ଯୁଦ୍ଧରେ କୌଣସି ଦେଶର ବିଜୟ ହେବ ନାହିଁ, ଜର୍ମାନୀରେ ଋଷ-ୟୁକ୍ରେନ ଯୁଦ୍ଧ ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବୟାନ
ନୁଆଦିଲ୍ଲୀ: ତିନି ଦିନିଆ ୟୁରୋପ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋମବାର କହିଛନ୍ତି ଯେ ଋଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧରେ କେହି ବିଜେତା ହେବ ନାହିଁ। ସେ କହିଛନ୍ତି ଯେ ଆଲୋଚନା ମାଧ୍ୟମରେ ସମସ୍ୟାର ସମାଧାନ ଖୋଜିବାରେ ଭାରତ ବିଶ୍ୱାସ କରେ। ଜର୍ମାନ ଚାନ୍ସେଲର ଓଲଫ ସ୍କୋଲଜଙ୍କ ସହ ଆଲୋଚନା ପରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି- ଆମେ ୟୁକ୍ରେନରେ ଚାଲିଥିବା ଯୁଦ୍ଧ ବିଷୟରେ ଆଲୋଚନା କରିଛୁ। ୟୁକ୍ରେନରେ ହୋଇଥିବା ମୁକାବିଲାରେ କେହି ବିଜେତା ହେବେ ନାହିଁ । ଆମେ ଶାନ୍ତି ସପକ୍ଷରେ ଅଛୁ ଏବଂ ଯୁଦ୍ଧ ବନ୍ଦ କରିବାକୁ ଆହ୍ୱାନ୍ କରୁଛୁ।
ୟୁରୋପ ଗସ୍ତ ସମୟରେ ମୋଦୀ ଡେନମାର୍କ, ଆଇସଲ୍ୟାଣ୍ଡ, ଫିନଲ୍ୟାଣ୍ଡ, ସ୍ୱିଡେନ ଏବଂ ନରୱେର ପ୍ରଧାନମନ୍ତ୍ରୀଙ୍କ ସହ ଦ୍ୱିତୀୟ ଭାରତ-ନର୍ଡିକ ସମ୍ମିଳନୀରେ ଯୋଗଦେବେ । ଏହା ସହିତ ଡେନମାର୍କ ପ୍ରଧାନମନ୍ତ୍ରୀ ମେଟେ ଫ୍ରେଡେରିକସେନଙ୍କୁ ଭେଟିବେ।ବୁଧବାର ଫେରିବା ବାଟରେ ଫ୍ରାନ୍ସ ରାଷ୍ଟ୍ରପତି ଇମାନୁଏଲ୍ ମାକ୍ରୋନ୍ ଙ୍କ ସହ ସାକ୍ଷାତ ପାଇଁ ମୋଦୀ ପ୍ୟାରିସରେ ଏକ ସଂକ୍ଷିପ୍ତ ଅଟକି ରହିବେ। ଚଳିତ ବର୍ଷ ତାଙ୍କର ପ୍ରଥମ ବୈଦେଶିକ ଯାତ୍ରା ଏପରି ଏକ ସମୟରେ ଆସିଛି ଯେତେବେଳେ ୟୁରୋପରେ ୟୁକ୍ରେନ୍ ଏବଂ ଋଷ ମଧ୍ୟରେ ଭୟଙ୍କର ଯୁଦ୍ଧ ଚାଲିଛି ।
ରବିବାର ଦିନ ନବନିଯୁକ୍ତ ବୈଦେଶିକ ସଚିବ ବିନୟ ମୋହନ କ୍ୱାଟ୍ରା କହିଛନ୍ତି ଯେ ପିଏମ ମୋଦୀ “ୟୁକ୍ରେନ ପ୍ରସଙ୍ଗରେ” ଆଲୋଚନା କରିବେ ଏବଂ ୟୁରୋପରେ ତାଙ୍କର ତିନି ଦିନିଆ ଦେଶ ଗସ୍ତ ସମୟରେ ଦ୍ୱିପାକ୍ଷିକ ସହଭାଗିତାକୁ ମଜବୁତ କରିବେ। ସରକାରୀ ସୂତ୍ରରୁ ପ୍ରକାଶ ଯେ ପ୍ରଧାନମନ୍ତ୍ରୀ ମୋଦୀଙ୍କ ବିଦେଶ ଗସ୍ତରେ ପ୍ରାୟ ୬୫ ଘଣ୍ଟା ମଧ୍ୟରେ ପ୍ରାୟ ଦୁଇ ଡଜନ ବୈଠକ କରିବେ। ଏଥି ସହିତ ସେ ପ୍ରାୟ ୫୦ ବିଶ୍ୱ ବ୍ୟବସାୟ ନେତାଙ୍କ ସହ କଥାବାର୍ତ୍ତା ବ୍ୟତୀତ ସାତୋଟି ଦେଶର ବିଶ୍ୱ ସ୍ତରୀୟ ନେତାଙ୍କ ସହ ଦ୍ୱିପାକ୍ଷିକ ତଥା ବହୁପକ୍ଷୀୟ ସଭା କରିବେ।
