ଘୋଷଣା ହେଲା ତାରିଖ: ଏହି ତାରିଖରେ ବଡ ପରଦାରେ ରିଲିଜ ହେବ ଶାହିଦ କପୁରଙ୍କ “ଜର୍ସି”

ମୁମ୍ବାଇ: ଖୁବ ଶୀଘ୍ର ପରଦାକୁ ଆସିବ ବଲିଉଡ ଷ୍ଟାର ଶାହିଦ କପୁରଙ୍କ ଅଭିନୀତ ଫିଲ୍ମ “ଜର୍ସି” । ବହୁ ପ୍ରତିକ୍ଷିତ “ଜର୍ସି” ଚଳଚ୍ଚିତ୍ରକୁ ରିଲିଜ କରିବା ପାଇଁ ତାରିଖ ଘୋଷଣା ହୋଇଯାଇଛି । ଆସନ୍ତା ଏପ୍ରିଲ ୧୪ ତାରିଖରେ ସିନେମାଘରକୁ ଆସିବ ଏହିଚ୍ଳଚ୍ଚିତ୍ର । ଏ ନେଇ ଟ୍ୱିଟ କରି ସୂଚନା ଦେଇଛନ୍ତି ଫିଲ୍ମର ସମୀକ୍ଷକ ତରଣ ଆଦର୍ଶ । ଏହି ତାରିଖରେ ଅମିର ଖାନଙ୍କ ଅଭିନୀତ ଲାଲ ସିଂହ ଚଡ୍ଡା ରିଲିଜ ହେବାର ଥିଲା । କିନ୍ତୁ ଏହି ତାରିଖରେ ପରିବର୍ତ୍ତନ ହେବା ପରେ ସମାନ ତାରିଖରେ “ଜର୍ସି” ରିଲିଜ କରାଯିବ ।

ଅର୍ଥାତ ୟଶଙ୍କ ଫିଲ୍ମ “କେଜିଏଫ-୨”କୁ ବକ୍ସ ଅଫିସରେ ଟକ୍କର ଦେବ ଶାହିଦ କପୁରଙ୍କ “ଜର୍ସି” । ଏହି ଚଳଚ୍ଚିତ୍ରରେ ଶାହିଦ ଜଣେ କ୍ରିକେଟର ଭୂମିକାରେ ନଜର ଆସୁଛନ୍ତି । ତେବେ ଫିଲ୍ମର ନିର୍ଦ୍ଦେଶନା ଭାର ଗ୍ରହଣ କରିଛନ୍ତି ଗୌତମ ତିନ୍ନନୁରୀ । ଏହି ଚରିତ୍ର ପାଇଁ କ୍ରିକେଟର ଲିଜେଣ୍ଡ ମହେନ୍ଦ୍ର ସିଂହ ଧୋନୀ ଏବଂ ବିରାଟ କୋହଲିଙ୍କ ସହ ସମୟ ବିତାଇଥିଲେ ଏବଂ ଉଭୟଙ୍କଠାରୁ ଅନେକ କିଛି ପ୍ରେରଣା ପାଇଥିବା ନେଇ ସେ ଏକ ଇଣ୍ଟରଭ୍ୟୁରେ ପ୍ରକାଶ କରିଥିଲେ । ଗତ ଡିସେମ୍ବର ୩୧ ତାରିଖରେ ପରଦାକୁ ଆସିବାର ଥିଲା ଏହି ଚଳଚ୍ଚିତ୍ର । କିନ୍ତୁ ଏବେ ଏପ୍ରିଏ ୧୪ ତାରିଖରେ ପରଦାକୁ ଫେରିବେ ଶାହିଦ କପୁର ଏବଂ ତାଙ୍କ ଫିଲ୍ମ “ଜର୍ସି” ।