୧ ଅକ୍ଟୋବରରୁ ବଦଳିଯିବ ଟଙ୍କା ସହ ଜଡ଼ିତ ଏହି ୬ଟି ନିୟମ! ଗ୍ୟାସ୍ ସିଲିଣ୍ଡରରୁ ନେଇ କ୍ରେଡିଟ୍ କାର୍ଡ ପଯ୍ୟନ୍ତ…
ନୂଆଦିଲ୍ଲୀ: ଆଜି ସେପ୍ଟେମ୍ବର ମାସର ଶେଷ ଦିନ । ନୂଆ ମାସର ଆରମ୍ଭ ସହିତ ଏପରି ଅନେକ ଆର୍ôଥକ ନିୟମ ଅଛି, ଯେଉଁଥିରେ ପରିବର୍ତ୍ତନ ହେବ । ଏହି ନିୟମ ସାଧାରଣ ଲୋକଙ୍କ ପକେଟ ଉପରେ ସିଧାସଳଖ ପ୍ରଭାବ ପକାଇବ । ଆସନ୍ତାକାଲି ଠାରୁ ନୂଆ ମାସ ଆରମ୍ଭ ହେବ । ଅକ୍ଟୋବର ଆରମ୍ଭ ସହିତ, ଅନେକ ନିୟମରେ ପରିବର୍ତ୍ତନ ହେବ । ଛୋଟ ସଞ୍ଚୟ ଯୋଜନା ଏବଂ କ୍ରେଡିଟ୍-ଡେବିଟ୍ କାର୍ଡ ସହିତ ଜଡିତ ନିୟମ ମଧ୍ୟ ଏଥିରେ ସାମିଲ ରହିଛି । ଏହି ପରିବର୍ତ୍ତନଗୁଡ଼ିକ ବିଷୟରେ ଆସନ୍ତୁ ଜାଣିବା …
– ନୂଆ ମାସ ଆରମ୍ଭ ସହିତ ଏଲପିଜି ଗ୍ୟାସ ସିଲିଣ୍ଡରର ହାରରେ ପରିବର୍ତ୍ତନ ହୋଇପାରେ । କିଛି ଦିନ ପୂର୍ବରୁ ଘରୋଇ ଗ୍ୟାସ ସିଲିଣ୍ଡରର ମୂଲ୍ୟ ୨୦୦ ଟଙ୍କାକୁ ହ୍ରାସ କରି କେନ୍ଦ୍ର ସରକାର ଗ୍ରାହକଙ୍କୁ ଏକ ବଡ଼ ଆରାମ ପ୍ରଦାନ କରିଛନ୍ତି ।
– ଆସନ୍ତାକାଲି ଠାରୁ ଟିସିଏସ ନିୟମରେ ଏକ ବଡ ପରିବର୍ତ୍ତନ ହେବାକୁ ଯାଉଛି । ଆସନ୍ତାକାଲି ଠାରୁ ଆପଣଙ୍କୁ ବିଦେଶ ଯିବା, ବିଦେଶୀ ଷ୍ଟକ୍, ମ୍ୟୁଚୁଆଲ୍ ଫଣ୍ଡ, ବିଦେଶୀ କ୍ରିପ୍ଟୋକରେନ୍ସିରେ ନିବେଶ କରିବା ସମୟରେ ହୋଇଥିବା ଖର୍ଚ୍ଚ ଉପରେ ଅଧିକ ଟିସିଏସ ଦେବାକୁ ପଡିବ । ଶିକ୍ଷା ଏବଂ ମେଡିକାଲ ଖର୍ଚ୍ଚ ବ୍ୟତୀତ ଅନ୍ୟ କୌଣସି ବିଦେଶୀ ଖର୍ଚ୍ଚ ଯାହା ୭ ଲକ୍ଷରୁ ଅଧିକ, ସେଥିପାଇଁ ଆପଣଙ୍କୁ ୨୦ ପ୍ରତିଶତ ପର୍ଯ୍ୟନ୍ତ ଟିସିଏସ ଦେବାକୁ ପଡିବ ।
– ୨୦୦୦ ଟଙ୍କିଆ ନୋଟ ବଦଳାଇବାର ସମୟସୀମା ଶେଷ ହେବାକୁ ଯାଉଛି । ଏପରି ପରିସ୍ଥିତିରେ ଏହି ନୋଟ୍ ଗୁଡିକ ଅକ୍ଟୋବର ୧ ରୁ ବୈଧ ହେବ ନାହିଁ । ରିଜର୍ଭ ବ୍ୟାଙ୍କ ଏହା ପୂର୍ବରୁ ସ୍ପଷ୍ଟ କରିସାରିଛି ଯେ, ନୋଟ୍ ବିନିମୟ ପାଇଁ ସମୟସୀମା ଆଉ ବୃଦ୍ଧି କରାଯିବ ନାହିଁ । ଏପରି ପରିସ୍ଥିତିରେ, ଯଦି ଆପଣଙ୍କର ପାଖାପାଖି ୨୦୦୦ ଟଙ୍କା ନୋଟ୍ ଅଛି, ତେବେ ଆଜି ସେଗୁଡିକୁ ବିନିମୟ କରନ୍ତୁ ।
– ଆସନ୍ତାକାଲିଠାରୁ ଜନ୍ମ ପ୍ରମାଣପତ୍ରର ଉପଯୋଗିତା ବୃଦ୍ଧି ପାଇବ । ଛୁଆର ସ୍କୁଲ ଓ କଲେଜରେ ଆଡମିସନରୁ ନେଇ ବିବାହ ପଞ୍ଜୀକରଣ, ଡ୍ରାଇଭିଂ ଲାଇସେନ୍ସ, ଭୋଟର ଆଇଡି, ସରକାରୀ ଚାକିରି ଇତ୍ୟାଦି ସମସ୍ତ କାର୍ଯ୍ୟ ପାଇଁ ବ୍ୟବହୃତ ହୋଇପାରିବ । ଆଧାର ତ୍ରିଆରି କରିବାରେ ଜନ୍ମ ପ୍ରମାଣପତ୍ରରେ ମଧ୍ୟ ବ୍ୟବହାର କରାଯାଇପାରିବ ।
– ଅକ୍ଟୋବର ୧ ରୁ କ୍ରେଡିଟ୍ ଏବଂ ଡେବିଟ୍ କାର୍ଡ ନିୟମରେ ବଡ଼ ପରିବର୍ତ୍ତନ ହେବାକୁ ଯାଉଛି । ଆସନ୍ତାକାଲି ଠାରୁ ଗ୍ରାହକମାନେ ସେମାନଙ୍କର ନେଟୱାର୍କ ପ୍ରଦାନକାରୀ ବାଛିବାର ସ୍ୱାଧୀନତା ପାଇବେ । ବର୍ତ୍ତମାନ କ୍ରେଡିଟ୍ ଏବଂ ଡେବିଟ୍ କାର୍ଡର ନେଟୱାର୍କ ପ୍ରଦାନକାରୀକୁ କାର୍ଡ ଜାରି କରିଥିବା ବ୍ୟାଙ୍କ କିମ୍ବା କମ୍ପାନୀ ଧାର୍ଯ୍ୟ କରୁଥିଲା ।
– ଯଦି ଆପଣ କ୍ଷୁଦ୍ର ସଞ୍ଚୟ ଯୋଜନାରେ ନିବେଶ କରନ୍ତି, ତେବେ ନିଶ୍ଚିତ ଭାବରେ ଆଧାରକୁ ଆପଣଙ୍କର ଖାତା ସହିତ ଲିଙ୍କ୍ କରନ୍ତୁ । ଆସନ୍ତାକାଲି ଠାରୁ ଆଧାର ଲିଙ୍କ୍ ବିନା ଖାତା ଫ୍ରିଜ୍ ହୋଇଯିବ । ଏପରି ପରିସ୍ଥିତିରେ, ପିପିଏଫ, ଏସଏସୟାଇ ପରି ଆକାଉଣ୍ଟଧାରୀମାନଙ୍କ ଆକାଉଣ୍ଟ ଫ୍ରିଜ୍ ହୋଇଗଲେ ସେମାନେ ନିବେଶ କରିପାରିବେ ନାହିଁ କିମ୍ବା ସୁଧର ଲାଭ ଉଠାଇ ପାରିବେ ନାହିଁ ।
