ପ୍ରଧାନମନ୍ତ୍ରୀଙ୍କ ଡିଜିଟାଲ ଇଣ୍ଡିଆକୁ ପ୍ରଶଂସା କଲେ ସୁନ୍ଦର ପିଚାଇ, ଗୁଗୁଲର ବଡ ପ୍ଲାନ ବିଷୟରେ କଲେ ଆଲୋଚନା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୧ ରୁ ୨୩ ଜୁନ୍ ମଧ୍ୟରେ ତିନି ଦିନିଆ ଆମେରିକା ଗସ୍ତରେ ଥିଲେ। ଏହି ସମୟରେ ସେ ଆମେରିକାର ରାଷ୍ଟ୍ରପତି ଜୋ ବାଇଡେନ, ଉପରାଷ୍ଟ୍ରପତି କମଲା ହାରିସ ଏବଂ ଅନ୍ୟାନ୍ୟ ବିଶିଷ୍ଟ ନେତା ତଥା ଅଗ୍ରଣୀ ଆମେରିକୀୟ କମ୍ପାନୀଗୁଡିକର ବରିଷ୍ଠ କାର୍ଯ୍ୟନିର୍ବାହୀମାନଙ୍କୁ ଭେଟିଥିଲେ। ଏଥିରେ ଗୁଗୁଲର ଭାରତୀୟ ମୂଳ ସିଇଓ ସୁନ୍ଦର ପିଚାଇ ଅନ୍ତର୍ଭୁକ୍ତ ଥିଲେ। ସେ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବା ପରେ କମ୍ପାନୀ ପକ୍ଷରୁ ଏକ ବଡ଼ ଘୋଷଣା କରିଛନ୍ତି।

ଗୁଗୁଲ୍ ସିଇଓ କହିଛନ୍ତି ଯେ, ଗୁଜୁରାଟରେ କମ୍ପାନୀ ଏହାର ଗ୍ଲୋବାଲ୍ ଫିଣ୍ଟେକ୍ (ଫାଇନାନ୍ସିଆଲ୍ ଟେକ୍ନୋଲୋଜି) ଅପରେସନ୍ ସେଣ୍ଟର ଖୋଲିବ। ଏହା ସହିତ ସୁନ୍ଦର ପିଚାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଡିଜିଟାଲ ଇଣ୍ଡିଆ କାର୍ଯ୍ୟକ୍ରମକୁ ମଧ୍ୟ ପ୍ରଶଂସା କରିଥିଲେ।

ନ୍ୟୁଜ୍ ଏଜେନ୍ସି ANI ସହ କଥାବାର୍ତ୍ତା କରି ପିଚାଇ କହିଛନ୍ତି ଯେ, ଆମେରିକାର ଐତିହାସିକ ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବା ଗୌରବମୟ ବିଷୟ। ଆମେ ପ୍ରଧାନମନ୍ତ୍ରୀଙ୍କୁ କହିଛୁ ଯେ, ଗୁଗୁଲ ଭାରତର ଡିଜିଟାଇଜେସନ୍ ପାଣ୍ଠିରେ ୧୦ ବିଲିୟନ ଡଲାର ବିନିଯୋଗ କରୁଛି। ଗୁଜୁରାଟର ଇଣ୍ଟରନ୍ୟାସନାଲ ଫିନ୍-ଟେକ୍ (GIFT) ସିଟିରେ ଆମର ଗ୍ଲୋବାଲ୍ ଫିଣ୍ଟେକ୍ ଅପରେସନ୍ ସେଣ୍ଟର ଖୋଲିବାକୁ ଆମେ ଘୋଷଣା କରୁଛୁ।

ଡିଜିଟାଲ ଇଣ୍ଡିଆର ପ୍ରଶଂସା କରି ଗୁଗୁଲ ସିଇଓ କହିଛନ୍ତି, ଡିଜିଟାଲ ଇଣ୍ଡିଆ ପାଇଁ ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣ ତାଙ୍କ ସମୟଠାରୁ ଆଗରେ ଥିଲା ଏବଂ ମୁଁ ବର୍ତ୍ତମାନ ଏହାକୁ ଏକ ବ୍ଲୁ ପ୍ରିଣ୍ଟ ଭାବରେ ଦେଖୁଛି ଯାହା ଅନ୍ୟ ଦେଶମାନେ ଅନୁସରଣ କରିବାକୁ ଚେଷ୍ଟା କରୁଛନ୍ତି।