ରାହାମା କଲେଜରେ ପୁରାତନ ଛାତ୍ରଛାତ୍ରୀଙ୍କ ଦ୍ୱାରା ଅଧ୍ୟାପକ ସମ୍ବର୍ଦ୍ଧନା

ଜଗତସିଂହପୁର: ସୋମବାର ପୂର୍ବାହ୍ନରେ ରାହାମାରେ ଅବସ୍ଥିତ ସାରଳା ମହାବିଦ୍ୟାଳୟରେ ପୁରାତନ ଛାତ୍ରଛାତ୍ରୀମାନଙ୍କ ଦ୍ୱାରା ଏକ ସମ୍ବର୍ଦ୍ଧନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମରେ ଏହି କଲେଜରେ କାର୍ଯ୍ୟ କରିଥିବା ୬ ଜଣ ଅଧ୍ୟାପକଙ୍କୁ ସମ୍ବର୍ଦ୍ଧିତ କରାଯାଇଛି. ଅବସରପ୍ରାପ୍ତ ଅଧ୍ୟାପକ ସୁବାସ ଚନ୍ଦ୍ର ମହାନ୍ତି, ସର୍ବେଶ୍ୱର ମହାରଣା, ପତିତପାବନ ନାୟକ, କୈଳାଶ ଚନ୍ଦ୍ର ଜେନା, ହିମାଂଶୁ ଆଚାର୍ଯ୍ୟ ଓ କ୍ଷେତ୍ରବାସୀ ରାଉତ ସମ୍ବର୍ଦ୍ଧିତ ହୋଇଥିଲେ। ଏହି ଅବସରରେ ଆୟୋଜିତ ସଭାରେ କଲେଜର ଅଧ୍ୟକ୍ଷ ଅଦ୍ୱେତ କୁମାର ସାହୁ ସଭାପତିତ୍ୱ କରିଥିଲେ। ବରିଷ୍ଠ ଅଧ୍ୟାପକ ଅଜିତ କିଶୋର ପରିଜା ପ୍ରାକ୍ତନ ଛାତ୍ରଛାତ୍ରୀଙ୍କ ଏଭଳି ଉଦ୍ୟମକୁ ପ୍ରଶଂସା କରିଥିଲେ। କଲେଜର ଅନେକ ପୂର୍ବତନ ଅଧ୍ୟାପକ ଅଧ୍ୟାପିକା, କର୍ମଚାରୀ ଓ ଛାତ୍ରଛାତ୍ରୀ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ।

୨୦୦୫ ବ୍ୟାଚରେ ଉତ୍ତୀର୍ଣ ହୋଇଥିବା ଛାତ୍ରଛାତ୍ରୀମାନେ ଏହି କାର୍ଯ୍ୟକ୍ରମକୁ ଆୟୋଜନ କରିଛନ୍ତି। ଏଠାରେ ଉଲ୍ଲେଖଯୋଗ୍ୟ ଯେ ଏହି ବ୍ୟାଚର ଛାତ୍ରଛାତ୍ରୀ ମାନେ ପଢ଼ୁଥିବା ବେଳେ ୨୦୦୫ ମସିହାରେ କଲେଜ ପ୍ରତିଷ୍ଠାର ରୌପ୍ୟ ଜୟନ୍ତୀ ଉତ୍ସବ ପାଳନ କରିଥିଲେ। କଲେଜର ପୂର୍ବତନ ଛାତ୍ର ତଥା ବିବିସି ନ୍ୟୁଜର ସାମ୍ବାଦିକ ସୁବ୍ରତ କୁମାର ପତି, ପୂର୍ବତନ ଛାତ୍ର ସଂସଦ ସଭାପତି ଅମରେନ୍ଦ୍ର ବିଶ୍ୱାଳ ଓ ପୂର୍ବତନ ଆଥଲେଟିକ ସେକ୍ରେଟାରୀ ଜିତେନ୍ଦ୍ର ସାହୁ କାର୍ଯ୍ୟକ୍ରମ ପରିଚାଳନା କରିଥିଲେ।