ଘରେ ଅସରପା ପୋଷିଲେ ମିଳିବ ଦେଢ଼ଲକ୍ଷ ଟଙ୍କା: ଏହି କମ୍ପାନୀ ଦେଉଛି ନିଆରା ଅଫର୍
ଘରେ କିଏ ବା ଅସରପା ଦେଖିବାକୁ ପସନ୍ଦ କରିବ । ଘରେ ଯଦି ଏକ ଅସରପା ଦେଖାଯାଏ, ତେବେ ତାକୁ ସଙ୍ଗେସଙ୍ଗେ ବାହାରକୁ ତଡିଦେବା ପାଇଁ ଆମେ ସମସ୍ତେ ଚାହାଁନ୍ତି । ଯଦି ଆପଣଙ୍କୁ ଘରେ ଅସରପା ପୋଷିବା ପାଇଁ ଟଙ୍କା ଦିଆଯାଏ, ତେବେ ଆପଣ ଇଚ୍ଛା ନଥିବା ସତ୍ତେ୍ୱ ଏହା ନିଶ୍ଚୟ କରିବେ । କଥାଟା ଶୁଣି ଆଶ୍ଚର୍ଯ୍ୟ ହୋଇଗଲେ କି, ତେବେ କଥାଟି ସମ୍ପୂର୍ଣ୍ଣ ସତ । ଆମେରିକାର ଏକ କମ୍ପାନୀ ଏଭଳି କିଛି ଅଫର ଦେଉଛି । ଖବରଟି କେତେ ସତ ଆପଣ ସମ୍ପୂର୍ଣ୍ଣ ଷ୍ଟୋରୀଟି ପଢ଼ିଲେ ନିଶ୍ଚୟ ଜାଣିପାରିବେ । ଆସନ୍ତୁ ଜାଣିବା…
ଯଦି ଆପଣଙ୍କୁ ଅସରପା ପୋଷିବା ପାଇଁ କିଏ ୧.୫ ଲକ୍ଷ ଟଙ୍କା ଦିଏ, ତେବେ ଆପଣ ଅନିଚ୍ଛା ସତ୍ତେ୍ୱ ଏହା କରିବେ । ତେବେ ଏଭଳି ଅଫର ଦେଉଛି ସଂଯୁକ୍ତ ରାଷ୍ଟ୍ର ଆମେରିକାର ଏକ ପେଷ୍ଟ ମ୍ୟାନେଜମେଣ୍ଟ କମ୍ପାନୀ ।
ଔଷଧ ଉପରେ କରିବ ପରୀକ୍ଷା
କଥାଟା ହେଉଛି ଏହି କମ୍ପାନୀ ଅସରପାକୁ ମାରିବା ପାଇଁ ଏକ ଔଷଧ ପରୀକ୍ଷା କରୁଛି । ଯେଉଁଥିପାଇଁ ସେ ଏଭଳି ଏକ ଅଫର ନିଜ ସୋସିଆଲ ସାଇଟ୍ରେ ପୋଷ୍ଟ କରିଛି । ପୋଷ୍ଟରେ ଲେଖାହୋଇଛି ଯେ, ଆପଣମାନେ ଘରେ ଅସରପା ରଖନ୍ତୁ । ଏଥିସହ କମ୍ପାନୀ ଦ୍ୱାରା ପ୍ରସ୍ତୁତ ଔଷଧ ଏହା ଉପରେ ପ୍ରୟୋଗ କରନ୍ତୁ । ତେବେ ଏହା କେତେ ପରିମାଣ କାର୍ଯ୍ୟକାରୀ ହେଉଛି, ତାହା ପରୀକ୍ଷା କରିବା ପାଇଁ କମ୍ପାନୀ କହିଛି ।
ଘରେ ରଖିବେ ୧୦୦ ଅସରପା
ଆମେରିକାର ଉତ୍ତର କାରୋଲିନା ସ୍ଥିତ ଏହି କମ୍ପାନୀ ଆହୁରି କହିଛି ଯେ, ଯଦି ଘରେ ୧୦୦ ଅସରପା ରହିବେ, ତେବେ ମାଲିକଙ୍କୁ ୨୦୦୦ ଡଲାର ଅର୍ଥାତ୍ ପ୍ରାୟ ଦେଢ଼ ଲକ୍ଷ ଟଙ୍କା ଉପହାର ସ୍ୱରୂପ ଦିଆଯିବ । କମ୍ପାନୀ ୫-୬ ଜଣ ଏଭଳି ମାଲିକଙ୍କ ସନ୍ଧାନରେ ଅଛି, ଯେଉଁମାନେ ତାଙ୍କ ଘରେ ୧୦୦ଟି ଅସରପା ରଖିପାରିବେ ।
ମାସକ ପର୍ଯ୍ୟନ୍ତ ଅଫର
କମ୍ପାନୀ ଆହୁରି କହିଛି ଯେ, ଏହି ପରୀକ୍ଷା ପାରମ୍ପରିକ ଉପାୟରେ ଏକ ମାସ ପର୍ଯ୍ୟନ୍ତ ଜାରି ରହିବ । ଏଥିପାଇଁ କମ୍ପାନୀ ପକ୍ଷରୁ କିଛି ସର୍ତ୍ତ ମଧ୍ୟ ରଖାଯାଇଛି । ଯେଉଁମାନେ ଏହାର ଲାଭ ଉଠାଇବେ, ସେମାନଙ୍କ ବୟସ ସୀମା ୨୧ ବର୍ଷ ହୋଇଥିବା ଆବଶ୍ୟକ । ଏଥିସହ ପରୀକ୍ଷାରେ ସମ୍ପୂର୍ଣ୍ଣ ସାହାଯ୍ୟ କରିବେ ବୋଲି ଲିଖିତ ଭାବେ ଦେବାକୁ ହେବ । ଏଥିସହ ଉକ୍ତ ସମୟ ବ୍ୟବଧାନରେ ଅନ୍ୟ କୌଣସି କମ୍ପାନୀର ଉତ୍ପାଦକୁ ଏହି ସମୟରେ ବ୍ୟବହାର କରିପାରିବେନାହିଁ । ସମୟ ବ୍ୟବଧାନ ଶେଷ ହେବାପରେ ଯଦି ମାଲିକ ଅସରପା ଘରୁ କାଢ଼ିବା ପାଇଁ ଅସମର୍ଥ ହେଲେ, ତେବେ କମ୍ପାନୀ ଏଥିରେ ସମସ୍ତ ପ୍ରକାର ସାହାଯ୍ୟ କରିବ ।
