏକ ହୃଦୟ ବିଦାରକ ଘଟଣା।

ଭାଲୁଆନି ଥାନା ଅଞ୍ଚଳର ପାଟଖୌଲି ଗାଁରେ ଜଣେ ବ୍ୟକ୍ତି ଅନ୍ଧବିଶ୍ୱାସର ଶିକାର ହୋଇ ନିଜ ଭାଇଙ୍କ ୯ ବର୍ଷର ପୁଅକୁ ଅପହରଣ କରି ତନ୍ତ୍ର-ମନ୍ତ୍ର ପାଇଁ ବଳି ଦେଇଥିଲେ ଏବଂ ତା ପରେ ସେ ସେହି ମୃତଦେହକୁ ସରୟୁ ନଦୀରେ ଫିଙ୍ଗି ଦେଇଥିଲେ।

ଘଟଣା ଅନୁଯାୟୀ, ଯୋଗେଶ କୁମାର ଗୋଣ୍ଡଙ୍କ ୯ ବର୍ଷର ପୁଅ ଆରୁଷ ଗୋଣ୍ଡ ଗତ ଏପ୍ରିଲ ୧୬ ତାରିଖ ସନ୍ଧ୍ୟାରେ ଘରୁ ବାହାରି ନିଖୋଜ ହୋଇଯାଇଥିଲେ। ବହୁ ଖୋଜାଖୋଜି ପରେ ମଧ୍ୟ ତାଙ୍କର ସନ୍ଧାନ ନ ମିଳିବାରୁ ପରିବାର ଲୋକେ ଭାଲୁଆନି ଥାନାରେ ଅପହରଣ ମାମଲା ରୁଜୁ କରିଥିଲେ।

ସାମ୍ନାକୁ ଆସିଲା ସତ: ପୋଲିସ ତଦନ୍ତ ଆରମ୍ଭ କରି ଶିଶୁଟିର କାକା ଇନ୍ଦ୍ରଜିତ ଗୋଣ୍ଡଙ୍କୁ ସନ୍ଦେହ ଆଧାରରେ ଅଟକ ରଖି ପଚରାଉଚରା କରିଥିଲା। ପ୍ରଥମେ ଇନ୍ଦ୍ରଜିତ ପୋଲିସକୁ ଭୁଲାଇବାକୁ ଚେଷ୍ଟା କରିଥିଲେ, କିନ୍ତୁ କଠୋର ପଚରାଉଚରାରେ ସେ ସତ ମାନିଥିଲେ।

ଇନ୍ଦ୍ରଜିତ, ଯିଏ ଉତ୍ତରପ୍ରଦେଶ ପୋଲିସରେ କନଷ୍ଟେବଳ ଭାବେ କାର୍ଯ୍ୟ କରୁଛନ୍ତି, ସେ ବିବାହ ପରେ ଅନ୍ଧବିଶ୍ୱାସରେ ପଡ଼ି ଭୂତ-ପ୍ରେତ ଦ୍ୱାରା ବିଚଳିତ ଥିଲେ। ଏହି ସମସ୍ୟାରୁ ମୁକ୍ତି ପାଇବା ପାଇଁ ସେ ମଦନପୁର ଥାନା ଅଞ୍ଚଳର ଡୁମରି ଗାଁର ତାଙ୍କ ମାମୁଁ ଜୟପ୍ରକାଶଙ୍କ ପରାମର୍ଶ ନେଇଥିଲେ। ଜୟପ୍ରକାଶ ତାଙ୍କୁ ପୁରୁଷ ବଳି ଦେବାକୁ କହିଥିଲେ।

ଏହି ଯୋଜନା ଅନୁଯାୟୀ, ଇନ୍ଦ୍ରଜିତଙ୍କ ନିର୍ଦ୍ଦେଶରେ ତାଙ୍କ ବଡ଼ ଭାଇ ଶଙ୍କର ଗୋଣ୍ଡ ଆରୁଷଙ୍କୁ ଅପହରଣ କରି ଗୋରଖପୁରର ବାରହଲଗଞ୍ଜରେ ଏକ ଭଡା ଘରେ ତିନି ଦିନ ରଖିଥିଲେ। ୧୯ ଏପ୍ରିଲ ରାତିରେ ଇନ୍ଦ୍ରଜିତ, ଜୟପ୍ରକାଶ, ଶଙ୍କର ଓ ଅନ୍ୟ ଜଣେ ବ୍ୟକ୍ତି ମିଳିତ ଭାବେ ସଦର କୋତୱାଲିର ପିପ୍ରା ଚନ୍ଦ୍ରଭାନ ଅଞ୍ଚଳରେ ଆରୁଷଙ୍କୁ ବଳି ଦେଇଥିଲେ।

ଅଭିଯୁକ୍ତ ଗିରଫ: ଏହାପରେ ମୃତଦେହକୁ ପ୍ରଥମେ କବର ଦିଆଯାଇଥିଲା ଓ ପରେ ବାରହଜ ଅଞ୍ଚଳରେ ସରୟୁ ନଦୀରେ ଫିଙ୍ଗି ଦିଆଯାଇଥିଲା।ପୋଲିସ ଏହି ମାମଲାରେ ଇନ୍ଦ୍ରଜିତ ଗୋଣ୍ଡ, ଶଙ୍କର ଗୋଣ୍ଡ, ଜୟପ୍ରକାଶ ଓ ଅନ୍ୟ ଜଣେ ଅଭିଯୁକ୍ତଙ୍କୁ ଗିରଫ କରି ତଦନ୍ତ ଜାରି ରଖିଛି। ଏହି ଘଟଣା ଅଞ୍ଚଳରେ ଆତଙ୍କ ସୃଷ୍ଟି କରିଥିବା ବେଳେ ଅନ୍ଧବିଶ୍ୱାସର ଭୟାବହ ପରିଣାମକୁ ପୁଣି ଥରେ ସାମ୍ନାକୁ ଆଣିଛି।