ନୂଆ ଓଡ଼ିଆ ଚଳଚ୍ଚିତ୍ର ‘ସଲାମ୍ ଭୁବନେଶ୍ବର’ର ଶୁଭ ମହୁରତ ଅନୁଷ୍ଠିତ
ଜଣେ ଗ୍ୟାଙ୍ଗଷ୍ଟର୍ ଅପରାଧିକ କାର୍ଯ୍ୟରୁ ନିବୃତ ହେଇ ଭଲ ମଣିଷ ହେଉଛି। ହେଲେ ପୋଲିସ ତାଙ୍କୁ ବାଧ୍ୟ କରୁଛି ଯେ ସେ ପୁଣି ଅପରାଧମୂଳକ କାର୍ଯ୍ୟରେ ଲିପ୍ତ ହେଉ। କାରଣ ଗ୍ୟାଙ୍ଗଷ୍ଟର୍ ନ ରହିଲେ ପୋଲିସକୁ ବଟି ଦେବେ କିଏ? ସେ ପୁଣି ଖରାପ ବାଟ ଆପଣାଉଛି। ଏହା ଭିତରେ ତା’ ଜୀବନ ସହିତ ଯୋଡ଼ିହେଇଯାଉଛି ଜଣେ ସମ୍ଭାନ୍ତ ପରିବାରର ଆଦର୍ଶ ଝିଅ। ତାକୁ ଗ୍ୟାଙ୍ଗଷ୍ଟର୍ କାମରୁ ଭଲବାଟକୁ ଆଣିବା ପାଇଁ ଝିଅଟି ତାକୁ ପ୍ରେମ କରୁଛି। ସେଇ ଝିଅ ସହ ପ୍ରେମସମ୍ପର୍କ ଗଢ଼ିଉଠିବା ପରେ କାହାଣୀର ନାୟକ ଭଲବାଟକୁ ଫେରିଆସୁଛି।
ଆଇଜ୍ ଓ ଏସ୍. ପିକଚର୍ସ ନିବେଦିତ ଏବଂ ପ୍ରସନ୍ନ ଦ୍ବିବେଦୀ ଓ ସୁଧାକର ବସନ୍ତ ପ୍ରଯୋଜିତ ନୂଆ ଚଳଚ୍ଚିତ୍ର ‘ସଲାମ୍ ଭୁବନେଶ୍ବର’ର ଶୁଭ ମହୁରତ ଅନୁଷ୍ଠିତ ହେଇଯାଇଛି। ଏଥିରେ କାହାଣୀ ପରିକଳ୍ପନା ସହ ଅଭିନୟ ଓ ନୃତ୍ୟ ନିର୍ଦ୍ଦେଶନା ଦେଉଛନ୍ତି ସୁଧାକର ବସନ୍ତ। ସଙ୍ଗୀତ ନିର୍ଦ୍ଦେଶନା ଦେଉଛନ୍ତି ଅଭିଜିତ ମଜୁମଦାର। ଅତୀତରେ ‘ଅରୁନ୍ଧତୀ’ ଓ ‘ଲଭ୍ ଫିଭର’ ପରି ସିନେମାର ନାୟକ ସାଜିଥିବା ରାଜବୀର ‘ସଲାମ୍ ଭୁବନେଶ୍ବର’ର ନାୟକ ସାଜିଛନ୍ତି। ତାଙ୍କ ବିପକ୍ଷର ନାୟିକା ସାଜିଛନ୍ତି ମଡେଲ୍ ତଥା ନବାଗତା ଅଭିନେତ୍ରୀ ଅନିଶା। ଏମାନଙ୍କ ସହ ବବି ମିଶ୍ର ମଧ୍ୟ ଅନ୍ୟତମ ନାୟକ ଭାବେ ଅବତୀର୍ଣ୍ଣ ହେଉଛନ୍ତି। ପୁଣି ଖଳନାୟକ ଭୂମିକାରେ ସମରେଶ, ପପି ସନ୍ତୁକା ଏବଂ ଅନ୍ୟ ପ୍ରମୁଖ ଭୂମିକାରେ ସୁଧାକର, ଗୁଲୁଆ, କାଳିଷଣ୍ଢ, ପ୍ରଳୟ, ରୋଜାଲିନ, ଐଶ୍ବର୍ଯ୍ୟା, ସୁଇଟି, ନନସେନ୍ସ ମଣି, ମଧୁ ରାଓ ପ୍ରମୁଖଙ୍କୁ ଦେଖିବାକୁ ମିଳିବ।
